Read Khoekhoegowab Levitikus 7 Bible Online

Levitikus 7 - Khoekhoegowab bible

Levitikus 7

¹Tsî nēb ge ǂhanub ǀhapiǁguibas dib; ǃanusin di ǃanusi-i ge a ǁî.

²ǁNā ǃkhais, ǁîs tawan ra khauǁguibasa ǂās, ǁnāpan ge ǀhapiǁguibasa nî ǂā, tsî ǀaob âsan ge altarsa nî ǀgapiǂnamipe.

³Tsî i ge ǁîs di kaub hoaba nî ǁguiba, ǂareb tsî ǁnā kaub ǃnāxūna ra ǃgūǂgāb,

⁴tsî ǁkhāti ǀgam ǃnaira tsî ǁnā kaub ǁîra ai hâb, ǀgûin ai hâb tsî ǁnôab, âis ai hâb tsîna; ǃnaira tawan ge nî ūǁnâhe.

⁵Tsî pristeri ge ǁîna altars ai ǃKhūba nî ǂhubiba ǀaeǁguibase; ǀhapiǁguibas ge a ǁî.

⁶Aoreb pristergu dib hoab ge ǁîna nî ǂû; ǃanu ǃkhais tawan ge nî ǂûhe; ǃanusin di ǃanusi i ge a ǁî.

⁷ǁOreǁguibas ī khamis ge ǀhapiǁguibasa nî ī; ǁîra ge ǀgui ǂhanub ǀguiba nî ūhâ, ǁîn ge pristeri dise nî ī, ǁîn ǀkha ǂkhîbagusa ge dība.

⁸ǁKhātib ge pristeri, khoe-i di khauǁguiba-e ra ǁguibab, ǁnāb ge khauǁguibas ǁîb ge ǁguibas di khōba nî ūhâ.

⁹Tsî ǁîn tawa ǂûǁguibas ǁganoms ǃnaga ǁganhes, ketels ǃnâs kas, amaiǃores ǃnâs kara ǁāǁāhes hoas ge pristeri, ǁîsa ra ǁguibab dise nî ī.

¹⁰Tsî mâ ǂûǁguiba-i hoa-i, olib ǀkha i ga ǂnâhe hâs kas, ǂnâsa-i kas, ǁî-i ge Aronni ôagu dise nî ī, nēb di-i kao, naub di-i kao.

¹¹Tsî nēb ge ǂhanub ganganǁguibas, khoen nî ǃKhūba ǁguibas diba.

¹²Khoe-i ga ǁîsa koaǁguibase ǁguibao, o i ge koaǁguibas tawa ǀkhuruǀkhuruoǃnâ ǁganperedan, olib ǀkha ǀhomamhe hân, tsî ǀkhuruǀkhuruoǃnâ ǂhaba peredan olib ǀkha ǂkhauhe hâna nî ǁguiba; tsî nē ǁganperedan ge olib ǀkha ǂkhauhe tsî nî tsampereb ǀkha habahe.

¹³ǁGanperedan xōǀkhā i ge ǁî-i di ǁguibase ǀkhuruǀkhuruhe hâ pereba nî ǁguiba, koaǁguibas ǁî-i gangans dis ase.

¹⁴Tsî i ge ǀguis nē ǁguibas disa ǃKhūba ūkhâiǁguibas ase nî ǁguiba; ǁîs ge ǁnā pristeri, ganganǁguibas ǀaoba ra ǀgapib dise nî ī.

¹⁵Xawe ǁgans koaǁguibas ǁî-i gangans dis ge ǁîs ra ǁguibahe tsēs ai nî ǂûhe; ǁîs xa i ge xū-i xare-e ǃgauhe tide ǁgoas kōse.

¹⁶Tsî ǁî-i ǁguibas di ǂāǁguibas ga mîmâi io, māsenxa ǁguiba-i ka io, ǁîs ge ǁî-i di ǁguibasa ra ǁguiba tsēs ai nî ǂûhe; tsî ǃgau ka xū-i ge sao ra tsēs ai nî ǂûhe.

¹⁷Tsî ǁgans ǂāǁguibas disa ga gorose ǃgau-i: ǁÎ-i ge ǃnonaǁî tsēs ai ǀaes ǀkha nî khauǃkhūhe.

¹⁸Tsî ǁnā ǁgans ǁî-i ganganǁguibas dis xa ga ǃnonaǁî tsēs ai xūro-e ǂûheo, o i ge ǁguiba ge-e ǃgâibahe tide, o i ge ǃgôabahe tide; ǁgaiǁgaisa xūse i ge nî ī; tsî ǁnā ǀoms ǁîs xa ga ǂûs ge ǁîs di ǂhanuoǃnâsiba nî tani.

¹⁹Tsî ǁnā ǁgans ǃanuoǃnâ xū-i ga tsâǀkhās ge ǂûhe tide tsî nî ǀaes ǀkha khauǃkhūhe; tsî nau ǁgans xasa, ǁîs xa i ge ǃanu ka-i hoa-e ǂû ǁkhā,

²⁰xawe ǀom-i ga ganganǁguibas di ǁgans hîa ǃKhūb dis xa ǂû, tsî i ga ǃanuoǃnâo, o i ge ǁnā ǀom-e ǁî-i ǁaede xu nî ǃhomǂuihe.

²¹Tsî ǀom-i ga ǃanuoǃnâ xū-e tsâǀkhāo, khoe-i di ǃanuoǃnâsi-i kao, ǀurisa ǀgoa-i di-i kao, tsî ǀnî ǃanuoǃnâ ǁgaixū-i kao, tsî i ga ganganǁguibas, hîa ǃKhūb dis di ǁgans xa ǂûo, o i ge ǁnā ǀom-e ǁî-i ǁaede xu nî ǃhomǂuihe.

²²ǁNās khaoǃgâb ge ǃKhūba Moseb ǃoa ge mî:

²³ǃHoa-ū Israeli ôana îts mî: Kau-i gomab di-i kas, gūb di-i kas, pirib di-i kas hoasats ge ǂû tide.

²⁴Tsî kaub ǁō hâ soros dib kao, tsî kaub ǀkhauǃāhe hâ xū-i dib kao, ǁîb ge sîsenūhe ǁkhā mâ sîsenni hoab ǃoa; xawe du ge ǁîba ǂû tide.

²⁵Mâ-i ǃKhūba ǀaeǁguibase ǁguibahe hâ ǀgoan di kaub xa ga ǂû-i hoa-i, ǁnā-i di ǀoms, hîa ǁîba ge ǂûs ge ǁîs di ǁaedi hoade xu nî ǃhomǂuihe.

²⁶Tsî du ge ǁkhāti sadu di ǁanǃkhaidi hoadi ǃnâ ǀao-i xare-e ǂû tide, anin di-i karao ǀgoan di-i karao.

²⁷Mâ ǀoms ǀao-i xa ga ǂûs hoas ge ǁîs di ǁaede xu nî ǃhomǂuihe.

²⁸ǃAruǀîb ge ǃKhūba Moseb ǃoa ge mî:

²⁹ǃHoa Israeli ôan ǀkha îts mî: ǃKhūba ga ganganǁguibas â-e ǁguiba ǂgao-i, ǁnā-i ge ǁî-i ganganǁguibas di ǁguibaxūna ǃKhūba nî ūhāba.

³⁰ǁÎ-i di ǃomkha ge ǀaeǁguibadi ǃKhūb dide nî ūhā; kaub, ǁkhaib tawa hâba i ge ǁkhaib ǀkha nî ūhā; gongonǁguibase i ǁîba nî gongonse ǃKhūb di ais aiǃâ.

³¹Tsî pristeri ge ǁnā kauba altars ai nî ǂhubi, xawe ǁkhaib ge nî Aronni tsî ǁîb ôagu di.

³²Tsî du ge ǁkhāti amǀkhāb ǁgaraba ūkhâiǁguibase pristera nî mā sadu di ganganǁguibade xu.

³³Aronni ôagu xa ga ganganǁguibas di ǀaob tsî kaub tsîkha ǁguibab, ǁîb ge amǀkhāb ǁgaraba ǁîb di amǃnâse nî hō.

³⁴Gongonǁkhaib tsî ūkhâiǁgarab tsîkha ta ge tita Israeli ôan xa ǁîn di ganganǁguibade xu ū tsî ǁîkha Aronni pristeri tsî ǁîb di ôaga ǀamo ǂnûiǂgāse ge mā Israeli ôan xa.

³⁵Nēs ge ǂkhauǀkhās Aronni dis tsî ǂkhauǀkhās ǁîb ôagu dis ǀaeǁguibadi ǃKhūb didi xa, ǁîgab ge ǁîba ǀgū tsēs ai, pristersise gu nî ǃKhūba ǃoabase.

³⁶ǁÎsab ge ǃKhūba ge mîmā, Israeli ôan xa gu nî māhe ǃkhaisa, ǁîb ge ǁîga ǂkhauǀkhā tsēs ai; ǁîsa as ǀamo ǂnûiǂgāse ība ǃhaodi âna.

³⁷Nēb ge ǂhanub khauǁguibas dib, ǂûǁguibas dib, ǁoreǁguibas dib, ǀhapiǁguibas dib, ǀoaǀoaǁguibas tsî ganganǁguibas dib,

³⁸ǃKhūb ge Sinaiǃhommi ai Moseba mîmāb ǁnā tsēs, ǁîs aib ge Israeli ôana mîmās, ǃKhūban nî ǁguibadi âna Sinaib di ǃgaroǃhūb ǃnâ ǁguibasa.