Read Khoekhoegowab Levitikus 3 Bible Online

Levitikus 3 - Khoekhoegowab bible

Levitikus 3

¹Tsî ǁguibas â-i ga ganganǁguiba io, goman xab ga ǁîsa ǁguibao, aoreb kas, tarares kas, ūose i ge ǁî-e nî ǁguiba ǃKhūb di ais aiǃâ.

²Tsîb ge ǃommi âba ǁîb ǁguibas di danas ai ǁgui tsî nî ǁî-e ǂā tentoms ǀhûs dis di dao-ams aiǃâ; tsî pristergu, Aronni ôagu ge ǀaoba altars ǂnamipe nî ǀgapi.

³ǁNās khaoǃgâb ge ǁnā ganganǁguibas xa ǀaeǁguiba-e ǃKhūba nî ǁguiba ǁnā ǀhaub, ǃnāxūn ai hâb, tsî ǁnā ǀhaub, ǀgûis tawa hâb hoaba,

⁴tsî ǃnaira hoara tsî ǀhaub, ǁîra ai hâb, ǀgûin ai hâba; tsî ǁnôab, âis ǂnamipe hâb, tsî ǃnaira tsînab ge nî ūǁnâ.

⁵O gu ge Aronni ôaga ǁîna altars ai nî ǂhubi, khauǁguibas ai, ǀaes ai hâ ǀaeb ai; ǀaeǁguibas ge a ǁî, ǀnamǀnamsa ǁamab ǃKhūb dib ase.

⁶Tsî ǁguibas â-i ga ǀgoa io, ǃKhūb di ganganǁguibas ase, aoreb karao, tarares karao, o i ge ǁî-e ūose nî ǁguiba.

⁷Tsî ǁkhao-e i ga ǁguibas â-i ase ǁguibao, o i ge ǁî-e nî ǁguiba ǃKhūb di ais aiǃâ.

⁸Tsî i ge ǁî-i di ǃomma ǁguibaxūb â-i di danas ai ǁgui tsî nî ǂā bi tentoms ǀhûs dis aiǃâ; tsî Aronni ôagu ge ǁîb di ǀaoba altars ǂnamipe nî ǀgapi.

⁹ǁNās khaoǃgâb ge ǁnā ganganǁguibas xa ǀaeǁguiba-e ǃKhūba nî ǁguiba: ǁÎs di kaub tsî ǂareb hoab, ǁâb ǀgūse i nî ūǁnâb tsî ǁnā kaub ǃnāxūna ǃgūǂgā hâba, tsî ǁnā kaub ǀgûib tawa hâb hoaba;

¹⁰tsî ǁkhāti ǃnaira hoara tsî kaub, ǁîra ai hâb, ǀgûin tawa hâba, tsî ǁnôab âis ǂnamipe hâbab ge ǃnaira ǀkha nî ūǁnâ.

¹¹Ob ge pristera ǁîna nî ǂhubi altars ai; ǀaeǁguibas ǂû-i ge a ǁî, ǃKhūb tawa.

¹²Tsî ǁguibas â-i ga piri io, o i ge ǁîba nî ǁguiba ǃKhūb di ais aiǃâ.

¹³Tsî i ge ǁî-i di ǃomma danas âb ai ǁgui tsî nî ǂā bi, tentoms ǀhûs dis aiǃâ, tsî Aronni ôagu ge ǁîb di ǀaoba altars ǂnamipe nî ǀgapi.

¹⁴ǁNās khaoǃgâ i ge ǁîb xa ǁî-i ǁguibasa ǃKhūba nî ǁguiba ǀaeǁguibase: ǁNā kaub, ǃnāxūna ǃgūǂgā hâb, tsî ǁnā kaub ǀgûib tawa hâb hoab;

¹⁵tsî ǀgam ǃnaira tsî kaub, ǁîra ai hâb ǀgûin tawa hâb, tsî ǁnôab, âis ǂnamipe hâb tsînab ge ǃnaira ǀkha nî ūǁnâ.

¹⁶Ob ge pristera ǁîna nî ǂhubi altars ai; ǀaeǁguibas di ǂû-i ge a ǁî, ǀnamǀnamsa ǁamase, kaub hoab ge nî ǃKhūb di.

¹⁷Nēs ge ǀamo ǂnûiǂgāse nî ība, sa ǃhaodi hoade, sa ǁanǃkhaidi hoadi ǃnâ: Kau-i xare-e tsî ǀao-i xare-e du ge ǂû tide!