Read Khoekhoegowab Levitikus 5 Bible Online

Levitikus 5 - Khoekhoegowab bible

Levitikus 5

¹Tsî khoe-i ga ǁoreo, nūs di domma i ga ǁnâu tsî i ga ǃkhō-amao, mû i kas, ǂan i kas hoasa; ǁî ǃkhaisa i ga ǂanǂan tama hâ io, o i ge ǁî-i di ǀhapisa nî tani.

²Tsî khoe-i ga ǀurisa xū-e tsâǀkhāo, ǁō hâ soros ǃkhausa ǃanuoǃnâ ǀguru-i dis karao, ǁō hâ soros ǃanuoǃnâ ǀgoa-i dis karao, ǁō hâ soros ǃanuoǃnâ ǂhanabe-i dis karao, tsî ǂganǃgâsabahe i ga hâ i xawe i ge a ǃanuoǃnâ tsî a ǀhapixa;

³tsî tsâǀkhā i kao ǃanuosib khoe-i diba, mâ ǃanuosib â-i hoab ka xawe, ǁîb ǀkha i ga ǀurisab tsî ǂganǃgâsabahe i ga hâ i xawe i ga hōǃâo, o i ge a ǀhapixa.

⁴Tsî khoe-i ga nūo, ǁî-i amǁgaukha ǀkha, ǂâiose ra ǃhoase, ǂkhabadī nîses kas, ǃgâidī nîses kas hoasa, khoe-i nūs ǃnâ supuse ra ǃhoa khami; tsî ǂganǃgâsabahe i ga hâ i xawe i ga hōǃâo, o i ge ǀgui-i ân tawa a ǀhapixa.

⁵Tsî ī i kao, ǀgui-i ân tawa i nî ǀhapixa ǃkhaisa, o i ge nî ǁguiǁnâ, ǁî-i ge ǁore ǃkhaisa,

⁶o i ge ǁî-i ge ǁore ǁoreb ǃaroma ǃKhūba ǀhapiǁguiba-e nî ǁguiba, tarare ǀgoa-e, ǁkhao-i karao, ǂkham piris karao, ǁnā ǁoreb ǃaroma; ob ge pristera ǁî-i di ǁoreb ǃaroma ǂkhîbagusa nî dība i.

⁷Tsî ǃommi â-i ga ǁnātikōse hōbasen ǁoao ǀgui ǀgoa-i kōse, o i ge ǁnā ǀhapis, ǁîs ǀkha i ge ǀhapixas ǃaroma ǃKhūba ǁguiba-e nî ǁguiba, ǀgam ǂnaira kas, ǀgam ǂkham ǂnabura kas hoasa, ǀguisa ǁoreǁguibase tsî nausa khauǁguibase.

⁸Tsî i ge ǁî-e pristera nî ūsība; ob ge ǁîba ǁnā-i hîa ǁoreǁguibas di-e nî ǁguiba; ob ge ǁgorob âb ǀkha danas â-e nî ǁkhīǁnâ ǃaob tawa, xawe i ge ǀgora tide.

⁹Tsî ǁoreǁguibas di ǀaob xab ge altars di ǂgoab tawa nî ǀgapi; xawe ǀaob xa ga ǃgau xū-i ge altars di ǃhūb tawa nî ǂnâxūhe; ǁîs ge a ǁoreǁguiba.

¹⁰Tsî nau-eb ge khauǁguibase nî dī ǁî-i dommi ai. Nētib ge pristera ǁore i ge ǁoreb ǃaroma ǂkhîbagusa ǁî-e nî dība, o i ge nî ǀûbahe.

¹¹Xawe ǃommi âb ga ǀgam ǂnaira kas, ǀgam ǂkham ǂnabura kas hoasa mā ǁkhā tama io, o i ge ǁî-i hîa ge ǁore-e ǁî-i di ǁguibasa disiǁî ǃâs ǀgui efab disa tsampereb xa nî mā ǁoreǁguibas ase; ǁî-i ge oliba ǂnâ-ai tide tsî wiroka ǁgui-ai tide, ǁoreǁguibas a amaga.

¹²Tsî i ge ǁîna pristeri tawa nî ūsī, ob ge pristera ǁîn xa ǃomsǀoa-e nî ū ǂâiǂâisenxūse tsî nî ǁîba ǂhubi altars ai, ǃKhūb di ǀaeǁguibadi tawa; ǁoreǁguibas ge a ǁî.

¹³Ob ge pristera ǁî-e ǂkhîbagusa nî dība, ǁî-i ge ǁore ǁoreb â-i ǃaroma nē ǃâdi di ǀguis ǃnâ, tsî i ge nî ǀûbahe; tsî i ge pristeri di nî i, ǂûǁguibas khami.

¹⁴ǃAruǀîb ge ǃKhūba Moseb ǃoa ge mî:

¹⁵Khoe-i ga ǃûǂam tsî ǂkhabusasib ǃnâ ǁoreo, ǃKhūba khaibahe hâ xū-e ra ǀâǃâ, o i ge ǃKhūba ūo bairab gūn diba ǁî-i di ǀhapiǁguibase nî ūhāba, ǃgôas âts ǃoa ǀhaiǀurisekeldi kōse ǀgaus â-iba, ǃanusib di sekeldi ǃoa, ǀhapiǁguibas ase.

¹⁶Tsî i ge ǃanu xūn xa i ge ǁore rase ū-e mādawa-am tsî nî koroǁî ǃâsa dīǀaro, tsî i ge ǁîsa pristera nî mā; nētib ge pristera ǀhapiǁguibas di bairab ǀkha ǂkhîbagusa ǁî-e nî dība, o i ge nî ǀûbahe.

¹⁷Tsî khoe-i ga ǁoreo, tsî ga dīo ǀguis, ǃKhūb mîmādi hoadi dis ǃoagu xū-i hîa dīhe tide-e, tsî ǀū i ka i xawe i ge a ǀhapixa tsî ǁî-i di ǂhanuoǃnâsiba nî tani.

¹⁸Tsî i ge ūo bairab gūn diba pristera nî ūsība sa ǃgôas ǀkha ǀhapiǁguibase; ob ge pristera ǂkhîbagusa nî dī ǁî-i di ǁhapus, ǁîs ǀkhab ge ǁhapus, hîab ge ǀū is ǃaroma; o i ge nî ǀûbahe.

¹⁹ǀHapiǁguibas ge a ǁî; ǂanǂansase i ge ǃKhūb tawa ge ǀhapixa.