Read Khoekhoegowab Levitikus 18 Bible Online

Levitikus 18 - Khoekhoegowab bible

Levitikus 18

¹ǃAruǀîb ge ǃKhūba Moseb ǃoa ge mî:

²ǃHoa re Israeli ôan ǀkha îts ǁîna mîba: Tita ge ǃKhūta, sa Elota.

³Sadu ge ǁnā Egipteǃhūb, ǁîb ǃnâ du ge ǁan hâ ib di sîsengu ǃoa dī tide; tsî Kanaanǃhūb, ǁîb ǃoa ta nî ūsī dub di sîsengu ǃoa du ge dī tide tsî ǁîn di ǂnûiǂgādi ǃnâ tanisen tide;

⁴Ti ǂhanuga du ge nî dī tsî ti ǂnûiǂgāde nî ǃkhōǀgaipe, ǁîn ǃnâ du nî tanisenga: Tita ge ǃKhūta sa Elota.

⁵Ā, ti ǂnûiǂgādi tsî ti ǂhanugu tsîna du ge nî ǃkhōǀgaipe; ǁîna ge dī khoe-i hoa-i ge ǁîna xu nîra ûi: Tita ge ǃKhūta.

⁶Khoe-i xare-i ge ǁî-i ǁgans di ǀaokhoe-e ǀgū tide, taotaosaǃkhaisa i nî khowa-aise; tita ge ǃKhūta.

⁷Taotaosaǃkhais saob dis tsî taotaosaǃkhais saos disats ge khowa-ai tide; saos komo, ǁîs di taotaosaǃkhaisats ge khowa-ai tide.

⁸Taotaosaǃkhais saob di taras disats ge khowa-ai tide: Saob di taotaosaǃkhais komo.

⁹Taotaosaǃkhais sa ǃgâsas dis, saob ôas, saos ôas, ommi ǃnâ ge ǃnaes kas, ǃauga ge ǃnaes kas hoas, ǁîs di taotaosaǃkhaisats ge khowa-ai tide.

¹⁰Taotaosaǃkhais sa ôab di ôas dis kas, sa ôas di ôas dis kas, ǁîs di taotaosaǃkhaisats ge khowa-ai tide; sa taotaosaǃkhais komo.

¹¹Taotaosaǃkhais saob taras di ôas dis, saoba ǁorabahe hâs (sa ǃgâsas komo) ǁîs di taotaosaǃkhaisats ge khowa-ai tide.

¹²Taotaosaǃkhais saob ǃgâsas disats ge khowa-ai tide; saob di ǀgūkhoes komo.

¹³Taotaosaǃkhais saos ǃgâsas disats ge khowa-ai tide; saos di ǀgūkhoes komo.

¹⁴Taotaosaǃkhais saob ǃgâsab disats ge khowa-ai tide, ǁîb tarasats ge ǀgū tide; sa ǁnaos komo.

¹⁵Taotaosaǃkhais sa ǀuiǀgôas disats ge khowa-ai tide; sa ôab di taras komo, ǁîs di taotaosaǃkhaisats ge khowa-ai tide.

¹⁶Taotaosaǃkhais sa ǃgâsab taras disats ge khowa-ai tide; sa ǃgâsab di taotaosaǃkhais komo.

¹⁷Taotaosaǃkhais taras dis tsî ǁîs di ôas dis tsînats ge khowa-ai tide; ǁîs ôab di ôas kas, ǁîs ôas di ôas kas hoasats ge ū tide, ǁîs di taotaosaǃkhaisats nî khowa-aise; ǀgūkhoero komo; taotaosa dīs ge a ǁî.

¹⁸Tsîts ge ǁkhāti tara-e ū tide ǁîs di ǃgâsas tawa, ǂōǂō sits nîga, ǁîs xōǀkhāts nî taotaosaǃkhais âsa khowa-aise, ganupes a ûitsama hîa.

¹⁹ǁKhātits ge tarasa ǁîs ǃanuoǃnâsib di ǀaesenni ǃnâ ǀgū tide, taotaosaǃkhais âsats nî khowa-aiga.

²⁰Tsîts ge sa ǀgūkhoeb di tarasa ǁgoeǀkhā tide, ǃgom kai sits nîga, îts tā ǁîs ǀkha ǃanuoǃnâ.

²¹Tsî sa surib xats ge mā tide, Moloxa i nî ǀaesa ǃgûǃnâǃganubase; tsî ǀons, sa Elob disats ge ǀuriǀuri tide: Tita ge ǃKhūta.

²²Aore khoe-i tawats ge ǁgoe tide, taras ǀkhats ra ǁgoe khami; ǁgaidī-i ge a ǁî.

²³ǁNās ǁkhās khamits ge ǀgoa-i ǀkha ǁgoe tide, ǁî-i ǀkhats nî ǃanuoǃnâga; taras ge ǁkhāti ǀgoa-i aiǃâ mâ tide, ǁae-ū i nîga; taotaosa dīǃkhais ge a ǁî.

²⁴Nēti ī xū-i hoa-i ǀkha tā ǀuriǀurisen; ǁnā ǀūben, sa ais aiǃâba xu ta ra aoǂuin ge nēn hoan ǀkha ge ǀuriǀurisen,

²⁵ǃhūb a ǃanuoǃnâ tsî tita ge ǂhanuoǃnâsib âba ra ôaǃnâ tsî ǃhūb ra ǁîb di ǁansabena ǂaraǂuis kōse.

²⁶Xawe sadu ge ti ǂhanugu tsî ti ǂnûiǂgādi tsîna nî ǃkhōǀgaipe tsî nē ǁgaidīn hoan xa xū-e dī tide, ǁansabe-i kao, ǃhaokhoe-i sadu ǁaegu ga hâ-i hoa-i kao.

²⁷Khoen nē ǃhūb din sadu aiǃâ ge hâ in ge nē ǁgaidīn hoana gere dī; ob ge ǃhūba ge ǃanuoǃnâ.

²⁸Îb ǁnā ǃhūba tā ǂaraǂui du, ǁîba du ga ǀuriǀurio, ǁnā ǁaes, sadu aiǃâ ge hâ isab ge ǂaraǂui khami.

²⁹Nē ǁgaidīn xa ga ǀnîna dī-i hoa-i, ǁîna ga dī ǀomdi hoadi ge ǁîdi ǁaes di ǁaeguba xu nî ǃhomǂuihe.

³⁰ǁNā-amaga du ge ti mîmāsa nî ǃkhōǀgaipe, î du tā dī ǁnā ǁgaisi ǂnûiǂgādi, sadu aiǃâ ge dīhedi tsî ǁîdi ǀkhab ge ǃhūba ǃanuoǃnâ kaidi ǃoa: Tita ge ǃKhūta, sadu Elota.