Read Khoekhoegowab Levitikus 6 Bible Online

Levitikus 6 - Khoekhoegowab bible

Levitikus 6

¹ǃAruǀîb ge ǃKhūba Moseb ǃoa ge mî:

²Khoe-i ga ǁore tsî i ga ǃûǂams ǀkha ǃKhūb ǃoagu ǃûǂamo, ǀgūkhoeba sâus ǃnâ i ge māhe tsî ǃomǁae i ge dīhe hâ xū-e ra ǀūxūse tsî ǁkhâuǁnâxūn, ǀgaib ǀkha i ge ǀgūkhoeba ūǀhanan,

³tsî kā hâ xū-e i ga hō tsî i ga ǁî ǃkhaisa ǀūxū tsî i ga ǂkhabase nūo, mâ xū-i, khoe-i ga ǁî-e ra dīǃâ ǁore-i hoa-i,

⁴tsî ī i kao, ǁore tsî i ga ǀhapixa ǃkhaisa, o i ge ǁkhâuǁnâxūn hîa i ge ūǀhanana nî ǁkhaeǁnâ, tsî ǀgaib ǀkha i ge ūdawabasen hâ-e, tsî ǁî-i xa ge sâuhe-e, sâu nîse i māhe hâ-e tsî kā hâ ge i tsî ǁî-i xa ge hōhe-e,

⁵tsî ǁnān ǁîn ǃaroma i ge ǂkhabase nūn hoan, ǁîna i ge hoaragase mādawa tsî nî ǁîn ǃgâ-ai koroǁî ǃâsa dīǀaro; ǁnā-i hîa ǁîn di ǀhonkhoe-i, ǁî-e i ge nî mā ǀhapiǁguibas â-i di tsēs ai.

⁶Tsî i ge ǁî-i di ǀhapiǁguibasa ǃKhūba nî ūsība pristeri tawa, ūo bairab gūn diba, ǃgôas âts ǀkha ǀhapiǁguibas ase.

⁷ǃNubaib ge pristera ǁî-e ǂkhîbagusa nî dība ǃKhūb di ais aiǃâ, tsî i ge nî ǀûbahe, mâ xū-i, ǁî-i ga dī-i, ǁî-i tawa i a ǀhapixa-i hoa-i xa.

⁸ǃAruǀîb ge ǃKhūba Moseb ǃoa ge mî:

⁹Mîmā Aronni tsî ǁîb di ôagu tsîga îts mî: Nēb ge ǂhanub khauǁguibas dib: Khauǁguibas ge ǁnā xūs, altars ai tsuxub hoaba ǁgoas kōse ra khauǃapas, ǁnāpas ge ǀaes altars disa nî khauhâhâhe.

¹⁰Ob ge pristera ǁîb di linesaraba nî ana, tsî lineǀnūsaraba ǁîb di ǁgans ai nî ana, tsî tsaoba nî ūkhâi, ǀaes ga khauǁguibasa altars ai haputoao, tsî nî ǁîba altars tawa dī.

¹¹ǁNās khaoǃgâb ge saran âba ǂgaeǂui tsî nî ǀkhara sarana ǂgaeǂgā tsî nî tsaoba ǁgoeǃkhais ǃaugaba ǃoa taniǂoa ǃanu ǃkhai-i tawa.

¹²Tsî ǀaes altars ai hâs ge ǁîs ai nî khauhâhâ kaihe; ǁîs ge ǀarihe tide; tsîb ge pristera mâ ǁgoas hoasa ǀaeba ǂhubi tsî ǁîb ai khauǁguibasa nî ǁāǁā tsî kaub ganganǁguibadi diba ǁîs ai nî ǂhubi.

¹³ǀAes ge altars ai nî khauhâhâ kaihe; ǁîs ge tātsē ǀarihe tide.

¹⁴Tsî nēb ge ǂûǁguibas di ǂhanuba: ǀGuib Aronni ôagu dib ge ǁîsa ǃKhūb di ais aiǃâ nî ǁguiba altars ai.

¹⁵Tsîb ge ǁîs xa ǃommiǀoaba nî ūkhâi, tsampereb ǂûǁguibas diba xu tsî ǁîs di oliba xu tsî wiroki, ǂûǁguibas ai hâb hoaba xu; ǁgoasib ge ǁîna altars ai nî ǂhubi. ǀNamǀnamsa ǁamab ge a ǁî ǂâiǂâisenxūse ǃKhūb aiǃâ.

¹⁶Tsî ǃgau ga xū-i, ǁî-e gu ge Aronni tsî ǁîb di ôagu tsîga nî ǂû; ǀkhuruǀkhuruhe tama hâse i ge nî ǂûhe ǃanu ǃkhai-i tawa; ai-ommi tentoms ǀhûs dis dib ǃnâ gu ge ǁî-e nî ǂû.

¹⁷ǀKhuruǀkhurupereoǃnâse i ge nî ǁganhe. ǁÎgu di amǃnâse ta ge nî tita ǁî-e ge mā gu ti ǀaeǁguibade xu; ǃanusin di ǃanusi i ge a ǁî, ǁoreǁguibas khami, ǀhapiǁguibas khami.

¹⁸Aoreb Aronni ôagu dib hoab ge ǁî-e nî ǂû; ǀamo ǂnûiǂgās ǀaeǁguibadi ǃKhūb didi dise i ge sa ǃhaode nî ība; ǁî-e kara tsâǀkhā-i hoa-i ge nî ǃanu.

¹⁹ǃAruǀîb ge Moseba ǃKhūb ǀkha ǃhoa tsî ge mî:

²⁰Nēs ge ǁguibas Aronni tsî ǁîb ôagu tsîgu dis, ǃKhūba gu nî ǁguibas ǂkhauǀkhāheb ka tsēs ai: Disiǁîǃâs ǀgui efab dis, tsampereb xa ǂûǁguibas ase ǀamos kōse; ǀgui ǃâs âsa ǁgoas ai tsî nau ǃâs âsa ǃuia,

²¹ǁî-i ge amaiǃores ǃnâ olib ǀkha nî dīhe; habaguhe hâsets ge ǁîna nî ūhā; tsî ǁganhe hâ ǃâdi ǂûǁguibas didets ge nî ǁguiba, ǀnamǀnamsa ǁamab ǃKhūb dib ase.

²²Tsî ǁnā pristeri, ǁîb di ôagu xa amǃnâs âb ai nî ǂkhauǀkhāheb ge ǁkhā ǃkhaisa nî dī; ǀamo ǂnûiǂgāses ge nēsa nî ī; hoaragases ge ǃKhūba nî ǂhubibahe.

²³Nētis ge mâ ǂûǁguibas pristeri dis hoasa hoaragase nî khauhe; ǁîs ge ǂûhe tidesa.

²⁴Aiǃâb ǃoab ge ǃKhūba Moseb ǃoa ge mî:

²⁵ǃHoa Aronni tsî ǁîb ôagu ǃoa îts mî: Nēb ge ǂhanub ǁoreǁguibas diba: ǁNā ǃās ǁîs ais ra khauǁguibasa ǂāhes, ǁnāpas ge ǁoreǁguibasa ǃKhūb di ais aiǃâ nî ǂāhe; ǃanusin di ǃanusi-i ge a ǁî.

²⁶ǁNā pristeri hîa ǁî-e ǁoreba ra ǁguibab ge ǁî-e nî ǂû; ǃanu ǃkhais ǃnâ i ge nî ǂûhe, ai-ommi tentoms ǀhûs dis dib ǃnâ.

²⁷ǁÎ-i di ǁgansa ga tsâǀkhā-i hoa-i ge nî ǃanu, tsî ǁî-i di ǀaob xa ga sara-i ai ǀgapi-i, ǁnā xū-i ǁî-i ai ǀgapihe hâ-ets ge ǃanu ǃkhais ǃnâ nî ǁā.

²⁸Tsî ǁnā ǂgoasoa-i ǁî-i ǃnâ i sâihe hâ i ge nî khôahe; xawe ǂaisoa-i ǃnâ i ga sâiheo, o i ge nî ǁnûhe tsî ǁgam-i ǀkha nî ǁāǃnâhe.

²⁹Pristergu ǃnâ hâ aoreb hoab ge ǁî-i ǃnâ nî ǂû; ǃanusin di ǃanusi i ge a ǁî.

³⁰Xawe ǁoreǁguiba-i ǁî-i di ǀaob xa tentoms ǀhûs dis ǃnâ ǂkhîbagu kai nîse nî ūǂgâhe-i xare-i ge ǃanusib ǃnâ ǂûhe tide; ǀaes ǀkha i ge nî khauǃkhūhe.