Read Khoekhoegowab Levitikus 4 Bible Online

Levitikus 4 - Khoekhoegowab bible

Levitikus 4

¹ǃAruǀîb ge ǃKhūba Moseb ǃoa ge mî:

²ǃHoa Israeli ôan ǀkha îts mî: Khoe-i ga ǁoreo, ǃKhūb di mîmāde xu ra ǁhapuse, xūn hîa dīhe tidena ra dīse tsî i ga ǀguis âdi tawa dīsāo,

³tsî pristeri hîa ǂkhauǀkhāhe hâb ga ǁoreo, ǁaes ra ǀhapixas kōse, ob ge ǁnā ǁoreb hîab ge ǁoreb ǃaroma ǁgōb, ūo ǂkham ǁgōba ǃKhūba nî ǁguiba ǁoreǁguibase.

⁴Tsîb ge ǁnā ǁgōba tentoms ǀhûs dis di dao-ams tawa nî sī-ū ǃKhūb di ais aiǃâ, tsîb ge ǃommi âba ǁnā ǁgōb di danas ai nî ǁgui, tsîb ge ǁnā ǁgōba nî ǂā ǃKhūb di ais aiǃâ.

⁵ǁÎs khaoǃgâb ge ǂkhauǀkhāhe hâ pristera ǀaob ǁnā ǁgōb diba ū tsî nî ǁîba tentoms ǀhûs dis tawa ūsī.

⁶Tsîb ge pristera ǀkhunub âba ǁnā ǀaob ǃnâ nî ǂgā; tsîb ge ǁnā ǀaob xa hû ǃnādi kōse nî ǀgapi ǃKhūb di ais aiǃâ, ǂgāmâisab ǃanub dib aiǃâ.

⁷ǁKhātib ge pristera ǁnā ǀaob xa ǀanǀanaltars ǃgâihamxūn dis, ǃKhūb aiǃâ tentoms ǀhûs dis ǃnâ hâs di ǁnâgu ai nî dī; ǃnubaib ge ǁgōb di ǀaob hoaba khauǁguibas di altars, tentoms ǀhûs dis di dao-ams tawa hâs di ǃhūb tawa nî ǂnâxū.

⁸ǃAruǀîb ge ǁnā ǁgōb ǁoreǁguibas dib di kaub hoaba ǁnāpa xu nî ūkhâi, kaub, ǃnāxūna ǃgūǂgā hâb, tsî kaub, ǀgûib tawa hâb hoaba.

⁹Tsî ǀgam ǃnaira tsî kaub, ǁîra ai hâb tsî ǀgûin tawa hâb tsî ǁnôab, âis ǂamai hâbab ge ǃnaira ǀkha nî ūǁnâ,

¹⁰ganganǁguibas di gomaba xu i ra ūkhâihe khami; tsî pristeri ge ǁîba nî ǂhubi khauǁguibas di altars ai.

¹¹Xawe khōb ǁnā ǁgōb dib tsî ǁgans âb hoaba danas âb ǀkha tsî tîra âb ǀkha tsî ǃnāxūn âb tsî ǀharab âb,

¹²tsî ǁnā ǁgōb hoabab ge ǃauga nî ūǂui ǃanu ǃkhais, tsaob ra ǁîs ai tsoroxūhes ǃoa, tsîb ge ǀaes ǀkha ǀaeb ǃnâ nî khauǃkhū bi; tsaob ǁîs ai ǁgoe ǃkhais tawab ge nî khauǃkhūhe.

¹³Tsî ǀhaohâb Israeli dib hoab ga ǁhapuo tsî ǃkhais ga ǀhaohâb mûǁae ǂganǃgâsa io, tsî xū-en ga dīo, ǀnîdi ǃKhūb mîmādi hoadi ǃoagu hâ-e, hîa dīhe tide-e tsîn ga ǀhapixao,

¹⁴tsî ǁnā ǁoreb hîan ge ǁîdi ǃoagu ǁoreb ga ǂansao, ob ge ǀhaohâba ǁgōb, ǂkham ǁgōba ǁoreǁguibase nî ǁguiba tsî nî ǁîba tentoms ǀhûs dis aiǃâ ūsī.

¹⁵O gu ge kaigu ǀhaohâb diga ǃomma nî ǁgui ǁnā ǁgōb di danas ai ǃKhūb di ais aiǃâ; tsî gu ge ǁgōba nî ǂā ǃKhūb di ais aiǃâ.

¹⁶ǁNās khaoǃgâb ge ǁnā ǂkhauǀkhāhe hâ pristera ǁgōb di ǀaob xa tentoms ǀhûs dis tawa nî ūsī.

¹⁷Ob ge pristera ǀkhunub âba ǂgā tsî nî ū ǁnā ǀaob xa; tsîb ge hû ǃnādi kōse nî ǀgapi ǃKhūb di ais aiǃâ ǂgāmâisab aiǃâ.

¹⁸Tsîb ge ǁnā ǀaob xa altars, ǃKhūb di ais aiǃâ hâs, tentoms ǀhûs dis ǃnâ hâs di ǁnâgu ai nî dī; ǃnubaib ge ǀaob hoaba nî ǂnâxū khauǁguibas altars, tentoms ǀhûs dis di dao-ams aiǃâ hâs di ǃhūb ai.

¹⁹Tsîb ge kaub âb hoaba ǁîba xu nî ūkhâi tsî nî altars ai ǂhubi bi.

²⁰Tsîb ge nē ǁgōb ǀkha nî dī ǁoreǁguibas di ǁgōb ǀkhab ge dī khami, ǁnātib ge nî dī-ū bi; tsî pristeri ge ǁîna ǂkhîbagusa nî dība, on ge nî ǀûbahe.

²¹ǁÎs khaoǃgâb ge ǁnā ǁgōba ǁgoeǃkhais kōse ūǂui tsî nî khauǃkhū bi, ǂguro ǁgōbab ge khauǃkhū khami; ǁoreǁguibas ǀhaohâb dis ge a ǁî.

²²Tsî danakhoeb ga ǁore tsîb ga ǁhapu rase ǀguis, ǃKhūb ǁîb Elob di ǃkhâikhomdi hoadi dis, hîa dīhe tidesa dīo, ǀhapixab as kōse,

²³tsîb ga ǁoreb âb hîab ge ǁoreba ǂanǂanheo, ob ge ǁguibas âb ase pirib, ūo aoreba nî ūhā.

²⁴Ob ge ǃommi âba pirib di danas ai ǁgui tsî nî ǂā bi ǁnā ǃkhais, khauǁguibas ra ǁîs ai ǂāhes tawa, ǃKhūb di ais aiǃâ; ǁoreǁguibas ge a ǁî.

²⁵ǃNubaib ge pristera ǁoreǁguibas di ǀaob xa ǀkhunub âb ǀkha ū tsî nî altars khauǁguibas dis di ǁnâgu ai dī; ǁgoasib ge ǀaob âba altars khauǁguibas dis di ǃhūb tawa nî ǂnâxū.

²⁶Tsî kaub âb hoab onab ge altars ai nî ǂhubi ganganǁguibas di kaub khami; nētib ge pristera ǂkhîbagusa nî dībasen ǁoreb âb ǃaroma, ob ge nî ǀûbahe.

²⁷Tsî khoe-i ǁnā ǃhūb ǁaes di-i hoa-i ga ǁhapu rase ǁore tsî i ga dīhe tide xū-e ǀguis, ǃkhâikhomdi hoadi dis ǃoagu dīo, ǀhapixa i as kōse,

²⁸tsî i ga ǁî-i di ǁoreb hîa i ge ǁoreba ǂanǂanheo, o i ge ǁguibas â-i ase ǂkham piriros, ūo tararesa nî ūhā ǁî-i di ǁoreb, hîa i ge ǁoreb ǃaroma.

²⁹Ob ge ǃommi âba ǁoreǁguibas di danas ai nî ǁgui; tsîs ge ǁnā ǁoreǁguibasa nî ǂāhe khauǁguibas di amǃnâs ai.

³⁰Ob ge pristera ǁîb di ǀkhunub ǀkha ǁîs di ǀaob xa ū tsî nî dī khauǁguibas di altars ai; ǃnubaib ge ǁîs di ǀaob hoaba altars di ǃhūb ai nî ǁhōxū.

³¹Tsî ǁîs di kaub hoabab ge nî ūǁnâ, ganganǁguibas di kaub ra ūǁnâhe xase, tsî pristeri ge ǁîba nî ǂhubi altars ai, ǀnamǀnamsa ǁamab ǃKhūb dib ase; nētib ge pristera ǁî-e ǂkhîbagusa nî dība, tsî i ge nî ǀûbahe.

³²Xawe ǁkhao-e i ga ǁguibas â-i ǃnâ ǁoreǁguibas ase ūhāo, o i ge ūo tarare xūse nî ī, ūhā i ra xū-e.

³³O i ge ǁî-i di ǃomma ǁoreǁguibas di danas ai nî ǁgui, tsî i ge ǁîsa ǁoreǁguibase nî ǂā, ǁnā ǃkhais, khauǁguibas ra ǁîs ai ǂāhes tawa.

³⁴ǁNās khaoǃgâb ge pristera ǀkhunub âb ǀkha ǁoreǁguibas di ǀaob xa ū tsî nî altars khauǁguibas dis di ǁnâgu ai dī; ǀaob hoaba altars di ǃhūb ai nî ǂnâxū.

³⁵Tsî ǁîs di kaub hoabab ge nî ūǁnâ, ǁkhaob ganganǁguibas dib di kaub ra ūǁnâhe khami, tsî pristeri ge ǁîba altars ai nî ǂhubi ǃKhūb di ǀaeǁguibadi ai; tsîb ge pristera ǁnāti ǁî-e ǂkhîbagusa nî dība ǁî-i di ǁoreb hîa i ge ǁoreb ǃaroma, o i ge nî ǀûbahe.