Read Khoekhoegowab Levitikus 24 Bible Online

Levitikus 24 - Khoekhoegowab bible

Levitikus 24

¹Tsî ǃKhūb ge Moseb ǃoa ge mî:

²Mîmā re Israeli ôana, în ūhāba tsi ǃanu olib ǀkherahais diba ǃamamǀaes ǂama, ǃamǀaedi nî hugaǀgui ǃamamhese.

³Aronni ge ǁîde ǃKhūb di ais aiǃâ tentoms ǀhûs dis ǃnâ ǀhûǀguitimîs di ǂgāmâisab ǃauga hugaǀgui nî ǁāǁā, ǃuisa xu ǁgoas kōse; ǀamo ǂnûiǂgās ge a ǁî sadu di ǃhaodi ǃnâ.

⁴ǁÎb ge ǁnā ǃamǀaede ǃanu kandelari ai ǃKhūb di ais aiǃâ hugaǀgui nî ǁāǁā.

⁵Tsîts ge ǀui tsampereba ū tsî disiǀgamǀa amperega ǁîb ǀkha nî ǁgan; ǀgam disiǁî ǃâra ge nî ǀgui ampere.

⁶Tsîts ge ǁîga ǀgam ǁgarakha ai nî ǁgui, ǃnaniga ǀgui ǁgarab ai, ǃanu tāb ǃKhūb di ais aiǃâ hâb ai.

⁷Tsî mâ ǁgarab hoab aits ge ǃanu wiroka nî ǁgui, pereba ǂâiǂâisenǁguibase nî ībaba; ǀaeǁguibas ǃKhūb dis ge a ǁî.

⁸Mâ sâtsēs hoas ais ge ǁîsa ǃKhūb di ais aiǃâ hugaǀgui nî ǂhomihe Israeli ôan ǂama, ǀamo ǃgaeǀhaose.

⁹Tsî gu ge Aronni tsî ǁîb ôagu dise nî ī ǃanu ǃkhais ǃnâ, ǁîgu nî ǂûga; ǃanusin di ǃanusise i ge nē-e ǁîba nî ība, ǀaeǁguibadi ǃKhūb didi xa ǀamo ǂnûiǂgā-e.

¹⁰Tsî ǀgôab Israelǁî taras dib, Israel ôan ǁaegu Egipteǁî aob di ôa ge ib ge ge ǃgûǂoa; tsî nē Israelǁîs ôab ge Israelǁî-aob ǀkha ge ǂnoagu, ǁgoeǃkhais ǃnâ.

¹¹ǃNubaib ge Israelǁî taras di ôaba ǀons ǃKhūb disa ǃkhāǃkhā tsî gere ǀâxare; ǁnā-amagan ge ǁîba Moseb tawa ge ūhā; ǁgûs di ǀons ge Selomits ti gere ǂgaihe, Dibrib ôas, Danni ǃhaos disa.

¹²On ge ǃkhō-oms ǃnâ ge ǂgā bi, ǃKhūb di ǂâis nî ǂhaiǂhaihese.

¹³Ob ge ǃKhūba Moseb ǃoa ge mî:

¹⁴Ūǂui ǀâxare-aoba ǁgoeǃkhais ǃauga, în ǁnâu gen hoana ǃomma danas âb ai ǁgui; ǁnās khaoǃgâb ge ǀhaohâb hoaba ǁîba nî ǀuiǁhom.

¹⁵Tsî Israeli ôan ǃoa mî: Mâ-i hoa-i, ǁî-i Eloba ga ǀâxare-i ge ǁî-i di ǁoreba nî tani.

¹⁶Tsî ǃKhūb di ǀonsa ga ǀâxare-i, ǁî-i ge ǂanǂansase nî ǃgamhe; ǀhaohâb hoab ge ǂanǂansase ǁî-e nî ǀuiǁhom; nēti i ge ǃhaokhoe-e ǃhūb ǃnaesabe-i khami nî ī, ǀonsa i ga ǃkhāǃkhā ǃnubai; ǁî-i ge nî ǃgamhe.

¹⁷Tsî khoe-i ga khoe-i di ǀomsa ǃgamo, ǁî-i ge ǂanǂansase nî ǃgamhe.

¹⁸Xawe ǀgoa-i di ǀomsa ga ǃgam-i, ǁî-i ge nî mādawa-am ǀomsa ǀoms ama.

¹⁹Tsî khoe-i ga ǁî-i di ǀgūkhoe-e ǂkhôadīo, ǁî-i ge dī xase i ge ǁkhāti nî dī-ūhe.

²⁰Khôaǃkhai-e khôaǃkhai-i ama, mûsa mûs ama, ǁgûsa ǁgûs ama; khoe-e i ga ǂkhôa-e dī xase i ge nî ǂkhôadīhe.

²¹ǀGoa-e ga ǃgam-i ge ǁî-e nî mādawa-am, xawe khoe-e ga ǃgam-i ge nî ǃgamhe.

²²ǀGuiti-ī ǂhanuba du ge nî ūhâ; ǃhaokhoe-i ge ǃhūb ǃnaesabe-i ǁkhā-i khami nî ī: Tita ge ǃKhūta, sadu di Elota xuige.

²³Ob ge Moseba Israeli ôan ǃoa ge mî, ǀâxare-aoban ǁgoeǃkhais ǃaugaba ǃoa ūǂui tsî nî ǀuiǁhom ǃkhaisa. On ge Israeli ôana ge dī, ǃKhūb ge Moseba mîmā khami.