Read Khoekhoegowab Jeremiab 10 Bible Online

Jeremiab 10 - Khoekhoegowab bible

Jeremiab 10

¹ǁNâu du re ǁnā mîs ǃKhūb ra sadu ǃoa ǃhoasa, sadu Israeli ommi dido.

²Nētib ra ǃKhūba mî: Tā daob ǀūben diba ǁkhāǁkhāsen, î du tā ǃhuri ǀhommi saodi xa, ǀūben ra ǁîn xa ǃhuri amaga.

³ǂNûiǂgādi ǁaedi didi a ǁau xui-ao; hai-i ǃaub ǃnân ge ǁhā-i, sîsenai-i kuru-aob ǃomkha di-i ge a ǁî ǃōs ǀkha dīhe hâ-e.

⁴ǀHaiǀurib tsî ǃhuniǀurib tsîkha ǀkhan ra ǁî-e ani; ǂnūǀuridan tsî hamerdi tsîn ǀkhan ra ǁî-e ǁapoǁapo, ǁnope i tidega.

⁵ǁÎn ǁgôa-elogu ge ǃaoǃao-ūxūb tôaǃhanab ǃnâ mâb khami ī, ǁîn ge a ǃhoa ǁoa; ǁîn ge ra tanihe, ǃgû ǁoan a amaga. Tā ǁîna ǃao, ǁîn a ǂkhôadī ǁoa xuige, ǁkhātis ge ǃgâidīsa ǁîn tawa a ǀkhai.

⁶Khoe-i xare-i sats ǃKhūts khami ī tama; xui-aots ge satsa a kai, tsî ǀons âts ge kaise a ǁkhā.

⁷Tari-e kha ǃao tsi tide, sats ǁaedi di gao-aotsa! Sats ge ǁîsa a anu xui-ao; gā-aigu ǃhaodi digu hoagu ǃnâ tsî ǁîn gaosis hoas ǃnâb ge ǀguib sats khami īb xareba a ǀkhai.

⁸ǁÎn ge hoatsama a ǁnâuǃāoǃnâ tsî a gâre; ǁgoatsuiǁgoan ǁkhāǁkhās ge a ǁau; ǁîn ge a hai.

⁹ǀHaiǀurib ra Tarsisa xu ūhāhe, tsî ǃhuniǀuriba Ufaba xu, ǀuriǂnau-aob di sîsenni ge tsî tsunitsuni-aob ǃommi sîsenni ge. ǀHommiǂhoab tsî purpuri tsîkha ge a ǁîn di sara, hoatsaman ge a gā-ain sîsenai.

¹⁰Xawe ǃKhūb ge a ama Elo; ǁîb ge a ûitsama Elo tsî ǀamo gao-ao, ǁîb di ǁgôasib aiǃâb ra ǃhūbaiba ǀkhū; tsî ǁaedi ge ǁaib âba a tani ǁoa.

¹¹ǁNātits ge ǁîna nî mîǀî: Elogu hîa ǀhommi tsî ǃhūbaib tsîkha dī tamagu, ǁîgu ge nîra kā ǃhūbaiba xu tsî nē ǀhommi ǃnagaba xu.

¹²ǁNāb, ǃhūba ǀgaib âb ǀkha ge dīb tsî ǃhūbaiba gā-aisib âb ǀkha ge ǁāǁāb tsî ǀhomma ǁnâuǃāb âb ǀkha ge ǃāǂuiba.

¹³ǁÎb dommab ga ǀō kaio, ob ge ǁgamgu ǀōba ǀhommi ǃnâ hâ. Ob ra ǀauba ǂoaxa kai ǃhūbaib di ǀamsa xu. Napab tsî ǀapib tsîkhab ra ǁîba dī, tsîb ra ǂoaba ǀkhī kai ǁîb ǁui-omga xu.

¹⁴Mâ khoe-i hoa-i ge a gâre tsî; ǁnâuǃā-e i ūhâ tama hâ, mâ ǃhuniǀurikuru-aob hoab ge ǃgaohesa īb xa ge tao kaihe, ǂnâhesa īb âb a ǂhumi xui-ao, tsî gaga-i xare-i ge ǁîb ǃnâ a ǀkhai.

¹⁵ǁÎn ge a ǁau tsî ǂgaeǂhapus di sîsenai; ǁîn ra ôaǃnâhe ǁaeb ain ra kābē.

¹⁶Jakob amǃnâs ge ǁîn dis khami ī tama hâ, ǁîb a hoan kuru-ao amaga, tsî Israeli ge a ǀumis âb di ǃgao; ǃKhūb ǂnubidi dib, tib ge ǀon hâ.

¹⁷Sa ǃgaeǀkhāde ǃhūba xu ūkhâi, sats ǃkhōsis ǃnâ ûi hâtse.

¹⁸Nētib ra ǃKhūba mî xuige: Mû, tita ge ǁansaben nē ǃhūb dina nîra ǂnoaxū; tsî ǁîna nîra ǂōǂō, ǁîsan nî hōǃâga.

¹⁹Tsūba te ti ǂkhôas ǂama! Ti ǀhapidi ge a tsûsa! Xawe ta ge tita: Nēb ge a ǁō-ai, a ta ǁîba tani, ti ge mî.

²⁰Ti tentoms ge hîǀhuruhe hâ; ti tsurigu hoagu ge ǃgâu hâ. Ti ôan ge tita xu ge ǃgû, tsîn ge a ǀkhai; ǀgui-i xare-i ti tentomsa nî ǂnaumâiba te-i tsî xordainǃkhaiga nî ǂgāmâiba te-i ge a ǀkhai.

²¹ǃÛi-aogu ge ge ǁnâuǃā, tsî gu ge ǃKhūba ôa tama ge i; ǃkhais ǃaroma gu ge gā-aise sîsen tama hâ, tsîn ge ǁîgu di gūn hoana ge ǀgaruǀgaruhe.

²²ǁNâu gommi ra hā tsî kai ǂkhupiba ǀapas di ǃhūba xu. ǃĀdi Judab diden nî ǃū-aisa kaise tsî ǀgirin di ǁanǃkhaise dīse.

²³Tita ge a ǂan, ǃKhūtse, daob âb khoeb di tama ǃkhaisa; khoeb ǃgû rab di ǃkhai tamas ge, matis ǃgûs âba nî īsa.

²⁴ǁKhara te re ǃKhūtse, xawe ǁîsa ǀgaus ai dī, îts tā sa ǁaib ǃnâ dī, îts tā hîkākā te.

²⁵ǁHōǂui ǁgôasib âtsa ǁaedi satsa a ǀūdi ǂama, tsî ǁnā ǁaedi sa ǀonsa ǂgaiǀî tamadi ǂama. ǁÎn ge ǁnān Jakoba ge hapun tsî ǁîba ge dīkākān tsî ǁanǃkhais âba ge hîǀhuruna.