Read Khoekhoegowab Levitikus 21 Bible Online

Levitikus 21 - Khoekhoegowab bible

Levitikus 21

¹ǁNās khaoǃgâb ge ǃKhūba Moseb ǃoa ge mî: ǃHoa re pristergu, Aronni ôagu ǃoa îts mî ǁîgu ǃoa: ǁŌ hâ-i ǂamab ge pristera ǀuriǀurisen tide ǁîb di ǁaedi ǃnâ.

²ǁÎb di ǀaokhoe-i hîa ǀgūse ība bi-i ǀgui-i ǂama, ǁîb di îs ǂama tsî ǁîb di îb ǂama, tsî ǁîb di ôab ǂama tsî ǁîb di ôas ǂama, tsî ǁîb di ǃgâsab ǂama,

³tsî ǁîb di ǃgâsas hîa ǂkhamkhoes, ǁîb ǀgūse hâs hîa ganupe aob di kai tamas ǂama, ǁîs ǂamab ge nî ǀuriǀurisen.

⁴ǁÎb ge ǀuriǀurisen tide ǃgame-aob ase, ǁîb di khoen ǃnâ tsî ǃanuoǃnâkaisen nîse.

⁵ǁÎgu ge ǁkhāti ǀgoraǃkhai-e dībasen tide danadi âgu ai, tsî ǀhaub âgu di ǀûǀamde ǂkhom tide, tsî ǁîgu di ǁgans ǃnâ gu ge ǀgorega ǃgaoǂgā tide.

⁶ǁÎgu ge ǁîgu di Eloba nî ǃanuba, tsî ǀons ǁîgu di Elob disa gu ge ǀuriǀuri tide, ǃKhūb di ǀaeǁguibade gu ra ǁguiba, ǁîgu Elob di ǂûna xui-ao; ǁnā-amaga gu ge nî ǃanu.

⁷ǁÎgu ge taras hîa ǀai-aos, ǀuriǀurihe hâsa ū tide tsî ǁkhāti tarasa ū tide, aob âs xa ǂhāxuhe hâsa; ǁîb ge ǁîb di Eloba a ǃanuba xui-ao.

⁸ǁNā-amagats ge ǁîba nî khai, sa Elob di ǂûnab ra ǁguiba xui-ao; ǁîb ge satsa ǃanuse nî ība, tita a ǃanu xui-ao. Tita ge ǃKhūta, sado ra ǃanuǃanu ta.

⁹Pristeri di ôas ga ǀaitsoatsoa os ge ǁgûba ra ǀuriǀuri; ǁîs ge ǀaes ǀkha nî khauǃkhūhe.

¹⁰Tsî ǁnāb, ǀgapipristerse ǃgâsagu âb ǃnâ īb, ǁîb di danas aib ǂkhau-oliba ǂnâǂuihe hâb ǃommi âb ǀoaǀoahe hâb, ǁnā saranab nî anase, ǁîb ge danas âba ǀkhaiǀkhā kai tide tsî ǁkhāti saran âba ǀkhau tide.

¹¹ǁÎb ge ǁkhāti ǁō hâ sorodi tawa sī tide; tsî ǁgûb tsî ǁgûs tsîra ga xaweb ge ǀuriǀurisen tide.

¹²Tsî ǃanusiba xub ge ǂoa tide, îb ǃanusib ǁîb Elob diba tā ǀuriǀuri; khais ǁîb Elob di ǂkhau-olib dis ge ǁîb ai hâ xui-ao: Tita ge ǃKhūta.

¹³Tsîb ge ǂkhamkhoesa tarase nî ū.

¹⁴ǃOataras kas, ǂhāxuhe hâs kas, ǀuriǀurihe hâs kas, ǀai-aos kas, ǁîsab ge ū tide; xawe ǂkhamkhoes ǁîb ǁaedi dis, ǁîsab ge tarase nî ū.

¹⁵Tsîb ge ǃkhommi âba ǁîb di ǁaedi ǁaegu ǀuriǀuri tide: Tita ge ǃKhūta, ǁîba ra ǃanuǃanu ta.

¹⁶ǃAruǀîb ge ǃKhūba Moseb ǃoa ge mî:

¹⁷ǃHoa re Aronni ǀkha îts mî: Khoeb xareb sa ǃkhommi dib, ǁîb di ǃhaodi ǃnâ, ǂkhôa-i ǁîb ǃnâ hâb, ǁîb ge ǀgū tide, ǂûn ǁîb Elob dinab nî ǁguibaga.

¹⁸Khoeb xareb, ǂkhôa-i ǁîb ǃnâ hâb ge ǀgū tide, ǂgī khoeb kao, ǃhorab kao, ūsa ais â-ib kao, gaxu uniǁaes â-ib kao,

¹⁹khoeb khôa hâ ǂais â-ib kao, khôa hâ ǃommi â-ib kao,

²⁰ǁkhapuxaǃgâb kao, kaigâreb kao, ǃuruxamûb kao, ǂnâsa ǀgorosa â-ib kao, ūxa ǀgoros â-ib kao, aorekhoesib âb tawa ǂkhôahe hâb kao.

²¹Khoeb xareb, Aronni ǃkhommi dib, pristeri ǂkhôa-i ǁîb ǃnâ hâb ge dāǀgū tide, ǃKhūb di ǀaeǁguibade nî ǁguibase; ǂkhôa-i ǁîb ǃnâ hâ, ǁîb ge dāǀgū tide, ǁîb Elob di ǂûnab nî ǁguibase.

²²ǂÛn ǁîb Elob din, hoan ǃgâ-ai ǃanu xūn din tsî ǃanu xūn din, ǁînab ge a ǂû ǁkhā;

²³xawe ǂgāmâisab tawab ge sī tide, tsî altarsa dāǀgū tide, ǂkhôa-i ǁîb ǃnâ hâ amaga, îb ti ǃanusiga tā ǀuriǀuri; tita ge ǃKhūta, ǁîga ra khai ta.

²⁴Tsî Moseb ge nēna Aronni ǃoa tsî ǁîb di ôagu tsî Israeli ôan hoan ǃoa ge ǃhoa.