Read Khoekhoegowab Levitikus 23 Bible Online

Levitikus 23 - Khoekhoegowab bible

Levitikus 23

¹ǁNās khaoǃgâb ge ǃKhūba Moseb ǃoa ge mî:

²ǃHoa re Israeli ôan ǀkha îts ǁîna mîba: ǂNûihe hâ kai ǁaegu ǃKhūb digu sadu nî ǂgaiǂuigu, ǁîgu ge ǃanu ǂgaiǀhûǁaese nî ī, ǁîgu ge ti kai ǁaega.

³ǃNani tsēdets ge sîsenna nî dī, xawe hûǁî tsēs ge a sâtsē, ǃanu ǂgaiǀhûtsē; ǁîs aits ge sîsen-i xare-e dī tide: ǃKhūb di sâtsēs ge a ǁî sadu di ǁanǃkhaidi hoadi ǃnâ.

⁴Nēgu ge ǂnûihe hâ kai ǁaegu ǃKhūb digu, ǃanu ǂgaiǀhûǁaegu, sadu nî ǂgaiǂuiga, ǂnûihe hâ ǁaeb âgu ai:

⁵ǂGuro ǁkhâb ǃnâ, disihakaǀaǁî tsēs ǁkhâb dis ais ge ǃKhūb di Pasxaba ǀgam ǃuira ǁaegu hâ.

⁶Tsî disikoroǀaǁî tsēs ǁnā ǁkhâb dis ge a ǀkhuruoǃnâ peregu ǃKhūb digu di tsē, hû tsēdi kōse du ge ǀkhuruoǃnâ pereba nî ǂû.

⁷ǂGuro tsēs ai du ge ǃanu ǂgaiǀhû-e nî ūhâ; sîsen-i xare-e du ge dī tide.

⁸Tsî du ge hû tsēde ǃKhūba ǀaeǁguibade nî ǁguiba; hûǁî tsēs ais ge ǃanu ǂgaiǀhaosa nî hâ; sîsen-i xare-e du ge dī tide.

⁹Tsî ǃKhūb ge Moseb ǃoa ge mî:

¹⁰ǃHoa re Israeli ôan ǃoa îts ǁîna mîba: ǁNā ǃhūb, tita sado nî māb ǃnâ sī tsî du ga ǁîb di ǃgaosa ǃgaobaseno, o du ge ǀgui ǃgaeǀkhādas ǂgurosaben disa ǃgaos âdu xa pristeri tawa nî ūsī.

¹¹Ob ge ǁnā ǃgaeǀkhādasa ǃKhūb aiǃâ nî gongon, ǃgâibahe du nîga; sao ra tsē, sâtsēs khaoǃgâb ge pristera ǁîsa nî gongon.

¹²Tsî du ge ǁkhāti ǁnā tsēs, ǁîs ai du ge ǁnā ǃgaeǀkhādasa gongons ai ūo ǁkhaob ǀgui kurixaba khauǁguibase ǃKhūba nî ǁāǁāba;

¹³tsî ǁîb di ǂûǁguibase ǀgam disiǁî ǃâra tsampereb xa olib ǀkha ǂnâ-aihe hâba ǀaeǁguibas ǃoa, ǃKhūb di ǀnamǀnamsa ǁamab ase; tsî ǁîb di ǂnâǁguibase ǂauxûib xa hakaǁîǃâs hinni disa.

¹⁴Tsî du ge pereb xareb kas, ǁnaruǀkhāhe hâ ǃhorodan kas, ǃam ǃnurugu kas hoasa ǂû tide ǁnā tsēs, sadu Elob di ǁguibasa du nî ǁguibas kōse; ǀamo ǂnûiǂgās ge nēsa sadu ǃhaodi hoadi dis tawa sadu di ǁanǃkhaidi hoadi ǃnâ.

¹⁵ǁNās khaoǃgâ du ge nî ǃgôabasen sao ra tsēs, sâtsēs khaoǃgâb disa xu, ǁnā tsēs, gongonǁguibas di ǃgaeǀkhādasa du ge ūhāsa xu; hû ǀoa hâ sâtsēdi ge nî.

¹⁶Nau tsēs kōse hûǁî sâtsēs khaoǃgâ du ge korodisi tsēde nî ǃgôa; ǃnubai du ge ǀasa ǂûǁguiba-e ǃKhūba nî ǁguiba.

¹⁷Sadu ge sadu di ǁanǃkhai-e xu ǀgam gongonperekha nî ūǀkhī, ǁîkha ge ǀgam disiǁî ǃâra tsampereb xa nî i, ǀkhuruǀkhuruhe hâse kha nî ǁganhe; ǃKhūb di ǂgurosabekha ge a ǁî.

¹⁸Tsî du ge ǁkhāti pereb ǀkha hû ūo, ǀgui kurixa ǁkhaogu tsî ǂkham ǁgōb tsî ǀgam bairakha tsîna nî ǁguiba; ǁîn ge ǃKhūba khauǁguibase nî ība, ǁîn di ǂûǁguibas tsî ǁîn di ǂnâǁguibadi ǀkha, ǀaeǁguibasa, ǀnamǀnamsa ǁamab ǃKhūb dib ase.

¹⁹ǁKhāti du ge piriba ǁoreǁguibase tsî ǀgam, ǀgui kurixa ǁkhaokha ganganǁguibase nî ǁāǁā.

²⁰ǁGoasib ge pristera ǁîna ǂgurosaben di pereb ǀkha gongonǁguibase ǃKhūb di ais aiǃâ ǀgam ǁkhaokha ǀkha nî gongon. ǁÎn ge ǃKhūba ǃanu xūse nî ība, pristeri ǂama.

²¹Tsî du ge ǁnā tsēs ǁkhās ai nî ǂgaiǂui, ǃanu ǂgaiǀhûsa du nî ūhâ ǃkhaisa; sîsen-i xare-e du ge dī tide; ǀamo ǂnûiǂgās ge a ǁî sadu di ǁanǃkhaidi hoadi ǃnâ, sadu di ǃhaodi tawa.

²²Tsî ǃhūb di ǃgaosa du ga ǀhaoǀhaobaseno, o du ge ǀhaoǀhaobasens âdu ǃnâ ǃhanab di ǁhôasa ǃgaotoa tide; tsî sākhâis sadu ǃgaos disa sākhâitoa tide; ǀgâsa-i kas, ǃhaokhoe-i kas hoasa du ge ǁîna nî ǁnāxūba: Tita ge ǃKhūta, sadu Elota.

²³Tsî ǃKhūb ge Moseb ǃoa ge mî:

²⁴ǃHoa re Israeli ôan ǃoa îts mî: Hûǁî ǁkhâb ǃnâ, ǂguro tsēs ǁkhâb dis ai du ge sâba nî ūhâ, ǂâiǂâisens xâiǁnâdi ǀōb dis, ǃanu ǂgaiǀhûsa.

²⁵Sîsen-i xare-e du ge dī tide; xawe ǀaeǁguibade du ge ǃKhūba nî ǁguiba.

²⁶ǃAruǀîb ge ǃKhūba Moseb ǃoa ge mî:

²⁷Ā, disiǁî tsēs ǁnā hûǁî ǁkhâb dis ais ge ǂkhîbagus di tsēsa nî hâ; ǃanu ǂgaiǀhûsa du ge nî ūhâ; ǃnubai du ge sadu di ǀomde nî ǃgamǃgam, tsî du ge ǃKhūba ǀaeǁguiba-e nî ǁguiba.

²⁸Tsî ǁnā tsēs ǁkhās ai du ge sîsen-i xare-e dī tide, ǂkhîbagus di tsēs a amaga, ǂkhîbagusa du nî dībahese ǃKhūb, sadu Elob di ais aiǃâ.

²⁹Mâ ǀoms hoas hîa ǁnā tsēs ǁkhās ai ǃgamǃgamsen tama ka is, ǁîs ge ǁîs di ǁaede xu nî ǃhomǂuihe.

³⁰ǁKhāti mâ ǀoms hoas ǁnā tsēs ai sîsenai-e ga dīs ge ǁîs di ǁaes ǁaeguba xu nî hîkākāhe.

³¹Sîsen-i xare-ets ge dī tide; ǀamo ǂnûiǂgās ge a ǁî sadu ǃhaodi kōse, sadu di ǁanǃkhaidi hoadi ǃnâ.

³²Sâtsēs ge nî ǁî, ǃnubai du ge sadu di ǀomde nî ǃgamǃgam. Khoeseǁî tsēs ǁkhâb dis ai ǃuia, nē ǃuisa xu nau ǃuis kōse du ge sadu di sâtsēsa nî ǃkhōǀgaipe.

³³Tsî ǃKhūb ge Moseb ǃoa ge mî:

³⁴ǃHoa re Israeli ôan ǃoa îts mî: Disikoroǀaǁî tsēs hûǁî ǁkhâb dis aib ge ǁhaogu kaitsēsa ǃKhūba nî tsēdībahe, hû tsēdi kōse.

³⁵ǂGuro tsē i ge ǃanu ǂgaiǀhû-e nî hâ; sîsen-i xare-e du ge dī tide.

³⁶Hû tsēdi kōse du ge ǃKhūba ǀaeǁguibade nî ǁguiba; ǁkhaisaǁî tsēs ai du ge ǃanu ǂgaiǀhû-e ūhâ tsî nî ǃKhūba ǀaeǁguibade ǁguiba. ǃKhâitsē-i ge a ǁî, sîsen-i xare-ets ge dī tide.

³⁷Nēgu ge ǂnûihe hâ kai ǁaegu ǃKhūb diga, sadu nî ǂgaiǂuiga, ǃanu ǂgaiǀhûtsēse, ǃKhūb nî ǁguibahese ǀaeǁguibadi, khauǁguibadi tsî ǂûǁguibadi, ǂāǁguibadi tsî ǂnâǁguibade, mâs hoasa ǁîs di tsēs ai;

³⁸ǁîdi tawa sâtsēgu ǃKhūb diga, tsî ǁîdi tawa sadu di hōde, tsî ǁîdi tawa sadu di mîmādi hoade, tsî ǁîdi tawa māsenxa ǁguibadi, ǃKhūba du nî mîmâide.

³⁹Ā, disikoroǀaǁî tsēs hûǁî ǁkhâb dis ai, ǃhanab di ūǀkhīna du ga ǀhaoǀhaobasen ǃnubai du ge ǃKhūb di kaitsēsa hû tsēdi kōse nî tsēdī; ǂguro tsēs aib ge sâba nî hâ tsî ǁkhaisaǁî tsēs aib ge sâba nî hâ.

⁴⁰Tsî ǂguro tsēs ai du ge ǂgonagu îxa haiǃnôan diga nî ū, palmhais ǂgonaga, tsî ǂgonagu ǁau haiǃnôan diga, ǃāb amǃgâ mâ ǂhûidi ǀkha; tsî du ge hû tsēdi kōse ǃKhūb, sadu di Elob aiǃâ nî ǃgâiaǂgaosa.

⁴¹Tsî du ge ǁnā kaitsēsa kurib ǃnâ hû tsēdi kōse ǃKhūba nî tsēdība; ǀamo ǂnûiǂgās ge a ǁî sadu di ǃhaodi tawa; hûǁî ǁkhâb ǃnâ du ge ǁîsa nî tsēdī.

⁴²Hû tsēdi kōse du ge ǁhaogu ǃnâ nî ǁan; ǃhūb ǃnaesaben Israeli din hoan ge ǁhaogu ǃnâ nî ǁan.

⁴³Î di sadu di ǃhaode ǂan, Israeli ôana ta ge tita ǁhaogu ǃnâ ǁan kai ǃkhaisa, Egipteǃhūba xu ta ge ǁîna ǂgaeǂguiǂui ǃnubai; tita ge ǃKhūta, sadu di Elota.

⁴⁴Nētib ge Moseba ǂnûihe hâ kai ǁaegu ǃKhūb diga Israelǁaes ǂama ge gowaǂui.