Read Khoekhoegowab Jeremiab 13 Bible Online

Jeremiab 13 - Khoekhoegowab bible

Jeremiab 13

¹Nētib ge ǃKhūba tita ǁga ge mî: ǃGû îts ǃuri ǃkhaiǃgaesenna sī ǁamabasen, îts ǁîba sa kamanab ai ǃgae, xawe tā ǁîba ǁgam-i ǃnâ ǂgā.

²O ta ge ǃKhūb di mîs ǃoa ǃgaesenna ge ǁamabasen, tsî kamanab ai ge ǃgaesen.

³ǃNubais ge mîs ǃKhūb disa ǀgamǁî ǃnāsa tita ge hāba, mî raǃâ:

⁴Ū ǁnā ǃgaesenni, hîats ge ǁamabasenni tsî kamanab âts ai hâba, îts khâi tsî ǃgû Eufratǃāb ǃoa, îts ǁîba ǁnāpa sī sâu ǃhao-i di ǁhāb ǃnâ.

⁵O ta ge ǃgû tsî ǁîba Eufratǃāb tawa ge sâu, ǃKhūb ge tita mîmās xase.

⁶O i ge ǂgui tsēdi di ǀunis ai ge ī, ǃKhūb ge tita ǁga mîsa: Khâi îts ǃgû Eufratǃāb ǁga, îts ǃgaesenna ǁnāpa xu ū, ǁnāpats nî sâu ǃkhaisa ta ge mîmā tsiba.

⁷O ta ge Eufrati ǃoa ǃgû tsî khao tsî ǃgaesenna tita ge sâu ǃkhaisa xu ge ū, tsî mû, ǃgaesenni ge ǁgao tsî sîsenūhe ǁoa ge i.

⁸ǁGoasis ge mîs ǃKhūb disa tita hāba tsî ge mî:

⁹Nētib ra ǃKhūba mî: Nēti ta ge tita ǃguriǂgaoxasib Judab diba nîra ǁgaoǁgao tsî ǁnā kai ǃguriǂgaoxasib Jerusalems diba.

¹⁰ǁÎ ǃkhaisa as ǁnâu ǁnā ǂkhaba ǁaes, ti mîsa ǁnâusa ra ǂkhāsa, tsūǂâibasens ǁîn ǂgaob dis ǃnâ ra ǃgûsa, tsî ǀkhara eloga ra saoǃgonsa, ǁîgan nî ǃoabase tsî ǁîgu aiǃân nî ǃhonǁgoase, ǁîs ge nē ǃgaesenni, hîa a sîsenūhe ǁoab khami nîra ī kaihe.

¹¹ǃGaesenni khoeb di kamanab ai ra ǂaes ǁkhās khami ta ge tita Israeli ommi hoab tsî Judab ommi hoaba ti ai ge ǂae kai, tib ra ǃKhūba mî, titan nî ǁaese tsî ǀonse tsî koase tsî ǂkhaisise ībase. Xawen ge ǁnâu tama ge i.

¹²ǁNā-amaga ǃhoa nē mîsa ǁîn ǁga: Nētib ra mî ǃKhūb Israeli di Eloba: Xapadi hoadi ge ǂauxûib ǀkha nîra ǀoaǀoahe. On ge ǁîna: ǂAn tama da kha hâ, xapadi hoadi nî ǂauxûib ǀkha ǀoaǀoahe ǃkhaisa? ti nîra mîǀî tsi.

¹³Xawets ge satsa ǁîn ǃoa nî mî: Nētib ra ǃKhūba mî: Tita ge ǁansaben nē ǃhūb din hoan tsî ǁnā gao-aogu, Daviba trons âb ai ǂnôabagu on tsî pristergu tsî kēbo-aogu tsî Jerusalems ǁansaben hoana āǀhorosib ǀkha nîra ǀoaǀoa.

¹⁴Tsî tita ge ǁîna nîra ǂnauǂkhūǂkhū, nē-e nau-i ǃoa-ai, ǁgûgu tsî ǀgôagu tsîn hoana, tib ra ǃKhūba mî. Tita ge sâu tsî ǀkhom tsî ǀkhomxaǂgao tide, ǁîna ta nî hîkākāsa.

¹⁵ǁNâu î du ǁnâuhō, î du tā ǃguriǃgurisen, ǃKhūb go ǁî ǃkhaisa ǃhoa xuige.

¹⁶ǃKhūb sadu Eloba ǃgôasiba mā ǁîb nî ǃkhae kais aiǃâ, sadu ǂaidi nî ǃhomgu ai ǃnomsens aiǃâ, ǃnâba du ra ǃâubasen hîa, îb tā ǁîba ǁōb sommi ase ǂnûi, îb tā ǁîba ǃkhaenase ǂnûi.

¹⁷Tsî ǁîsa du ga ganupe ǁnâu tama io, os ge ti ǀomsa ǂganǃgâsa ǃkhaidi ǃnâ nîra ā ǃgurib xa, os ge ti mûsa ause nîra ā, tsî ti ǁgamrogu ge nîra ǂnâ, ǃKhūb di gūn ge ǃkhōsase ǃgû-ūhe xui-ao.

¹⁸Mîba gao-aob tsî gao-aos tsîra: ǃGamǃgamsen î ro ǂnû, saro di dana-anixūs hoas, gao-aoǀgapas ǂkhaisib dis go ǁnā xuige.

¹⁹ǃĀdi ǃkhawagas didi ge ǂganamhe hâ, tsî khoe-i, ǁîde nî ǁkhowa-am-i xare-i ge a ǀkhai. Judab hoab ge ūǃgûhe hâ, ǁîb ge ūǃgûǃarihe hâ.

²⁰Kōkhâi î ro mû ǁnān ǀapasa xu ra hāna, mapan kha hâ ǁnā gūn, saro ge māhe hâ ina, saro di îsa gūna?

²¹Tare-e ro kha nî mî, ǁîb ga ôaǃnâsa saro ǂama dī ǃnubai, ǁîga ro ge gaosa ǁkhāǁkhā amaga, saro di danase gu nî hâga, xare tsûgu xa ǃkhōhe ro tide ǁora ra taras ǁkhās xase?

²²Saro ǂgaob ǃnâ ro ga mîo: Tare xū-i ǃaromasa nē xūn xam go hāǂamhesa? ǂGuib sadu ǂhanuoǃnâsigu dib ǃaromas ge ǂomamǃgâgu âdu ǀhuikhâihe hâsa tsî ǃnôadi âdu tsûtsûhe hâsa.

²³Etiopiaǁîba ǀkharaǀkhara ǁkhāb a khōb âba? Tamas ka io ǀgaruba ǁîb di ande? ǁNās ǁkhās xase du ge ǁkhāti sado nî ǃgâidī ǁkhā, sadu ǂkhabadīsa ǁkhāǁkhāhe hâdo.

²⁴ǁNā-amaga ta ge tita ǁîna ǀapon ǂoab ǃgaroǃhūb dib xa ra ǃgomǀgorahen axase nîra ǀgaruǀgaru.

²⁵Nēs ge sa mādawa-amǃnâse nîra ī, tita xas nîra ǀnōbahe amǃnâs âsa, tib ra ǃKhūba mî, sas tita ge ǀurus tsî ǂhumigu ai ge ǂgomaiǂnûisa.

²⁶O ta ge tita ona sa ǂomamǃgâga nîra ǀhuikhâi kai, ais âs kōse, îb taosib âsa mûhe.

²⁷Sa ǀaigu tsî sa ǀgama-ain tsî taotaosasib sa ǀaikhoesis dib tsîna, ǃnomdi ais kas ǃaub ǃnâs kas, hoasa ta ge sa ǁgaiǁgaisana ge mû. Tsūba si sas Jerusalemse! Matikōse i kha nî ǀhawe ǃanus nîs aiǃâ?