Read Khoekhoegowab Levitikus 19 Bible Online

Levitikus 19 - Khoekhoegowab bible

Levitikus 19

¹ǃAruǀîb ge ǃKhūba Moseb ǃoa ge mî:

²Hoaraga ǀhûs Israeli ôan dis ǀkha ǃhoa îts ǁîna ǃoa nēti mî re: Sadu ge nî ǃanu, tita, ǃKhūta sadu Elota a ǃanu xui-ao.

³Mâ-i hoa-e a-i ǁî-i îs tsî ǁî-i îb tsîra ǃao! Ti sâtsēde tsēdī re! Tita ge ǃKhūta, sadu Elota.

⁴ǁGôa-elon ǃoa du ge ǂnan tide, tsî du ge kuruhe hâ elo-īna dībasen tide. Tita ge ǃKhūta, sadu Elota.

⁵Tsî ganganǁguiba-e du ga ǃKhūba ǂābao, o du ge ǃgâiǃgâibasens âb ǃoa nî ǁguiba.

⁶ǁGuiba du ra tsēs ǂûs tsî ǁîsa saoǃgoaxa tsēs ai du ge nî ǂû i; xawe ǃnonaǁî tsēs kōse ǃgau hâ-i ge ǀaes ǀkha nî khauǃkhūhe.

⁷ǃNonaǁî tsēs ai i ga ǂûheo, ǁnā-i ge ǁgaidīb ase ī, tsî i ge ǃgâise kōǀîhe tide,

⁸tsî ǁnāsa ga dī-i ge ǃûǂams â-e nî tani, ǃKhūb khaibahe hâ-e i go ǃanuoǃnâ kai xui-ao; ǁnā ǀoms ge ǁaes âsa xu nî ǃhomǂuihe.

⁹Tsî ǃhūb di ǀkhī-ūxūnats ga ǃgaobaseno, ots ge ǀuni xū-i kōse ǃgaoǁnâ tide, îts ǁkhāti ǁnā go ǃhoroǃnuruga tā ôaǀhao!

¹⁰ǁNās ǁkhās khamits ge ǁkhāti sa ǂauxûiǂûǃhanaba ǃanuse ǃoraǁnâ tsî ǃhūb ai ge ǁnā xūrona sā-ai tide, îts ǁnāna ǀgâsab tsî ǃhaokhoeba xūba! Tita ge ǃKhūta, sa Elota.

¹¹Sadu ge ǃnari tsî ǂhomi tsî gāxaǃnâse nē-e nau-e sîsenū tide.

¹²Ti ǀons tawa du ge gāxaǃnâse nū tide, tsî ǁnāti sa Elob ǀonsa ǂgaiǀhuru tide, Tita ge ǃKhūta.

¹³Sa ǀgūkhoebats ge ǁgâiǀā tsî ǁîb di-e ǃkhōǀhana bi tide. Tsēs ai go ǃgaehes di sîsenamǃnâs ge nau ǁgoas kōse sa tawa mâ tide.

¹⁴ǂGanaǂgae hâbats ge ǀâxare tide, tsîts ge ǂgī khoeba ǃnôa-e dība tide, sa Elobats nî ǃao xui-ao. Tita ge ǃKhūta.

¹⁵ǀGoraǃgâs ǃnâ du ge ǂhanuoǃnâse sîsen tide, ǀgâsaba huis kas, ǀgapi khoeba kōs kas hoas ǀkha. Xawets ge ǂhanuse sa ǀgūkhoeb di ǁhōba nîra sîsenǂam.

¹⁶ǀGūkhoeba ra ǂgā-amsets ge sa ǁaes ǃnâ hâma tide; sa ǀgūkhoeb ǀaobats ge ǁkhāti ôa tide. Tita ge ǃKhūta.

¹⁷Sa ǃgâsabats ge sa ǂgaob ǃnâ ǁkhan tide, xawets ge sa ǀgūkhoeba nîra ǂgōǀau, îts ǁîb ǃaroma tā ǀhapixa

¹⁸Sa ǁaes ôanats ge ǀkhaoǂgaoxasib tsî ǁaixasiba ūhâba tide. Sa ǀgūkhoebats ge sats ǁkhāts khami nî ǀnam. Tita ge ǃKhūta.

¹⁹Ti ǂnûiǂgāde du ge nîra ǃkhōǀgara, îts tā sa ûitsama xū-e ǀkhara ǃnôa-i ǀkha habagu kai. ǁKhātits ge ǃhanab âtsa ǃkharaga ǃkhomǃnôana tsoroǃnâ tide; tsî sa soros ai i ge ǃapi-i tsî ǀkhara ǃkhaiǃnôan tsîn ǀkha dīhe hâ sara-e hā tide.

²⁰Aore khoeb ga sorosi ǀhûhâsi-e tarare khoes ǀkha dīo, khobose hâs tsî ǀnî khoebas mûǂuibahe hâ xawe ǁamaǂuihe tamas, tsî ǃnora kaihe tama hâsao, os ge ǁkharahesa nî hâ; xawe ǃgamhe ǁoa khoera ge, ǃnora kaihe tamas hâ xui-ao.

²¹Tsîb ge ǁîba ǀhapiǁguibasa ǃKhūb tawa nî sī-ū, ǀhûs tentommi di dao-ams tawa, ǀgui bairaba, ǀhapiǁguibas ase;

²²tsîb ge pristera ǀhapiǁguibas di bairab ǀkha ǁîb ǂkhîbagukaihesa ǃKhūb ais aiǃâ nî sîsen, dīb hâ ǁoreb ǃaroma; ob ge dīb hâ ǁoreb di ǀûbasa nî hō.

²³ǃHūb ǃnâ ǂgâ tsî du ga ǂûtani ra haiǃnôadi hoadi xa ǂgāo, o du ge ǁîdi di ǂûna aikhōb ra dīhe khami nîra dī-ū; ǃnona kurigu kōse du ge ǃgaohe tama xūse ǁîde nî kō, ǁîdi xa du ǂû ǁoase;

²⁴xawe hakaǁî kurib ǃnân ge ǁîdi di ǂûna nîra ǃanu, kareǁguibas ǃKhūb dis ase.

²⁵Tsî koroǁî kurib ǃnâ du ge ǁîdi di ǂûn xa a ǂû ǁkhā; nē ǀgaus ai du ge ǀkhī-ūs âde nîra ǂguiǂguibasen. Tita ge ǃKhūta, sadu Elota.

²⁶ǀAob ǀkha du ge xū-e ǂû tide; tsî aimûǀgaru-aon tsî xoma-aon ǀkha du ge ǁaeǁaesen tide.

²⁷Danaǀûna du ge ǃgupuse ǂkhom tide, î go ǁkhāti ǀhō-amma tā taotaosase ǂkhomǁnâ.

²⁸ǁKhāti du ge ǁō hâ-i ǃaroma ǁgarasen tide, î du ǁkhāti khōb âdu ai tā īsiǃnôana ǃkhāǂgā! Tita ge ǃKhūta.

²⁹Sa ôasa tā ǂnaoǂnao, ǀaib daogu ǃoa māǂui sis ǀkha, îb tā ǃhūba ǀaiǁoreb tsî taotaosa dīgu xa ǀoa.

³⁰Ti sâtsēde du ge nî ǃkhōǀgara, î du ti ǃanusiba ǃaoǃgâxasi-e ūhâba. Tita ge ǃKhūta.

³¹Tā ǁō hân di gagadi tsî aimûǀgarugagadi tawa sī re! ǁÎ xūna tā ôa re, î du tā ǁnās ǀkha ǃanuoǃnâ kaihe. Tita ge ǃKhūta, sadu Elota.

³²ǀHai ǀûn â-i-i aiǃâts ge nîra khâi, tsîts ge kaikhoe-e nîra ǃgôa, sa Elobats nî ǃaoǃgâ xui-ao; tita ge ǃKhūta.

³³Tsî ǃhaokhoe-i ga sats tawa sadu ǃhūb ǃnâ hâ hâo, ots ge ǁî-e ǁgâiǀā tide.

³⁴Sadu tawa ra hâ ǃhaokhoe-i ge ǃhūb di-i, sadu tawa hâ-i ase nî ī, tsîts ge sats ǂûts khami nî ǀnam i, Egipteǃhūb ǃnâ du sado ge ǃhaokhoe i xui-ao. Tita ge ǃKhūta, sadu Elota.

³⁵Tā ǂhanuoǃnâse sîsen, ǂhanuǂhanus tawas kas, ǀnōs tawas kas, ǀnōǁnâs tawas kas, ǀnōǂuis tawas kas hoasa.

³⁶ǂHanu ǀnōxū-ets ge nî ūhâ, ǂhanu ǀnō-ūǀuin, ǂhanu ǀnōǁgoab, ǂhanu ǀnōǀgabis tsîn hoana. Tita ge ǃKhūta, sadu Elota, Egipteǃhūba xu ge ǂgaeǂguiǂui du ta xui-ao.

³⁷ǁNā-amaga du ge ti ǂnûiǂgādi tsî ti mîmādi hoade ǃkhōǀgara tsî nî ǁîdi ǃoa dī. Tita ge ǃKhūta.