Read Khoekhoegowab Jeremiab 14 Bible Online

Jeremiab 14 - Khoekhoegowab bible

Jeremiab 14

¹Mîs ǃKhūb dis, Jeremiaba ge hābas, kai ǀkhurub ǂama.

²Judab ra ǃoa, tsî ǁāgu âb ra ǂkhabu; ǁîgu ge ǃhūb kōse ǂnū sara-e anasen hâ, tsî Jerusalems di ǃnurub ge ra ǃapa.

³Tsî ǀgapiǃgôasagu ân ge ǀgôana ra ǁgama kai, tsî tsaus tawan ra sī, on ge ǁgam-i xare-e hō tama hâ, on ra ǀkhaiǃnâ xapadi ǀkha ǁkhawa hā; on ra taob xa dāhe, tsîn ra ǁîn di danade ǃgūǂgā.

⁴ǃHūb ǂari hâ, ǀapi-i xare-i ǃhūbaib ai ǀkhai amaga; ǁî ǃkhais xa gu ge ǃhanaǂgā-aoga tao hâ, tsî gu ge ǁîgu di danade ra ǃgūǂgā.

⁵ǁKhamadi ǃaub ǃnâ hâdi on ra ôa, xawe di ge ǂkhamn âde ra ǁnāxū, ǃam ǀgâro-i xare-i a ǀkhai amaga.

⁶Tsî ǃgoren ge ǀgapi ǃkhaidi ai sī mâ, ǁîn ra ǂoaba ǃkhapa ǀgirigu khami; ǁîn di mûdi ra kō-ôa, ǁhao-i xare-i a ǀkhai amaga.

⁷Sida ǂhanuoǃnâsigu ge sida ǃoagu ra ǃkhō-am, xawe ǃKhūtse dī ǁî ǃkhaisa sa ǀons ǃaroma. Sida ǁnāǁgôasigu ge a ǂguiǃnâgu; sa ǃoagu da ge ge ǁore.

⁸O, sats Israeli ǃâubasents, ǁîn di ore-aotsa ǂōǂōsib ǁaeb ai, tarexats kha ǁnâi satsa ǃhao khoese nî ī ǃhūb ǃnâ, tsî ǃgûkhoe-i hîa ǁomǂkhais ǀguisa nî hîse ra ǂgâ-i khami.

⁹Tarexats kha ǁnâi satsa ǂkhabuǂâi hâ khoese nî ī, ǁē-ao-i hîa ore ǁoa-i ase? Xawets ge satsa sida ǁaegu hâ, ǃKhūtse, tsî sida ge sa ǀons ǀkha ra ǂgaihe; tā ǁnāxū da re!

¹⁰Nētib ra ǃKhūba nē ǁaes xa mî: ǁÎn ge ǀnaremasa nētikōse ge ǀnam ǁîn ge ǂaidi âna ūdawa tama ge i. ǁNā-amagab ge ǃKhūba ǁîn xa ǃgâibahe tama ge i; ob ge nēsi ǂhanuoǃnâsigu ân xa ǂâi tsî ǁoren âna nîra ôaǃnâ.

¹¹ǃAruǀîb ge ǃKhūba tita ǁga ge mî: Tā nē ǁaes ǃgâiba ǃoa ǀgore.

¹²ǁÎn ga ǂûtama hâ, xawe ta ge tita ǃnurub âna ǁnâu tide; khauǁguibadi tsî ǂûǁguibadi tsîden ga ǁguiba, xawe ta ge tita ǁîn xa ǃgâibahe tide. Xawe gôab ǀkha tsî ǃâtsūǀkhāb ǀkha tsî ǂhīǁōb ǀkha ta ge ǁîna nîra hîkākā.

¹³O ta ge tita ge mî: O! ǃKhūtse, ǃKhūtse, kō ǁnā kēbo-aogu ge ǁîna ra mîba: Gôa-i xare-e du mû tide, ǃâtsūǀkhā-i xare-e du ūhâ tide. Tsî tita ge sado hâhâ ra ǂkhî-e nîra mā nē ǃās ǃnâ.

¹⁴Ob ge ǃKhūba tita ǃoa ge mî: ǁNā kēbo-aogu ge ti ǀons ǃnâ ǂkhabase ra kēbo. Tita ge ǁîga sî tama hâ, tsî ǁîgu ǃoa ǁkhāti ǃhoa tama hâ, ǁîgu ge sado ǂkhaba ai-i tsî ǁau aimûǀgarus tsî gāxaǃnâsib ǁîgu ǂgaogu dib tsîna ra kēboba.

¹⁵ǁNā-amagab ra ǃKhūba nēti mî: ǁNā kēbo-aogu ti ǀons ǃnâ ǂkhabase ra kēbogu xasa, ǁnāgu tita ǁîga sî tama xawe: Gôa-i xare-i tsî ǃâtsūǀkhā-i xare-i ge nē ǃhūb ǃnâ hâ tide, ti ra mîgu ge ǃâtsūǀkhāb tsî gôab xa nîra dītoahe.

¹⁶Tsî ǁnā ǁaes ǁîsa gu ra kēbobas ge ǃgangu Jerusalems digu ai nîra aoxūhe ǃâtsūǀkhāb tsî gôab tsîkha xa. Tsî khoe-i ǁîna nî ǁkhō-i xare-i ge nîra ǀkhai, ǁîgu tsî ǁîgu taradi tsî ǁîn ôagu tsî ǁîn ôadi tsîna. Nēti ta ge tita ǂkhabasib âna ǁîn ǂama nîra ǁhōǂui.

¹⁷ǁNā-amagats ge nē mîsa ǁîn ǃoa nî mî: Ti mûra ge ǁgamroga nî ǂnâ tsēs tsî tsuxuba, tsî ra ge ǀû tide; ǂkhamkhoes ti ǁaes ôas dis ge kai ǂkhôa-i ǀkha khôaǂkhūǂkhūhe hâ, tsî ǁō-ai-i kaise tsûtsûsa-i ǀkha.

¹⁸ǃAub ǃoa ta ga ǂoao, mû gôab ǀkha ǃgamhe hân ǀguin; tsî ǃās ǃoa ta ga oao, mû ǁnāpa ǃâtsūǀkhāb xa ǀaesen hân ǀguin. Kēbo-aogu tsî pristergu tsîgu ge ǃhūb ǃnâ ra ǃkhoema, xū-i xare-e ǂan tamase.

¹⁹Satsa kha Judaba aoxūǃarits hâ? ǀOms âtsa kha Sionsa ra uixa? Tarexats kha ǁnâi ge ǂnau da, ǂuruǂuru-i hâba da tamas kōse? ǂKhîb ra ǃâuhe xawe, ǃgâi-i xare-i ge a ǀkhai, ǁaeb ǂgauǂgaus dib ra ǃâuhe xawe, kō ǃhurib ǀguib ge hâ.

²⁰ǃKhūtse, sida ge sida eloxoresasib tsî sida îgu di ǂhanuoǃnâsib tsîna a ǂan, sida ge sa ǃoagu ǁore xui-ao.

²¹Tā ǃharaxū da re sa ǀons ǃaroma; trons sa ǂkhaisib disa tā aoǁgui re. ǂÂiǂâisen îts sida ǀkha sa ǃgaeǀhaosa tā ǁauǁau re.

²²ǁAu elogu ǁaedi ǃnâ hâ ga ǀapi kai ǁkhāgu a? ǀHomma kha ǀapiba mā ǁkhāb a? Satsa kha ǁî tamatsa, ǃKhūtse sida Elotse. ǁNā-amaga da ge satsa nî ǃâubasen, ǁnā xūn hoanats ra satsa dī amaga.