Read Khoekhoegowab Levitikus 2 Bible Online

Levitikus 2 - Khoekhoegowab bible

Levitikus 2

¹Tsî khoe-i ga ǃKhūba ǂûǁguiba-e ǁguiba ǂgao-o, o i ge tsampere-i xa nî ǁguiba; tsî i ge oliba nî ǂnâ-ai tsî ǃgâihamxūb wiroka nî dī-ai.

²Tsî i ge ǁîsa pristergu, Aronni ôagu tawa nî sī-ū; ob ge ǀguib âga ǃommi ǀoaba nî ū tsampereb xa, tsî olib xa, wiroki hoab ǀkha; ob ge pristera ǁî-i di ǂâiǂâisenǁguibasa nî ǂhubi altars ai; ǀaeǁguibas ge a ǁî, ǀnamǀnamsa ǁamab ǃKhūb dib dis ase.

³Tsî ǂûǁguibas xa ga ǃgau-i, ǁî-i ge Aronni tsî ǁîb ôagu di nî-e; ǃanusin di ǃanuse i ge nî ī ǃKhūb di ǀaeǁguibadi ǃnâ.

⁴Tsî ǂûǁguibas di ǁguiba-ets ga ǁguibao ǁganoms di ǁganpere-i xa, on ge nî ǀkhuruǀkhuruhe tama ampere tsampereb xa, olib ǀkha ǂnâ-aihe hâb tsî nî ǀkhuruǀkhuruhe tama ǁganpere, olib ǀkha ǂkhauhe hâba.

⁵Tsî ǁguibas âts ga ǂûǁguiba io, amaiǃores ǃnâ amhe hâsa, os ge nî tsampere, ǀkhuruǀkhuruhe tama, olib ǀkha ǂnâ-aihe hâse.

⁶Khôaǃā si, îts oli-e ǂnâ-ai, ǂûǁguibas a xuige.

⁷Tsî sa ǁguibas ga ketels di ǁguiba io, as dīhe ǀkhuruǀkhuruhe tama tsampereb xa, olib ǀkha ǂnâ-aihe hâse.

⁸ǃNubaits ge ǁnā ǂûǁguibas nē xūn ǀkha dīhe hâsa ǃKhūba nî ūsība; tsîts ge ǁîsa pristera nî ūsība, îb ǁîba altars tawa ǁîsa ūsī.

⁹Îb pristera ǁnā ǂûǁguibas xa ǂâiǂâisenǁguibasa ūǁnâ, îb ǁîsa altars ai ǂhubi, ǀaeǁguibas ǀnamǀnamsa ǁamab ǃKhūb dib dis ase.

¹⁰Tsî ǂûǁguibas xa ga ǃgau-i hoa-i, ǁî-i ge Aronni tsî ǁîb ôagu di nî-e; ǁî-i ge a ǃanusin di ǃanusi ǃKhūb di ǀaeǁguibadi ǃnâ.

¹¹ǂÛǁguiba-i ǃKhūbats ga ǁguiba-i xare-i ge ǀkhuruǀkhurupereb ǀkha ǀkhuruǀkhuruhe tide; ǀkhuruǀkhurupereb xas kas, danib xas kas, ge ǃKhūba ǀaeǁguiba-e ǂhubiba tide.

¹²ǁGuibadi ǂgurosaben didets ge ǃKhūba nî ǁguiba; xawe altars ai di ge sī tide, ǀnamǀnamsa ǁamab ase.

¹³Tsî mâ ǁguibas sa ǂûǁguibas dis hoasats ge ǂō-i ǀkha nî ǂōǂgā, tsîts ge ǂō-i ǁnā ǃgaeǀhaos sa Elob dis di-e ǂûǁguibas tawa tôasi kai tide; sa ǁguibadi hoadi ǀkhats ge ǂō-e nî ǁguiba.

¹⁴Tsî ǂûǁguiba-i, sa ǂguro ǂûn di-ets ga ǃKhūba ǁguibao, ots ge ǂûǁguibas, sa ǂguro ǂûn disa ǃam ǃnurugu hîa ǀaes tawa ǂnâǂnâhe hâgu, ǂkhūǂkhūhe hâ ǃhorodan, ǀoa hâ ǃam ǃnurugu din xa nî ǁguiba.

¹⁵Tsîts ge oliba nî dī-ai tsî wiroka nî ǁgui-ai; ǁîs ge a ǂûǁguiba.

¹⁶Nētib ge pristera nē ǂâiǂâisenǁguibas, ǂkhūǂkhūhe hâ ǃhorodan âs dis tsî olib âs disa nî ǂhubi, wiroki hoab tsîn ǀkha; ǁîs ge a ǃKhūb di ǀaeǁguiba.