Read Khoekhoegowab Levitikus 27 Bible Online

Levitikus 27 - Khoekhoegowab bible

Levitikus 27

¹ǃAruǀîb ge ǃKhūba Moseb ǃoa ge mî:

²ǃHoa re Israeli ôan ǃoa îts ǁîn ǁga mî: Khoe-i ga mîmâi-e khaiǁnâo, o di ge ǀomde sa ǃgôas ǃoa ǃKhūba nî ība.

³Sa ǃgôas khoe-i disa as ǀgamdisi kurigu â-iba xu ǃnanidisi kurigu â-ib kōse ī; ǃnubai as ǃgôas âtsa ī korodisi sekelde xu ǀhaiǀurib xa, ǃanusib di sekels ǃoa.

⁴Tsî tarare khoes kao, as ǃgôas âtsa ǃnonadisi sekelde ī.

⁵Tsî ǀgui-i koro kurigu â-i-e xu nau-i ǀgamdisi kurigu â-i-i kōses kao, as ǃgôas âtsa, aore khoeb kao, ǀgamdisi sekelde ī tsî tarare khoes kao, disi sekel.

⁶Tsî ǀgui-i ǀgui ǁkhâb â-i-i nau-i koro kurigu â-i-i xas kao, as ǃgôas âtsa ī aoreb kao, koro sekelde ǀhaiǀurib xa, îs ǃgôas âtsa tarares kao, ǃnona sekelde ī ǀhaiǀurib xa.

⁷Tsî ǀgui-i ǃnanidisi kurigu â-i-i tsî ǁnās ǃgâ-ai kai-i xas kao, aoreb kao, as ǃgôas âtsa ī disikoroǀa sekelde, tsî tarares kao disi sekelde.

⁸Tsî ǃgôas âts xa i ga ǀgâsao, o i ge pristeri di ais aiǃâ nî sī ǂnû, pristeri nî ǁî-e ǃgôaga; ǁnā-i, mîmâi-e ge dī-i di ǃommi ga hō ǁkhās kōse ab pristera ǁî-e ǃgôa.

⁹Tsî ǀgoa-i kao, ǁî-i xan ga ǃKhūba ǁguibasa ǁguiba-i: ǃKhūba i ga ǁî-i xa mā-i hoa-i ge nî ǃanu.

¹⁰ǁÎ-e i ge ǁamaǃkhuni tide tsî ǁkhāti ū-unu tide ǃgâi-e ǂkhaba-i ama, tsî ǂkhaba-e ǃgâi-i ama, tsî ǀgoa-e i ga ǀgoa-i ama ū-unu xawe i ge nē-i tsî ǁî-i ama ge unuhe-i tsîna nî ǃanu.

¹¹Tsî ǃanuoǃnâ ǀgoa-i kao, ǁî-i xats ǃKhūba ǁguiba-e ǁguiba tide-e, on ge ǁnā ǀgoa-e pristeri di ais aiǃâ nî ǂnûi.

¹²Ob ge pristera ǁî-e nî ǃgôa, ǃgâi-i kas, ǂkhaba-i kas hoas ǃoa; sa ǃgôas ǃoa i ge nî ī, pristertse!

¹³Tsî ǁî-e i ga ore ǂgao-o, o i ge ǁî-e koroǁî ǃâsa sa ǃgôas ǃgâ-ai nî dīǀaro.

¹⁴Tsî khoe-i ga ǁî-i di omma khaio, ǃKhūbab nî ǃanubaga, ob ge pristera ǁîba nî ǃgôa, ǃgâib kas, ǂkhabab kas hoas ǃoa; pristeri ga ǁîba ǃgôas ǁkhās xaseb ge ǀgaus âba nî hâhâ.

¹⁵Tsî ǁî-i hîa ǁîba ge khai-i ga omma oreo, o i ge koroǁî ǃâs marib disa ǃgôas ǃgâ-ai nî dīǀaro, ob ge nî ǁîb di.

¹⁶Tsî khoe-i ga ǁkhāti ū i hâ ǃhanab â-i xa ǃKhūba xū-e khaibao, os ge ǃgôas âtsa ǁî-i ǃkhommi ǃoa nî ī: ǀGui gomeri gerstǃhorob ge korodisi sekelde nî ī ǀhaiǀurib xa.

¹⁷Tsî ǁî-i di ǃhanaba i ga dâkuriba xu khai hâ io, os ge sa ǃgôas ǃoa ǀgausa nî hâhâ.

¹⁸Xawe dâkurib khaoǃgâ i ga ǃhanab â-e khai hâ io, ob ge pristera ǁî-e mariba nî ǃgôaba, ǁnā kurigu, ganupe dâkurib kōse ǃgau hâgu ǃoa; o i ge nî ǃgôaǁnâhe sa ǃgôasa xu.

¹⁹Tsî ǁî-i ǃhanaba ge khai-i ga ǁîba hoaragase oreo, o i ge koroǁî ǃâs marib disa sa ǃgôas ǃgâ-ai nî dīǀaro, o i ge ǁîsa nî ǁapoǁapobahe hâ.

²⁰Tsî ǁnā ǃhanaba i ga ore tama is kao, ǁnā ǃhanaba i ga ǀkhara khoe-i ai ǁamaxūs kao, ob ge ǃaruǀî orehe tide.

²¹Xawe ǁnā ǃhanab ge dâkurib ǃnâb ga ǃnorao, ǃKhūba nî ǃanuba ǀâxareb di ǃhanase; ǁîb ge pristeri dise nî ī.

²²Tsî ǃhana-e i ga ǃKhūba khaibao, ǁî-i ge ǁama-e tsî ū i hâ ǃhanagu di tama-e,

²³ob ge pristera ǁî-e nî ǃgôa sa ǃgôas di ǀgausa dâkurib kōse; o i ge ǁnā tsēs ǁkhās ai sa ǃgôasa nî mā ǃKhūb di ǃanusise.

²⁴Dâkurib ǃnâb ge ǁnā ǃhanaba nî oa ǁnā khoe-i, ǁî-i tawab ge ǁamahe-i, ǁî-i dib ge ǃhanaba i-i ǃoa.

²⁵Sa ǃgôas hoas ge ǃanusib di sekels ǃoa nî ī; sekels ge ǀgamdisi gerase nî ī.

²⁶Xawe ǂguroǃnaesabe-i ǀgoan xa ǃKhūba ra ǁorabahe-i, ǁî-i ge khoe-i xa khaihe tide, goma-i kao, ǀgoa-i kao, ǁî-i ge a ǃKhūb di.

²⁷Tsî ǃanuoǃnâ ǀgoa-i kao, o i ge ǁî-e nî ore sa ǃgôas ǃoa, tsî i ge ǁnās ǃgâ-ai ǁî-i di koroǁî ǃâsa nî dīǀaro; tsî orehe tama i ka io, o i ge nî ǁamaxūhe sa ǃgôas ǃoa.

²⁸Tsî ti ī xawe xū-i, hîa ǀâxarehe hâ-i, khoe-i xa ǃKhūba ǀâxarebahe hâ-i ū hâ-i hoa-i xa, khoe-i xas kas, ǀgoa-i xas kas, ū i hâ ǃhana-i xas kas hoas ge ǁamaxūhe tsî orehe tide; ǀâxarehe hâ-i hoa-i ge ǃKhūba ǃanusin di ǃanusise nî ība.

²⁹ǀÂxarehe hâ-i hoa-i, khoen xa ǀâxarehe hâ-i, ǁî-i ge orehe tide; ǂanǂansase i ge nî ǃgamhe.

³⁰ǁKhāti disiǁîn ǃhūb din hoan, ǃhūb di ǃkhommi xas kas, haidi di ǂûn xas kas, ǁîn ge a ǃKhūb di, ǁîn ge ǃKhūba a ǃanuba.

³¹Xawe khoe-i ga ǁî-i di disiǁîn xa xū-e oreo, ǁî-e ge ǁî-i di koroǁî ǃâsa ǁnās ǃgâ-ai nî dīǀaro.

³²Tsî disiǁîn goman tsî ǀgoan din hoan xasa, hais ǃnaga ga ǃgû-īn hoan xa i ge disiǁî-e ǃKhūba nî ǃanuba.

³³ǃGâi-i tsî ǂkhaba-i ǁaegu i ge ôaǃnâ tide, tsî i ge ǁkhāti ū-unu tide; ū-unu i ga xawe i ge ǁnā-i tsî ǁî-i ama ū-unuhe hâ-i tsîna nî ǃanu; ǁî-i ge orehe tide.

³⁴Nēdi ge mîmādi, ǃKhūb ge Moseba mîmāde Israeli ôan tawa Sinaiǃhommi ai.