Read Khoekhoegowab Levitikus 20 Bible Online

Levitikus 20 - Khoekhoegowab bible

Levitikus 20

¹ǃAruǀîb ge ǃKhūba Moseb ǃoa ge mî:

²Nētits ge ǁkhāti Israeli ôana nî mîba: Mâ-i hoa-i, Israelǁîn kas, Israels ǃnâ ra hâ ǃhaokhoen kas hoas di-i, Moloxa ǁî-i ôa-e ga mā-i ge ǂanǂansase nî ǃgamhe.

³Tsî ta ge tita ti aisa ǁnā khoeb ǃoagu dī tsî ǁîb ǁaesa xu nî ǃhomǂui bi, ti ǃanusiba ǂnaoǂnao tsîb ti ǃanu ǀonsa nî ǃanuoǃnâ kaiseb ǁîb ôan xa Moloxa go māǁnâ xui-ao.

⁴Tsî ǃhūb di ǁaes ga ǁnā khoeba ǀgôa-i âbab Moloxa go mā ǃkhaisa mû tama i tsî ǃgam bi tama io,

⁵o ta ge tita ti aisa ǁnā khoeb tsî omarin âb tsîn ǃoagu nî dī, tsî ta ge ǁîb tsî ǁîb ǂaidi ǃnâ Moloxi ǀkha ǀaiǁoreba ra dīna ǁaesa xu nî ǃhomǂui.

⁶Tsî ǀgui ǀoms ga aimûǀgaru-aon tsî xoma-aon ǃoa ǂnan ǁîna sao tsîo, o ta ge ti aisa ǁnā ǀoms ǃoagu dī tsî ǁîsa ǁîs ǁaesa xu nî ǃhomǂui.

⁷ǁNā-amaga ǃanuǃanusen, î du ǃanu. Tita ge ǃKhūta, sadu di Elota.

⁸Ti ǂnûiǂgāde ǃkhōǀgaipe, î du ǁîde dī; tita ge ǃKhūta, sado ra ǃanuǃanu ta.

⁹Khoe-i hîa ǁgûb tsî ǁgûs tsîra ga ǀâxare-i, ǁî-i ge ǂanǂansase nî ǃgamhe; ǁgûb tsî ǁgûs tsîra i go ǀâxare; ǁî-i di ǀaoba ab ǁî-i ai hâ!

¹⁰Tsî ǁnā khoeb, naub di taras ǀkha ga ǃgamekhôab, ǁîb ǀgūkhoeb di taras ǀkhab ge ǃgamekhôa amagab ge ǂanǂansase nî ǃgamhe, ǃgamekhôa-aob tsî ǃgamekhôa-aos tsîra.

¹¹Tsî ǁnā khoeb, ǁgûb di taras tawa ga ǁgoeb, ǁîb ge ǁgûb di taotaosa ǃkhaisa ge khowa-ai; ǁîǀgamra ge ǂanǂansase nî ǃgamhe; ǁîra di ǀaoba ab ǁîra ai hâ!

¹²ǁNās ǁkhās xase khoeb ga ǁîb ôab di taras tawa ǁgoe, ǁîra ge ǂanǂansase nî ǃgamhe; ǁgaisi dīǃkhaisa ra ge dī; ǁîra di ǀaoba ab ǁîra ai hâ!

¹³Tsî khoeb ga aore khoeb ǀkha ǁgoeo, taras ǀkhats ra ǁgoe khami, ǁî ǀgamkha ge ǁgaisi dīsa ge dī, ǁîkha ge ǂanǂansase nî ǃgamhe; ǁîkha di ǀaoba ab ǁîkha ai hâ!

¹⁴Tsî khoeb ga taras tsî ǁîs di îs tsîra ūo, taotaosa dīǃkhais ge a ǁî; on ge ǁîb tsî ǁîs tsîra ǀaes ǀkha nî khauǃkhū, îs taotaosa dīǃkhaisa tā sadu ǁaegu hâ.

¹⁵ǁNās xōǀkhā, khoeb ga ǀgoa-i ǀkha ǁgoeo, ǁîb ge ǂanǂansase nî ǃgamhe; tsî du ge ǁnā ǀgoa-e ǁkhāti nî ǃgam.

¹⁶ǁNās ǁkhās xase taras ga ǀgoa-e ǀgūo, ǁî-es nî dī-ūse, o du ge ǁnā taras tsî ǁnā ǀgoa-i tsîna nî ǃgam; ǁîra ge ǂanǂansase nî ǃgamhe. ǁÎra di ǀaoba ab ǁîra ai hâ!

¹⁷Tsî khoeb ga ǁîb di ǃgâsas, ǁgûb ôas kas, ǁgûs ôas kas hoasa ū tsî ǁîs di taotaosa ǃkhaisa kō-o tsî ǁîs ga ǁîb di taotaosa ǃkhaisa kō-o ǁgaisi dīs ge a ǁî; ǁnā-amaga ra ge ǁîra ǁaes di mûǁae nî ǃhomǂuihe; ǁîb ǃgâsas di taotaosa ǃkhaisab ge khowa-ai amagab ge ǁîb di ǂhanuoǃnâsiba nî tani.

¹⁸Tsî khoeb ga taras, ǀaesenni âsa ūhâs ǀkha ǁgoeo tsî taotaosa ǃkhais âsa khowa-ai tsî ǀaus âsa ǀkhaiǀkhā kaio, tsî ǁîs ǂûs ga ǀaus ǀaob âs disa hōǂuio, o ra ge hoara ǁaes âra ǁaeguba xu nî ǃhomǂuihe.

¹⁹Tsî taotaosaǃkhais saos di ǃgâsas dis kas, saob di ǃgâsas dis kas hoasats ge ǀkhaiǀkhā kai tide. ǁÎb ge ǀaokhoes âsa go ǀkhaiǀkhā kai amaga ra ge ǁîra di ǂhanuoǃnâsiba nî tani.

²⁰Tsî khoeb ga ǁîb di ǁnaos ǀkha ǁgoeo, ǁîb ge ǁnaosab âb di taotaosa ǃkhaisa ge ǀkhaiǀkhā kai; ǁîra ge ǁîra di ǁoreba nî tani. ǀGôan ose ra ge nî ǁō.

²¹Tsî khoeb ga ǁîb ǃgâsab di tarasa ūo, ǁî-i ge a ǃanuoǃnâsi. ǃGâsab âb di taotaosaǃkhaisab ge ǀkhaiǀkhā kai; ǀgôan ose ra nî hâ.

²²ǃKhōǀgaipe ǁnâi ti ǂnûiǂgādi hoade tsî ti ǂhanugu hoaga, î du ǁîna dī; îb ǁnā ǃhūb, ǁîb ǃnâ ta nî ūsī duba tā ǂaraǂui du.

²³Î du tā tanisen ǁnā ǁaes, sadu ais aiǃâba xu ta nî aoǂuis di ǂnûiǂgādi ǃoa. Nēn hoanan ge ǁîna ge dī; ǁnā-amaga ta ge tita ǁîna ge ǃharaxū.

²⁴Tsî tita ge sadu ǃoa ge mî: Sadu ge ǁîn di ǃhūba ǀumise nî ūhâ, tsî tita ge ǁîba sado nî mā, ǀumise du ǁîba nî ūhâga, ǃhūb daib tsî danib tsîkha ra dâuǃnâba. Tita ge ǃKhūta, sadu di Elota, ǁaede xu ge khai du ta.

²⁵ǁNā-amaga du ge ǀgorasa nî dī ǃanu tsî ǃanuoǃnâ ǀgoan ǁaegu, tsî ǃanuoǃnâ tsî ǃanu anin ǁaegu; tsî du ge sadu di ǀomde ǁgaidī kai tide, ǀgoan tawas kas, anin tawas kas tsî ǁnān, ǃhūb ai ra ǂhanan, sado ta ge khaiban hoan tawas kas hoasa, ǃanuoǃnâse du ǁîna nî ūhâse.

²⁶Tsî sadu ge tita nî ǃanuba, tita ǃKhūta a ǃanu xui-ao; tsî tita ge sado ǁaede xu ge khaibasen, ti du nîga.

²⁷Tsî khoeb kas, khoes kas ga ǃgai-aosi gaga-e ūhâo, ǁgâuaǁkhāsabe-i kao, ǁîra ge ǂanǂansase nîra ǃgamhe; ǁîra ge nî ǀuiǁhomhe. Ab ǀaob âra ǁîra ai hâ.