Read Khoekhoegowab Levitikus 25 Bible Online

Levitikus 25 - Khoekhoegowab bible

Levitikus 25

¹ǃAruǀîb ge ǃKhūba Moseb ǃoa Sinaiǃhommi ai ge mî:

²ǃHoa re Israeli ôan ǃoa îts mîǀî in: ǁNā ǃhūb, tita nî mā dub ǃnâ du ga sīo, ob ge ǃhūba sâtsē-e ǃKhūba nî khaiba.

³ǃNani kurigu kōse du ge sadu di ǃhanaba nî tsoro tsî ǃnani kurigu kōse sadu di ǂauxûiǂûǃhanaba nî ǃgao tsî ǁîb di ūǀkhīna nî ǀhaoǀhaobasen.

⁴Xawe hûǁî kurib ge ǃhūba sâtsēs di sâse nî ība, ǃKhūb di sâtsēse; ots ge sa ǃhanaba tsoro tide tsî sa ǂauxûiǂûǃhanaba ǃgao tide.

⁵ǁÎ-aitsama sa ǃgaos xa ga ǀomǃgau-i, ǁî-ets ge ǀhaoǀhaobasen tide, tsî ǂauxûiǂûn sa ǁkhaedabas dinats ge ǃgao tide; sâb di kurise i ge ǃhūba nî ība xui-ao.

⁶Tsî ǃhūb di sâtsēs ge sado ǂûse nî ība, sadu tsî sadu ǃgāb tsî sadu ǃgās tsî sadu ǃgaesab tsî sadu di ǁanǀhao-aon, sadu tawa ǃhaokhoese hâna;

⁷tsî sadu di ǀgoan tsîn; tsî ǀgurun, sadu di ǃhūb ǃnâ hânan ge ǁîb di ūǀkhīna ǂûse nî ība.

⁸Tsîts ge ǁkhāti hû kuriwekhega nî ǃgôa, hû ǃnādi di hû kuriga; o di ge tsēdi ǁnā hû kuriwekhegu dide hakadisikhoeseǀa kuri nî ība tsi.

⁹ǁNās khaoǃgâts ge hûǁî ǁkhâb ǃnâ, ǁnā ǁkhâb di disiǁî tsēs ai ǀgapadas di ǀōba nî ǀōǃganu kai; ǂkhîbagus di tsēs aits ge ǀgapadasa nî ǀōǃganu kai sa ǃhūb hoaragab ǃnâ.

¹⁰Tsî du ge ǁnā korodisiǁî kuriba nî khai tsî ǃnorasasiba ǃhūb hoaragab ǃnâ ǁîb ǃnâ ǁan hân hoana nî ǂgaiǂuiba; dâkuriseb ge ǁîba nî ība du, tsî du ge nî oa, mâ-i hoa-e ǁî-i di xūn ǃoa, tsî mâ-i hoa-e ǁî-i di ǃhaos ǃoa.

¹¹Nē dâkurib ge sado korodisiǁî kurise nî ība; o du ge tsoro tide tsî ǁkhāti ǁî-aitsama ga ǁîb ǃnâ ǀom hâna ǀhaoǀhaobasen tide, tsî ǁkhāti ǁkhaedabas di ǂûn, ǁîb ǃnâ hâna, ǃgaoǁnâ tide.

¹²Dâkurib a ǁî xui-ao, ǃanuseb ge ǁîba nî ība du; o du ge ǃhanaba xu ūǀkhīn âba nî ǂû.

¹³ǁNā dâkurib ai du ge nî oa, mâ-i hoa-e ǁî-i di xūn ǃoa.

¹⁴ǁNā-amaga, xū-ets ga sa ǀgūkhoe-i tawa ǁamaxūo, tsî xū-ets ga ǀgūkhoe-i di ǃomǁaeba xu ǁamao, a-i nē-e nau-e tā ǁgâiǀā.

¹⁵Kurigu di ǀgaus ǃoa du ge dâkuriba xu sadu di ǀgūkhoe-i tawa nî ǁama, tsî kurigu ūǀkhīn digu di ǀgaus ǃoa i ge ǁîna sadu ai nî ǁamaxū.

¹⁶Kurigu di ǂguib ǃoa du ge ǁîb di ǁamasa nî ǂguiǂgui, tsî kurigu di ǀorosib ǃoa du ge ǁîb di ǁamasa nî ǀoroǀoro; ūǀkhīn di ǀgaus ai i ra ǁamaxū-ai tsi amaga.

¹⁷Khoe-i xare-e a-i tā ǁî-i di ǀgūkhoe-e ǁgâiǀā, îts ǃao sa Elob aiǃâ; tita ge ǃKhūta sa Elota xuige.

¹⁸Î du dī ti ǂnûiǂgāde, î du ǃkhōǀgaipe ti ǂhanuga î du ǁîga dī; o du ge sâusase nî ǁan ǁnā ǃhūb ǃnâ.

¹⁹Tsî ǃhūb ge ǂûn âba nî mā, tsî du ge nîra ǂû, ǁâ di nîs kōse; tsî du ge sâusase ǁîb ǃnâ nî ǁan.

²⁰Tsî mî du kao: Tare-e da nî ǂû hûǁî kurib ǃnâ? Mû, tsoro da kom tideo, tsî ūǀkhīn âda ǀhaoǀhaobasen tideo.

²¹O ta ge tita ti ǀkhaeba sadu ǂama nîra mîmā ǃnaniǁî kurib ǃnâ, ob ge ǃnona kurigu di ūǀkhīna nîra ūǀkhī.

²²Tsî ǁkhaisaǁî kurib ai du ge tsoro tsî nîra ǂû ǀoro ūǀkhīn xa, khoeseǁî kurib kōse; ǁîb di ūǀkhīn nî hās kōse du ge ǀoron xa nîra ǂû.

²³Tsî ǃhūb ge ǀamos kōse ǁamaxūhe tide; ǃhūb ge a ti xui-ao, tsî sadu tita tawa ǃhaokhoe tsî a ǁanǀhao-ao amaga.

²⁴ǁNā-amaga du ge sadu nî ūhâ ǃhūb hoaragab ǃnâ ǃhūba oresa nî hîba.

²⁵Sa ǃgâsab ga ǀgâsa tsîb ga ūb hâ xūn xa xū-e ǁamaxūo, ob ge ǁîb ore-aob hîa a ǁîb di ǀaokhoeba hā tsî nē ǁamaxūhe hâ xū-i ǁîb ǃgâsab di-e nî ore.

²⁶Tsî khoe-i ga ore-ao-e ūhâ tama i, xawe ǃommi â-i ga xū-e hō, tsî i ga ǁî-i di oresa ǂâuba hâ xūna hō-o,

²⁷o i ge kurigu ǁamaxūs â-i diga ǃgôa tsî ǃgau ka xū-e ǁnā khoeb, ǁîb tawa i ge ǁamaxūba ǁkhawa nî ǁkhaedababa; o i ge ǁî-i di xūna ǁkhawa nîra hō.

²⁸Tsî ǃommi â-i ga ǂâuba hâ xū-e hō tama io, ǁkhawa i nî ǁkhaedabase, on ge ǁamaxūhe hâ xūn â-e ǁîn ǁama-ao-i di ǃomǁae nî hâ, dâkurib kōse; xawe dâkurib ǃnân ge nî ǂoa tsî i ge ǁîna ǁkhawa nî ūhâ.

²⁹ǁNās ǁkhās xase khoe-i ga ǁanǃkhai-e ǁamaxūo, ǃās, hîa ǂnubiǂgoa-i xa hâǂnamipehe hâs ǃnâ, os ge ǁî-i di oresa nî ǀhape, ǁamaxūs â-i di kurib nî ǀoas kōse; ǀoasa kurib ǃnâs ge ǁî-i oresa nî i.

³⁰Xawe orehe tama i ka io, ǀoasa kurib nî ǀoas kōse, ob ge ǁnā ommi ǁnā ǃās, ǂnubiǂgoa-e ūhâs ǃnâ hâba ǁîb hîa ge ǁama bib tawa nî hâ ǁîb di ǃhaodi ǃnâ; dâkurib ǃnâb ge ǁîba ǃnora tide.

³¹Xawe omgu ǁnā ǃhaidi hîa ǁîdi ǂnamipe ǂnubiǂgoa-e ūhâ tamadi digu ge ǃhūb di ǃaub khami nî ǃgôahe; ǁîgu ge nî orehe, tsî gu ge dâkurib ǃnâ nî ǃnora.

³²Tsî ǃādi Leviǁîn didi, ǁîn ūhâ ǃādi di omgu xasa: Leviǁîn ge ǀamo oresa nî ūhâ.

³³Tsî Leviǁîn ǃnâs ga oresa hîheo, os ge ommi di ǁamas tsî ūn hâ ǃās disa dâkurib ǃnâ nî ǃnora; omgu Leviǁîn ǃādi digu ge a ǁîn di, Israeli ôan ǁaegu.

³⁴Xawe ǃaub ǁîn aiǃādi dib ge ǁamaxūhe tide; ǀamo ǁîsis ge a ǁî, ǁîn disa.

³⁵Tsî sa ǃgâsab ga ǀgâsa tsî ǃommi âb ga sa tawa ǁnopeo, ots ge ǁîba nî ǃkhōǀgaipe, ǃhaokhoe-i kas, ǁanǀhao-ao-i kas hoasa, î-i sa tawa ûi.

³⁶Renten kas, hōǃnās kas hoasats ge ǁî-i xa ū tide; îts ǃao sa Elob aiǃâ, îb sa ǃgâsaba sa tawa ûi.

³⁷Sa maribats ge ǁî-e renten ama mā tide, tsîts ge sa ǂûna hōǃnās ama mā tide.

³⁸Tita ge ǃKhūta, sa Elota, Egipteǃhūba xu ge ǂgaeǂguiǂui tsi ta, Kanaanǃhūba ta nî mā tsise, î ta sa Elo ti.

³⁹ǁNās ǁkhās xase ǃgâsab âts ga sa tawa ǀgâsa tsîb ga sa tawa ǁamaxūsen, ots ge ǁîba khobo-i di sîsenna sîsen kai tide.

⁴⁰ǃGaesab, ǁanǀhao-aob axaseb ge sa tawa nî hâ; dâkurib kōseb ge sa tawa nî sîsen.

⁴¹ǁNāǃnubaib ge satsa xu nî ǃgûǂoa, ǁîb tsî ǁîb di ôan ǁîb ǀkha, tsîb ge ǁîb di ǃhaos ǃoa nî ǁaru tsî ǁgûgu âb di xūn ǃoa nî oa.

⁴²Ti ǃgāgu ge a ǁî, Egipteǃhūba xu ta ge ǂgaeǂguiǂuiga; xui-ao gu ge ǁîga ǁamaxūhe tide, khobo-i ra ǁamaxūhe khami.

⁴³Karosasib ǀkhats ge ǁîba gaoǂam tide, xawe ǃao sa Eloba.

⁴⁴Sa khobob xas kas, sa khobos xas kas hoas, ūhâts nîra, ǁîrats ge ǁnā ǁaedi, sa ǂnamipe hâde xu nî hō; ǁîna xuts ge khobob kas, khobos kas hoasa nîra ǁama.

⁴⁵ǁKhātits ge ǁîna nî ǁama ǁnā ǁanǀhao-aon, ǃhaokhoese sadu tawa hâna xu, ǁîn tsî ǁîn di ǃhaodi, sadu tawa nî hâdi, sadu di ǃhūb ǃnân nî hōna xu, o du ge ǁîna nî ǁîxūse ūhâ.

⁴⁶Tsî du ge ǁîna nî ūhâbasen, sadu di ôan tsîn ge sadu khaoǃgâ ǀumise nî ūhâ, ǀamos kōsets ge ǁîna nî sîsen kai; xawe sadu di ǃgâsan Israeli ôan ǂama, mâ-i hoa-i, ǁî-i di ǃgâsab ǂama i ge karosasib ǀkha gaosisa ūhâ tide.

⁴⁷Tsî ǃhaokhoe-i tsî ǁanǀhao-ao-i, sadu ǀkha hâ-i di ǃommi ga xū-e hō tsî sa ǃgâsab, ǁî-i ǀkha hâb ga ǀgâsa, ǃhaokhoe-i, ǁanǀhao-ao-i, sadu ǀkha hâ-i tawas kas, ǃhaoǃnās ǃhaokhoe-i ǃhaos di-i tawas kas hoasa i nîs ǁamaxūsens kōse,

⁴⁸ob ge ǁamaxūsenni kas khaoǃgâ nî orehe; ǀguib ǁî-i ǃgâsagu dib ge ǁîba nî ore.

⁴⁹ǁNaosab âb kas, ǁnaosab âb di ôab kas hoas ge ǁîba nî ore, ǀgū ǀaokhoeb âb ge ǁîba nî ore; tsî ǃommi âb ga xū-e hō-o, ab ǁî-aitsama oresen.

⁵⁰Ob ge ǁama-aob âb ǀkha, ǁîb tawab ge ǁamaxūsen kuriba xu nî ǃgôa dâkurib kōse; ǁamaxūsens âb di marib nî kurigu di ǀgaus kō, ǃgaesab di tsēdi ǃoa i ge ǁîb ǀkha nî ī.

⁵¹ǁNā kurigu ga gorose ǂguio, ob ge ǁîgu ǃoa oresens âb ǂama ǁnā marib, ǁîb ǀkhab ge ǁamaheba nî mādawa.

⁵²Tsî ǀoro kurigu ga gorose ǃgauo dâkurib kōse, ob ge ǁîb ǀkha nî ǃgôa; ǁîb di kurigu ǃoab ge ǁîb di oremarisa nî mā.

⁵³ǃGaesab khamib ge ǁîb tawa kuriba xu kuriba ǃoa nî hâ; karosasib ǀkhab ge gaosisa ūhâǂamhe tide sa mûdi aiǃâ.

⁵⁴Tsî ī i kao, ǁîs ǀkhab orehe tama hâ ǃkhaisa, ob ge dâkurib ai nî ǃnora, ǁîb tsî ǀgôan âb ǁîb ǀkha.

⁵⁵Israeli ôan ge tita ǃgāse ība; ti ǃgān ge a ǁî, Egipteǃhūba xu ta ge ǂgaeǂguiǂuina; tita ge ǃKhūta, sadu di Elota.