Read Khoekhoegowab Levitikus 8 Bible Online

Levitikus 8 - Khoekhoegowab bible

Levitikus 8

¹ǃAruǀîb ge ǃKhūba Moseb ǃoa ge mî:

²Ū Aronni tsî ǁîb ôagu tsîga, tsî saran tsî ǂkhau-olib tsî ǁoreǁguibas di ǁgōb tsî ǀgam bairakha tsî ǀkhuruǀkhuruhe tama peren di ǀharus tsîna.

³Îts ǀhaohâb hoaba ǀhûǀhû tentoms ǀhûs dis di dao-ams aiǃâ.

⁴Ob ge Moseba ge dī, ǃKhūb ge mîba bi khami; ob ge ǀhaohâba ge ǀhaoǀhaohe, tentoms ǀhûs dis di dao-ams aiǃâ.

⁵ǃNubaib ge Moseba ǀhaohâb ǃoa ge mî: Nēs ge ǁnā ǃkhais, ǃKhūb ge mîmāsa, dīhe nîse.

⁶ǁGoasib ge Moseba Aronni tsî ǁîb di ôagu tsîga ǀgū kai tsî ǁîga ǁgam-i ǀkha gere ǁā.

⁷Ob ge saraba ǁîba ge ana tsî ǃgaesenni ǀkha ge ǃgae bi tsî anaǂamxūba ge ǂgaeǂgā bi; ǁkhātib ge efoba ge ana bi tsî ǁîba efob di ǁāǁāǁkhāsa ǃhâub ǀkha ge ǃgae tsî ǁnāti ge ǃgaeǂnamipe bi ǁîb ǀkha.

⁸Tsîb ge ǁkhaib di ǃkhaiba ge ǂgaeǂgā bi tsî ǁkhaib di ǃkhaib tawa Urims tsî Tumims tsîra ge ǃgaeǁapo.

⁹Tsîb ge hūsa danas âb ai ge ǂnûi; tsî hūs tawab ge ais âb ǂamai ǃhuniǀuriǀuris, ǃanusib di ǀgapasa ge ǂnûi, ǃKhūb ge Moseba mîmā khami.

¹⁰ǃNubaib ge Moseba ǂkhau-oliba ū tsî tabernakeli tsî ǁîb ǃnâ hân hoana ǂkhau tsî ǁnāti ge khai si.

¹¹Tsîb ge ǁîb xa hû ǃnādi kōse altars ai ge ǀgapi; tsîb ge altars tsî ǁîs di sîsenūdan hoan, ǁāǃnâǃores tsî ǂais âs tsîna gere ǂkhau, ǁîsab nî khaise.

¹²ǁÎs khaoǃgâb ge ǂkhau-olib xa Aronni di danas ai ǂnâ tsî ge ǂkhau bi, ǁîbab nî khaiga.

¹³ǁKhātib ge Moseba, Aronni ôaga ǀgū kai tsî sarana ge ana gu tsî ǃgaesenni ǀkha ge ǃgae gu tsî ǀgapade ge ǀgapa gu, ǃKhūb ge Moseba mîmā khami.

¹⁴ǃNubaib ge ǁgōb ǁoreǁguibas diba ge hā kai, tsî Aronni tsî ǁîb di ôagu ge ǃomgu âga ǁgōb ǁoreǁguibas dib di danas ai ge ǁgui.

¹⁵Tsîb ge ge ǂāhe; ob ge Moseba ǀaob âba ū tsî ǀkhunub âb ǀkha ǁîba ǁnâgu altars digu ǂnamipe dī tsî altarsa ge khai; ǁnās khaoǃgâb ge ǀaoba ǂnâxū altars di ǃhūb tawa tsî ge khai bi, ǂkhîbagusab nî dība bise.

¹⁶ǁGoasib ge kaub ǃnāxūn ai hâb hoaba ge ū tsî âis ai hâ ǁnôab tsî ǀgam ǃnaira tsî ǁîra di kaub tsîna; tsî Moseb ge ǁîna altars ai ge ǂhubi.

¹⁷Xawe ǁgōb khōb âb ǀkha tsî ǁîb di ǁgans tsî ǁîb di ǀharab tsînab ge ǁgoeǃkhais ǃauga ǀaes ǀkha ge khauǃkhū, ǃKhūb ge Moseba mîmā khami.

¹⁸ǁNās khaoǃgâb ge bairab khauǁguibas diba ge ūhā kai; tsî Aronni tsî ǁîb di ôagu tsîgu ge ǃomgu âga bairab di danas ai ge ǁgui.

¹⁹Tsîb ge ge ǂāhe; tsî Moseb ge ǀaoba altars ǂnamipe ge ǀgapi.

²⁰Tsîb ge ǁkhāti bairaba ǃâdi âb ǃnâ ge ǀgora; tsî Moseb ge danasa ge ǂhubi tsî ǁnā ǃâdi tsî kaub tsîna.

²¹Xawe ǃnāxūn tsî tîra tsînab ge ǁgam-i ǀkha ge ǁā; tsî Moseb ge ǁnā bairab hoaba altars ai ge ǂhubi; ǁîs ge khauǁguiba ge i ǀnamǀnamsa ǁamab ǃoa, ǀaeǁguibas ge ǁîsa, ǃKhūb ge dībahesa, ǃKhūb ge Moseba mîmā khami.

²²ǁNās khaoǃgâb ge nau bairab, ǀoaǀoaǁguibas di bairaba ge ūhā kai; tsî Aronni tsî ǁîb di ôagu tsîgu ge ǃomgu âga bairab di danas ai ge ǁgui.

²³Tsî gu ge ge ǂā bi; ob ge Moseba ǀaob âb xa ū tsî Aronni amǀkhāb di ǂgaeǂaos ai ge dī, tsî kaitsiǁgubes ǁîb amǀkhāb ǃommi dis ai tsî kaitsiǁgubes ǁîb amǀkhāb ǂais dis ai.

²⁴Tsîb ge ǁkhāti Aronni di ôaga ge ǀgū kai; tsî Moseb ge ǀaob xa ǁîgu amǀkhāb ǂgaeǂhuris ai ge dī, tsî kaitsiǁgubes ǁîgu amǀkhāb ǃommi dis ai, tsî kaitsiǁgubes ǁîgu amǀkhāb ǂais dis ai; ǁîs khaoǃgâb ge Moseba ǀaoba altars ǂnamipe ge ǀgapi.

²⁵Tsîb ge kauba ge ū tsî ǂareb tsî ǃnāxūn tawa hâ kaub hoab tsî âis di ǁnôab tsî ǀgam ǃnaira tsî ǁîra di kaub tsî amǀkhāb ǁgarab ona.

²⁶Tsîb ge ǁkhāti ǃKhūb di ais aiǃâ hâ ǀharus ǀkhuruǀkhuruhe tama peren disa xu ǀkhuruǀkhuruhe tama ǁganpere-i tsî olib ǀkha ǂkhauhe hâ ǁganpere-i tsî ǂhaba pere-i tsîna ge ū; tsîb ge ǁîna kaub ai ge ǁgui tsî amǀkhāb ǁgarab ai,

²⁷tsîb ge ǁîn hoana Aronni ǃomǁae ge mā tsî ǁîb di ôagu ǃomǁae, tsîb ge ǁîna gongonǁguibase ge gongon ǃKhūb di ais aiǃâ.

²⁸ǁNās khaoǃgâb ge Moseba ǁîna ǁîgu ǃomǁaeba xu ū tsî altars ai ge ǂhubi, khauǁguibas di altars ai; ǁîn ge ǀoaǀoaǁguiba ge i ǀnamǀnamsa ǁamab ase; ǀaeǁguibases ge ǃKhūba ge ība.

²⁹Aiǃâb ǃoab ge Moseba ǁkhaiba ū tsî ǁîba gongonǁguibase ǃKhūb di ais aiǃâ ge gongon; ǁîb ge Moseb di amǃnâ kai ǀoaǀoaǁguibas di bairab xa, ǃKhūb ge Moseba mîmā khami.

³⁰Moseb ge ǁkhāti ǂkhau-olib tsî ǀaob, hîa altars ai hâb xa ū tsî ge ǀgapi Aronni ai tsî ǁîb di saran ai tsî ǁîb di ôagu ai tsî ǁîb ôagu di saran tsîn ai ǁîb ǀkha; tsîb ge Aronna ge khai tsî ǁîb di saran tsî ǁîb di ôagu tsî ǁîb ôagu di saran tsîna ǁîb ǀkha.

³¹Ob ge Moseba Aronni ǃoa tsî ǁîb di ôagu ǃoa ge mî: Sâi nē ǁgansa tentoms ǀhûs dis di dao-ams aiǃâ, î go ǁîsa ǁnāpa ǂû ǁnā pereb ǀoaǀoaǁguibas di ǀharus ǃnâ hâb ǀkha, mîmā ta ge khami, mî raǃâ: Aronni tsî ǁîb di ôagu tsîgu ge ǁîsa nî ǂû.

³²Xawe ǁgans tsî pereb tsîra xa ga ǃgau-i ge ǀaes ǀkha nî khauǃkhūhe.

³³ǁKhātits ge hû tsēdi kōse tentoms ǀhûs dis di dao-amsa xu ǂoa tide, sa ǀoaǀoaǁguibas di tsēdi nî ǀoas kōse; hû tsēdi kōse gu ge sago di ǃomga nî ǀoaǀoahe xuige.

³⁴Nētsē goro dīhes ǁkhās khamib ge ǃKhūba dīsa ge mîmā, sagob nî ǂkhîbagusa dībaga.

³⁵O go ge hû tsēdi kōse tsēa tsî tsuxuba tentoms ǀhûs dis di dao-ams tawa hâ tsî nî ǃKhūb di ǃûisa ǃûi, ǁō go tidega, nēti ta ge mîmāhe xui-ao.

³⁶O gu ge Aronni tsî ǁîb di ôagu tsîga ǁnā xūn, ǃKhūb ge Moseb di ǃoabasa xu mîmān hoana gere dī.