Read Khoekhoegowab Levitikus 26 Bible Online

Levitikus 26 - Khoekhoegowab bible

Levitikus 26

¹Sadu ge ǁgôa-eloga dībasen tide, tsî ǃgaohesa ī-i kas, ǂnûikhâihesa ī-i kas hoasa mâi tide, tsî ǁkhāti ī-īhesa ǀuiga ǂnûi tide, ǁîgu aiǃâ du nî ǃhonga: Tita ge ǃKhūta sadu Elota xuige.

²Ti sâtsēde du ge nî tsēdī, tsî ti ǃanusiba du ge nî ǃao: Tita ge ǃKhūta.

³Ti ǂnûiǂgādi ǃnâ du ga tanisen tsî ti mîmāde ǃkhōǀgaipe tsî ǁîde dīo,

⁴o ta ge tita sado ǀapiga nî mā ǁîgu di ǁaeb ai; tsî ǃhūb ge ūǀkhīn âba nî mā, tsî haidi ǃaub didi ge ǁîdi di ǂûna nî mā.

⁵Tsî dāǃnâǁaeb ge ǂauxûiǂûn ra ǃgaohe ǁaeb kōse nî sī, tsî ǂauxûiǂûn ta ǃgaohe ǁaeb ge tsoroǁaeb kōse nî sī; tsî du ge pereba ǀoasase nî ǂû tsî du ge sâusase nî ǁan sadu di ǃhūb ǃnâ.

⁶Tsî ta ge tita ǂkhîba nî mā ǃhūb ǃnâ, ǁomǁgoe du ge nî tsî khoe-i xare-i ǃhuriǃhuri du tide; tsî tita ge ǁaixa ǀguruna ǃhūba xu nî ǀû kai, tsî gôab ge sadu di ǃhūba ǃgûǃganu tide.

⁷Tsî du ge sadu di khākhoena nî ǃgôaǃgon, tsîn ge sadu di ais aiǃâ gôab ǃnâ nî ǁnā.

⁸Koron âdu ge kaidisina nî ǃgôaǃgon, tsî kaidisin âdu ge disiǀoadisina nî ǃgôaǃgon; tsî sadu di khākhoen ge sadu di ais aiǃâ gôab ǃnâ nî ǁnā.

⁹Tsî tita ge sadu ǃoa ǂnan tsî nî sado ǂûǂûxa kai tsî nî sado ǂguiǂgui; tsî ti ǃgaeǀhaosa ta ge tita sadu ǀkha nî ǁapoǁapo.

¹⁰Tsî du ge ǃhoro-i hîa ǀoro ge i-e nî ǂû; tsî ǀoro-e du ge ǀasa-i ǃaroma nî ūbē.

¹¹Tsî tita ge ti tabernakela sadu ǁaegu nî ǂnûi, tsî ti ǀoms ge sadu xa uixa tide.

¹²Tsî tita ge sadu ǁaegu ǃgû tsî nî sadu Elose ī; tsî sadu ge tita ǁaese nî ība.

¹³Tita ge ǃKhūta, sadu Elota, sado Egipteǁîn di ǃhūba xu ge ǂgaeǂguiǂui ta, ǁîn di khobose du hâ tidega; tsî tita ge ǂgae-ūhaigu ǁîn ǃnaob diga khôa tsî ǂhanuse ge ǃgû kai du.

¹⁴Xawe tita du ga ǁnâu tama io, tsî nē mîmādi hoade du ga dī tama io;

¹⁵tsî ti ǂnûiǂgāde du ga ǃharaxūo, tsî sadu di ǀoms ga ti ǂhanugu xa uixao, ti mîmādi hoade du dī tidega, ti ǃgaeǀhaosa du nî ǁauǁause,

¹⁶o ta ge nēs tsîna sado dī-ū tsî nî hāǂam kai du: ǃHurib tsî ǁnopaǁōb tsî ǁkhais tsîn, mûde ra hapun tsî ǀomsa ra tsûtsûn; tsî du ge ǁkhāti sadu di ǃkhomma ǁause nî tsoro, tsî sadu di khākhoen ge ǁîba nî hapu.

¹⁷Tsî ta ge nēs tawa ti aisa sadu ǃoagu nî ǂnûi, ǂnauhe du nîse sadu khākhoen di ais aiǃâ; tsî sadu ǁkhansaben ge sadu ǂama gaosisa nî ūhâ, tsî du ge nî ǁhâ, khoe-i xare-i ga sado sauruǃgon tama i xawe.

¹⁸Tsî nēs kōse du ga tita gorose ǁnâu tama io, o ta ge tita dīǀaro tsî hû ǃnādi kōse sadu di ǁoren ǂama nî ǁkhara du.

¹⁹ Tita ge ǃgurixasib sadu ǀgaib diba khôa tsî nî sadu di ǀhomma ǂnūǀurise dī tsî sadu ǃhūba ǂaise.

²⁰Tsî sadu di ǀgaib ge ǁause nî hîkākāhe; tsî sadu di ǃhūb ge ūǀkhīn âba mā tide, tsî haidi ǃhūb didi ge ǂûn âde mā tide.

²¹Tsî tita mâǃoa hâse tanisen tsî du ga ǁnâumāsen ǂgao tama io, o ta ge tita hû ǃnādi kōse sadu di ǁoren īs xase nî ǂnauǀaro du.

²²ǃAub di ǀguruna ta ge tita sadu ǁaegu nî sî xui-ao, sado nî ǀâǀhanan tsî sadu di ǀgoana nî ǃhomǂuin tsî sado nî ǀoro kaina; o gu ge sadu di daoga nî ǃū-aisa.

²³Tsî gorose du ga nē xūn ǀkha tita xa ǁkharakaisen ǂgao tama i, tsî mâǃoa te hâse taniseno,

²⁴o ta ge tita ona mâǃoa du hâse tanisen tsî nî ǁkhāti sadu di ǁoren ǂama hû ǃnādi kōse ǂnau du.

²⁵Tita ge gôa-e sadu ǂama nî ūhā xui-ao, ǃgaeǀhaos di ǀkhaoba nî ǀkhao-e, sadu di ǃādi ǃnâ du nî ǀhaoǀhaohega; ǃnubai ta ge tita ǂhīǁōba sadu ǁaegu nî sî, o du ge khākhoeb ǃomǁae nî māǁnâhe.

²⁶Tsî hais pereb disa ta ga tita khôaba duo, o di ge disi tarade sadu pereba ǀgui ǁganoms ǀguis ǃnâ ǁgan tsî nî sadu di pereba ǀguiros ǀkha mādawa; o du ge nî ǂû, xawe ǁâ tide.

²⁷Tsî ǁîn on ǃaroma du ga tita ǁnâu tama i, tsî mâǃoa te hâse taniseno,

²⁸o ta ge tita ona ǀgamsa ǁgôasib ǃnâ sadu ǃoagu nî tanisen, o ta ge tita ǁkhāti sadu di ǁoren ǂama hû ǃnādi kōse nî ǁkhara du.

²⁹Sadu ôagu di ǁgansa du nî ǂû tsî sadu ôadi di ǁgansa du nî ǂû xui-ao.

³⁰Tsî tita ge sadu di ǀgapiga nî hîǀhuru, tsî sadu di sore-īga nî ǃhomǂui tsî sadu di ǁō hâ sorode sadu ǁgôa-elogu di ǁō hâ sorodi ai nî aoǁgui; tsî ti ǀoms ge sadu xa nî uixa.

³¹Tsî tita ge sadu di ǃāde nî ǃgaroǃhū kai, tsî sadu di ǃanusiga nî hîkākā; tsî tita ge sadu di ǀnamǀnamsa ǁamaba ǃkhao ǂgao tama hâ.

³²Ā, tita ge ǁnā ǃhūba nî hîǀhuru, sadu di khākhoen, ǁîb ǃnâ ǁan hân nî ǁîb ǂama burugâs kōse.

³³ǁNās tawa ta ge tita ǀūbeǁaedi ǃnâ nî ǀgaruǀgaru du tsî sadu khaoǃgâ gôaba nî ǂgaeǂui; ob ge nî ǃū-ai sadu di ǃhūba, tsî sadu di ǃādi ge nî ǃgaroǃhū kai.

³⁴ǁGoasib ge ǃhūba sâtsēdi âb xa nîra ǃgâibahe, hîǀhurus di tsēdi hoadi kōse, tsî du ge sadu khākhoen di ǃhūb ǃnâ nîra hâ; ǃnubaib ge ǃhūba sâ tsî nîra ǃgâibahe ǁîb di sâtsēdi xa.

³⁵Hîǀhurus di tsēdi hoadi kōseb ge nîra sâ, sadu ǁîb ǃnâ ǁan hâ hîab ge sadu di sâtsēdi ǃnâ sâ tama i amaga.

³⁶Tsî sadu ǃnâ ga ǃgaun xasa, tita ge ǃhūgu khākhoen ân digu ǃnâ ǂkhabuǂâixasiba nî hā kai ǁîn di ǂgaob ǃnâ, on ge ǀōb ǃgomhe ra ǂgaeb dib xa nîra ǃkhoeni, on ge nîra ǁhâ, gôa-i aiǃâts ra ǁhâs xase, tsî nîra ǁnā, khoe-i hîa ra sauru-i a ǀkhai xawe.

³⁷On ge nē-e nau-i ai nîra ǁnā gôab aiǃâs xase, khoe-i, hîa ra sauru-i a ǀkhai xawe; tsî du ge sadu khākhoen di ais aiǃâ mâ ǁoase nîra ī.

³⁸O du ge nîra ǀkhai ǀūbeǁaedi ǃnâ tsî ǃhūb sadu khākhoen dib ge nîra hapu du.

³⁹Tsî sadu ǃnâ ga ǃgaun ge ǁîn di ǂhanuoǃnâsib ǃaroma sadu khākhoen di ǃhūb ǃnâ nîra toaǃari; ā, ǁîn îgu di ǂhanuoǃnâsigu on ǃaroman ge ǁîgu ǀkha nîra toaǃari.

⁴⁰ǃNubain ge ǁîn di ǂhanuoǃnâsiba nîra ǁguiǁnā tsî ǁgûgu di ǂhanuoǃnâsiba ǁîn di ǂhanuoǃnâsigu, ǁîgu ǀkhan ge tita ǃoagu ǃûǂamga, tsîn ge ǁkhāti mâǃoa te hâse gere tanisen.

⁴¹O ta ge tita ona ǁîna māǃoa hâse nîra tanisen tsî ǁîna ǃhūb ǁîn khākhoen dib ǃnâ nîra ūǂgâ. Tsî ǃgaohe tama hâ ǂgaob ân ga ǃgamǃgamseno, tsî ǁkharab ǁîn ǂhanuoǃnâsib dib xan ga ǃgâibaheo,

⁴²o ta ge tita ti ǃgaeǀhaos, Jakob ǀkha ta ge dīs xa, tsî ǁkhāti ti ǃgaeǀhaos, Isaki ǀkha ta ge dīs xa, tsî ǁkhāti ti ǃgaeǀhaos, Abrahammi ǀkha ta ge dīs xa nîra ǂâi tsî ǃhūb xa ta ge nîra ǂâi.

⁴³ǃHūb ga ǁîn ǃaroma ǁnāxūheo, tsîn ga ǁîn di sâtsēdi xa ǃgâibaheo, ǁîn ǃaromab ga ǃhūba hîkākāheo, tsî ǁkharab, ǁîn ǂhanuoǃnâsib dib xan ga ǃgâibaheo; ǁnā-amaga tsî ti ǂhanugan ge aoxū ǃkhais ǃaroma tsî ǀoms ân ge ti ǂnûiǂgādi xa ge uixa ǃkhais ǃaroma.

⁴⁴Tsî ǁîn xōǀkhās ge nēs ona hâ: ǁÎn khākhoen di ǃhūb ǃnân ga hâ xawe ta ge tita ǁîna aoxū tide tsî ǁîn xa uixa tide, ǁîna ta nî toa kaise, ǁîn ǀkha ta ūhâ ǃgaeǀhaos tisa ra ǁauǁauǃâ: Tita ge ǃKhūta, ǁîn di Elota amaga.

⁴⁵Tsî ta ge tita ǁîna nîra ǂâiba Abogu di ǃgaeǀhaos xa, Egipteǃhūba xu ta ge ǀūben di mûdi aiǃâ ǂgaeǂguiǂuiga, ǁîn di Elo ta nîga: Tita ge ǃKhūta.

⁴⁶Nēn ge ǁnā ǂnûiǂgādi tsî ǁnā ǂhanusigu tsî ǁnā ǂhanugu, ǃKhūb ge ǁîb ǂûb tsî Israeli ôan ǁaegu māna Sinaiǃhommi ai, Moseb di ǃomma xu.