Read Khoekhoegowab Levitikus 22 Bible Online

Levitikus 22 - Khoekhoegowab bible

Levitikus 22

¹ǁNās khaoǃgâb ge ǃKhūba Moseb ǃoa ge mî:

²ǃHoa re Aronni tsî ǁîb di ôagu ǃoa, î gu ǁnā ǃanu xūn, Israeli ôan din, titan ra khaibana xu ǁkhaeǁnâsen, î gu ǀons ti ǃanusib disa tā ǀuriǀuri: Tita ge ǃKhūta.

³Mî ǁîgu ǃoa: Mâ khoeb hoab sago ǃhaodi dib, sago ǃkhommi hoaba xu ǁnā ǃanu xūn, Israeli ôan ra ǃKhūba khaibana ga ǀgūb, ǀurisasib âb ǁîb ai hâ hîa, ǁnā khoeb ge ti ais aiǃâba xu nî ǃhomǂuihe: Tita ge ǃKhūta.

⁴Khoeb xareb, Aronni ǃkhommi dib, ǃomamaxab kao, ǂnâ-eb ga ūhâo, ǁîb ge ǁnā xūn xa ǂû tide, ǃanub nîs kōse; tsî xū-i, ǁō hâ soro-i xas kas, khoe-i ǁî-e xub ǁgoeǀkhās di ǃkhomma ra ǂoa-i xas kasa ga tsâǀkhāb hoab on ge ǂû tide.

⁵Tsî ǂhanabe-e ga tsâǀkhāb, ǁî-i xab a ǀurisa-i tsî khoe-i, ǁî-i xab a ǀurisa-e, ǁî-i di ǀurisasib hoab ǃoa,

⁶ǁnā khoeb, nēna ga tsâǀkhāb ge nî ǃanuoǃnâ, ǃuis kōse tsîb ge ǁnā ǃanu xūn xa ǂû tide, tsîb ge ǁgans âba ǁgam-i ǀkha nî khō.

⁷Sores ga ǂgâ ǃnubaib ge nî ǃanu; tsî ǁnās khaoǃgâb ge ǁnā ǃanu xūn xa nî ǂû, ǁîn a ǁîb di ǂû xui-ao.

⁸ǁŌ hâ soros tsî ǀkhauǃāhe hâ xū-eb ge ǂû tide, ǁî-i ǀkha nî ǃanuoǃnâse: Tita ge ǃKhūta.

⁹Tsî gu ge ti mîmāsa nî ǃkhōǀgaipe, î gu ǁîs ǂama ǁoreba tā tani, î gu ǁîb ǃnâ tā ǁō, ǁîsa gu ga ǀuriǀurio: Tita ge ǃKhūta, ǁîga ra ǃanuǃanu ta.

¹⁰Tsî ǃhaokhoe-i on ge ǃanu-i xa ǂû tide; tsî pristeri tawa ǁan hâ-i tsî ǃgaesa-i tsîn ge ǃanu-i xa ǂû tide.

¹¹Xawe pristeri ga ǀomsa ǁama ǁîb di marin ama, ǁîs ge ǁî-i xa nî ǂû; tsî ǁîb ommi ǃnâ ǃnae hân; ǁîn ge ǁîb di ǂûn xa nî ǂû.

¹²Xawe pristeri ôas ga ǃhao-aob di kaio, ǁîs ge ǁguibas ǃanu xūn dis xa ǂû tide.

¹³Tsî pristeri ôas ga ǃoatara io, ǂhāxūhes ga hâ tsî ǃkhomma ūhâ tama io, tsî ǁgûb di ommi ǃoas ga ǂkhamsis âs ǃnâs xase oahā hâ io, os ge ǂûn ǁgûb din xa nî ǂû; xawe ǃhaokhoe-i xare-i ge ǁîn xa ǂû tide.

¹⁴Tsî khoe-i ga dīsā rase ǃanuba ǂûo, o i ge koroǁî ǃâs âba dīǀaro tsî nî ǁîsa pristera ǃanub ǀkha mādawa.

¹⁵Nēti gu ge pristerga ǃanu xūn Israeli ôan dina ǀuriǀuri tide, ǃKhūban nî māna,

¹⁶î gu tā ǀhapis di ǂhanuoǃnâsiba tani, ǁîn di ǃanu xūna gu ga ǂûo: Tita ge ǃKhūta, ǁîga ra ǃanuǃanu ta.

¹⁷ǃAruǀîb ge ǃKhūba Moseb ǃoa ge mî:

¹⁸ǃHoa re Aronni tsî ǁîb di ôagu tsî Israeli ôan hoan ǃoa îts ǁîna mîba: Khoe-i Israeli ommi di-i kas, Israeli ǃnâ hâ ǃhaokhoe-i kas, ǁî-i di ǁguibasa ga ǁîn di mîmâidi hoadi ǃoa ǁguiba-i, tsî ǁîn di māsenxa ǁguibadi hoadi ǃoa, ǃKhūban nî khauǁguibase ǁguibade,

¹⁹ǃgâiba tsi i ka khami ǁguiba, ūo aorerob, goman xas kao, ǁkhaon xas kao, pirin xas kao;

²⁰xū-i, ǁî-i ǃnâ ǂkhôa-e hâ-e du ge ǁguiba tide, ǃgâibahe du tide amaga.

²¹Tsî khoe-i ga ganganǁguiba-e ǃKhūba ǁguibao, mîmâi-e i nî khaiga, māsenxa ǁguibase i nî ǁguibaga, goman xas kao, gūn xas kao, o i ge ūose nî ī, ǃgâi i nîga; ǂkhôa-i xare-i ge ǁî-i ǃnâ hâ tide.

²²ǂGī hâ-i kas, khôahe hâ-i kas, ǃhomǃhomhe hâ-i kas, ǀharaxa-i kas, ǂnâsa ǀgoros â-i-i kas, ūxa ǀgoros â-i kas hoasats ge ǃKhūba ǁguiba tide, tsî ǁîn xats ge ǃKhūba altars ai ǀaeǁguiba-e mā tide.

²³Xawe goma-i kas, ǀgoa-i kas, gaxu uniǁaedi â-i-i kas, ǃnubu uniǁaedi â-i-i kas hoasa du ge māsenxa ǁguibase nî ǁāǁā; xawe mîmâisa i ge ǃgâiba tide.

²⁴ǀGoa-i ǁgâihe hâ-i kas, ǃkhāhe hâ-i kas, ǀkhauǃāhe hâ-i kas, ǃgaohe hâ-i kas hoasa du ge ǃKhūba ǁguiba tide. ǁÎ ǃkhaisa du ge dī tide sadu di ǃhūb ǃnâ.

²⁵Tsî du ge ǁkhāti ǃhaokhoe-i di ǃomǁaeba xu nē xūn hoan xa sadu Eloba ǂû-i xare-e ǁguiba tide; ǁîn di ǁgaoǁgaosib ge ǁîn ǃnâ hâ, ǂkhôa-i ge ǁîn ǃnâ hâ, ǁîn ge ǃgâiba tsi tide.

²⁶ǃAruǀîb ge ǃKhūba Moseb ǃoa ge mî:

²⁷Gomab kas, ǁkhaob kas, pirib kas hoas ga ǃnae o i ge hû tsēdi kōse ǁgûs ǃnaga nî hâ, ǁkhaisaǁî tsēs kōse, tsî ǁnās khaoǃgâ i ge ǁguibase ǃKhūb di ǀaeǁguibade nî ǃgâiba.

²⁸Tsî du ge ǁkhāti goman xas kas, ǀgoa-i xas kas hoasa ǁî-i tsî ǁî-i di ǂkhamro-i tsîna ǀgui tsēs ǀguis ai ǂā tide.

²⁹Tsî koaǁguiba-e du ga ǃKhūba ǂābao, sadu ǂâis ǃoa du ge ǁî-e nî ǂā.

³⁰ǁNā tsēs ǁkhās ai i ge nî ǂûhe; xū-e du ge ǃgau tide ǁgoas kōse: Tita ge ǃKhūta.

³¹ǁNā-amaga du ge ti mîmāde ǃkhōǀgaipe tsî ǁîde nî dī: Tita ge ǃKhūta.

³²Tsî du ge ti ǃanu ǀonsa ǀuriǀuri tide, î ta tita Israeli ôan ǁaegu khaihe: Tita ge ǃKhūta, sado ra khai ta,

³³Egipteǃhūba xu ge ǂgaeǂguiǂui du ta, Elose ta nî sado ībaga: Tita ge ǃKhūta.