Read Khoekhoegowab Jeremiab 11 Bible Online

Jeremiab 11 - Khoekhoegowab bible

Jeremiab 11

¹Mîs Jeremiaba ǃKhūba xu ge hābas mî raǃâ:

²ǁNâu du re mîdi nē ǃgaeǀhaos dide, î du ǃhoa Judab aogu tsî Jerusalems ǁansaben ǃoa.

³Mî re ǁîna ǃoa: Nētib ra ǃKhūb Israeli Eloba mî: Ab ǀâxarexūhe ǁnā khoeb, nē ǃgaeǀhaos di mîde ǃgâ tamaba,

⁴sadu îga ta ge tita mîmāsa, Egipteǃhūb di ǂnūǀuriǁganomsa xu ta ge ǁîga ǂgaeǂguiǂui ǃnubai, mî rase: Ti domma ǁnâuǀnam î du ǁîba dī, sado ta ge tita mîmān hoan ǃoa, o du ge tita ǁaese nîra ība, o ta ge tita sado Elose nîra ība.

⁵ǁNā nūs, sadu îga ta ge nūbasa ta nî ǁapoǁapose, ǃhū-i daib tsî danib tsîkha ra dâuǃnâ-e ta nîra mā du ti, nētsē i ī xase. ǃNubai ta ge tita: Amen, ti ǃKhūtse, ti ge mî.

⁶Ob ge ǃKhūba tita ǁga ge mî: ǂGaiǂui re nē mîdi hoade Judab di ǃādi ǃnâ tsî Jerusalems ǃgangu ǃnâ, îts mî: Mîdi ǃgaeǀhaos dide ǁnâu, î du ǁîde dī.

⁷Tita ge sadu îga ǁkhōse ge ǃkhâikhom, Egipteǃhūba xu ta ge ǁîna ǂgaeǂguiǂui tsēsa xu nētsēs kōse, ǃnauǁgoaga khâi tsî ta ǀhûguitimî tsî: Î du ti domma ǁnâu ti ra mîǃâ.

⁸Xawe ǁîn ge ǁnâu tama tsî ǂgaes âna ǂō tama ge i, tsîn ge mâ-i hoa-i âna ǁîn ǂkhaba ǂgaob di karokarosens ǃoa gere tanisen, ǁnā-amaga ta ge ǁîna mîdi nē ǃgaeǀhaos, dīn nîga ta ge ǁîna mîmā, xawen dī tamas didi hoade ge hāǂam kai.

⁹ǃAruǀîb ge ǃKhūba tita ǃoa ge mî: ǀHûlguitimî-i ge Judab aogu ǃnâ tsî Jerusalems ǁansaben tsîn ǃnâ ge hōhe.

¹⁰ǁÎn ge ǂhanuoǃnâsigu, abogu ti mîde ǁnâuǀnam tamagu, digu ǁga ge oa; on ge ǀkhara eloga ge saoǃgon, ǁîgan nî ǃoabase: Israeli ommi tsî Judab ommi ge ti ǃgaeǀhaos, ǁîn îgu ǀkha ta ge dīsa ge khôa.

¹¹ǁNā-amagab ra ǃKhūba nēti mî: Mû, tita ge ǂkhaba-e ǁîn ǂama ra ūhā, ǁî-e xun ǂoaxa ǁkhā tide-e; ǁnāǃnubain ga tita ǂgaiǀîo, o ta ge tita ǁîna ǁnâu-am tide.

¹²ǃNubain ge ǃādi Judab didi tsî ǁansaben Jerusalems din tsîna ǃgû tsî nîra ǂgaiǀî ǁnā eloga, ǁîn ge re ǀanǀanbaga, xawe ǁîgu ge ǁîna hoaragase ore ǁkhā tide, ǂkhabab ân di tsēs ai.

¹³Sa ǃādi a ǂguis kōse gu ge elogu âtsa ǂgui ge i, Judatse, tsî ǃgangu Jerusalems digu a ǂguis kōse du ge ǁnā taotaosiba altarde ge mâiba, altarde Baala du nî ǀanǀanbase.

¹⁴Satsa ǁnâi tā nē ǁaesa ǀgoreba, îts tā ǁîna ǀkhomabas tsî ǀgorebas tsîra dība; tita ǁnâu tide xuige, ǁîn ǂkhabab di ǁaeb ain ga tita ǃoa ǂgaio.

¹⁵Ti ǀnamsabesa kha tarebe dīxū-es ǁnâi ūhâ ti ommi ǃnâ, ǂguin ǀkhas ra ǁnā taotaosa ǃkhaisa dī. ǂGui dīgu tsî ǁguibas ǁgan-e sa ǂkhabadīga ūbēn nî? ǂKhabasets ra dī, ots ra dâb xa urikhâi.

¹⁶ǃKhūb ge satsa ǃam ǀkherahaib îsab, ǃgâi ǂûna ūhâb, ti ge ǂgai. Xaweb ge ǁîba nēsi ǀōb kai ǂkhupib dib ǀkha ǀae-e ǁîb ǃnaga ge ǂhubi, o gu ge ǁnâugu âba nîra khôa.

¹⁷ǃKhūb ǂnubidi dib, satsa ge ǂgāb, ǁîb ge ǂkhaba-e sa ǂama ge ǃhoaǂui xui-ao, ǂkhabasib Israeli ommi dib tsî Judab ommi dib ǂama, ǁîna ge dība, titan nî ǁaiǁaiga Baala ra ǀanǀanbase.

¹⁸ǃKhūb ge tita ǁîsa ge ǂanǂan, ǂan ta nîga, ǃnubaits ge satsa dīgu âna ge mû kai te.

¹⁹Tsî tita ge ǁkhaob ǂāhe nîse ra ǂgaeǂguiheb khami ge ī; tsî ta ge ǀū ge i ǀapeden ra ti ǃoagu ǂâi ǃkhaisa: A da haisa ǂûn âs ǀkha hîkākā; î da ǁîsa ǃhūb ûitsaman diba xu ǃhomǂui, ǀons âs ǃaruǀî ǂâihe tidese ti.

²⁰Xawe sats ǃKhūts ǂnubidi dits ǂhanu-ai ǂhanuǂhanu-aots, ǃnaidi tsî ǂgaob tsîna ra ǃâitsâtse, a ta sa ǀkhaoba ǁîn tawa mû, satsa ta ge ti ǂnoaguǃkhaisa ǂhaiǂhaiba xuige.

²¹ǁNā-amaga, nētib ra ǃKhūba mî, ǁnā aogu Anatots digu, sa ǀomsa ra ôagu xa: Tā kēbo re ǃKhūb di ǀons ǃnâ, îts tā sige ǃomǁae ǁō ti ra mîse.

²²ǁNā-amaga, nētib ra ǃKhūb ǂnubidi diba mî: Mû, tita ge ôaǃnâsa ǁîn ǂama nîra dī. ǂKham khoegu ge gôab xa nîra ǁnā. ǁÎn ôagu tsî ǁîn ôadi tsîn ge ǃâtsūǀkhāb xa nîra ǁō.

²³Tsîn ge ǃgauro-i xare-e ūhâbasen tide, tita ge aogu Anatots digu ǂama ǂkhaba-e nîra ūhā xui-ao, kurib ôaǃnâs âgu dib ǃnâ.