Read Khoekhoegowab Jeremiab 15 Bible Online

Jeremiab 15 - Khoekhoegowab bible

Jeremiab 15

¹Xaweb ge ǃKhūba tita ǁga ge mî: Moseb tsî Samueli tsîkha ga ti ais aiǃâ mâ xawes ga ti ǀomsa nē ǁaes ǀkha hâ tama i hâ, ǁîna doeǁgabē, ti ais aiǃâba xu, în ǂoa!

²Tsî i ge nîra ī, ǁîn ga sats ǃoa: Mâǀî da sida nî ǂoa? ti mîo, ots ge satsa ǁîna nî mîǀî: Nētib ra ǃKhūba mî: ǁŌb di-e, a-i ǁōb di kai; tsî gôab di-e, a-i gôab di kai; tsî ǃâtsūǀkhāb di-e, a-i ǃâtsūǀkhāb di kai, tsî ǃkhō-oms di-e, a-i ǃkhō-oms di kai.

³Tita ge ǁîn ǂama nîra ôaǃnâ xui-ao haka ǃhaodi kōse, tib ra ǃKhūba mî: Gôab ǀkhan nî ǃgamhe, tsî arin xan nî ǃkharahe, anin ǀhommi din tsî ǀgurun ǃhūbaib din xan ge ǁîna ōhe tsî hîkākāhe.

⁴Tsî ta ge tita ǁîna gongonǃnâxūse nîra māǁnâ, gaosidi ǃhūbaib didi hoade, Manaseb, Hiskiab ôab, Judab gao-aob ǃaroma, ǁîb ge Jerusalems tawa a dīn ǃaroma.

⁵Tari-e sasa nî ǀkhom Jerusalemse? Tari-e sasa nî tsâba? Tari-e nî hā, sasa i nî ǂkhîba ǂganbase?

⁶Sas ge tita ge ǁnāxū, tib ra ǃKhūba mî. Sas ge khaosǀî ge oa. ǁNā-amaga ta ge tita ǃommi âtaba saǀî ǀhōǂui tsî nî hîkākā si; tita ge ǃhausens xa tsau hâ.

⁷Tsî tita ge ǁîna ǁgara-ūxūs ǀkha ǃhūb di ǁāga-ū ge aoǂui. Tita ge ti ǁaesa ge ǀgôao kai tsî ǁîna ge dītoa; ǁîn ge daogu âna xu oa tama ge i.

⁸ǁÎn ǃoataradi ge ǁkhaeb hurib amǃgâ ǁgoeb ǃgâ-ai ge ǂgui. Tita ge ǁgûs ǂkhamkhoeb dis ǂama hîǀhuru-ao-e ge hā kai tsēǃgâǁaeb ai; tita ge ǁîn ǂama ǃhaese ǃaoba ge ǁnā kai ǃhuriǃhuri-aidi ǀkha.

⁹ǁÎs hû ǀgôaga ge ǁoras ge ge ǂkhabu, ǁîs ge ge ǀgaio. Sores âs ge ganupe i a tsē hîa ge ǂgâ; ǁîs ge tao tsî taob xa ge dāhe. Tsî ǁîn xa nî ǃgauna ta ge gôaba nîra māǁnâ khākhoen di ais aiǃâ, tib ra ǃKhūba mî.

¹⁰Tsūba te ti îse, titas ge ǁora ǃkhaisa, tita, ǃhūb hoaba ǂnoagu-ao tsî ǃkham-aose ība ta! Tita ge nau khoena hōǂgābasens ai xū-e ǀkhupi tama hâ, xawe mâ-i hoa-i ân ra tita ǀâxare.

¹¹ǃKhūb ge ge mî: Tita ge satsa nî ore, ǃgâibahets nîse; tita ge ǂkhabab ǁaeb ai tsî ǂōǂōsib ǁaeb ai satsa khākhoeba xu nîra huiǂui.

¹²Khoe-e kha hâ i a ǀapas di ǂnūǀurib kas ǁîb di ǂaib kas hoasa a khôa ǁkhā-e?

¹³Tita ge sa xūn tsî sa ǁuigu tsîna ǁkhâuǁnâxūse nîra mā ǀgau-i ama tama, tsî ǁîs ge nîra ī sa ǁoren hoan ǃaroma sa ǀkharib hoab ǃnâ.

¹⁴Tsî tita ge sado khākhoen âdu ǀkha nîra ǂgaeǂguiǃgâu ǃhū-i hîa du ge ǀū i-i ǃoa, ǀae-i ge ti ǁaib ǃnâ ǂhubi xui-ao, tsî i ge sadu ǂama nîra khau.

¹⁵O, ǃKhūtse, sats ge ǁîsa a ǂan; ǂâi tita xa îts sari te, îts ǀkhaoba te ti ǃgôaǃgonaona. Îts tā tsububē te ǁîn ǂamats a ǃnūǃnâxa hîa, îts ǂan sats ǃaroma ta ǃharaxūba ra tani ǃkhaisa.

¹⁶Sa mîdi ge hōhe ǃnubai ta ge ǁîde ge hapu; tsî sa mîs ge tita ǂgaob âtab di dâb tsî ǃgâiaǂgaob ase ge ība, tita ge sa ǀons ǃoa ǂgaihe hâ ta, ǃKhū ǂnubidi di Elotse.

¹⁷Tita ge ǀapes ǃhō-aon dis ǃnâ ǂnû tama hâ, tsî ta ge ǁkhāti dâb xa urikhâi tama ge hâ i; sa ǃommi xas ge ǀguri ta ge ǂnôa isa, sats ge tita ǁgôasib xa ǀoa kai amaga, o ǃKhūtse, ǂnubidi di Elotse.

¹⁸Tare xū-i ǃaromab kha ǁnâi ti tsûba ra hâhâ? ǁÎb ra ǂuruǂurusa ǂkhā. Hoaragasets kha ǁnâi ǀhôagao ǁgamgu hâhâ ǁoagu xase nî ība te?

¹⁹ǁNā-amagab ra ǃKhūba nēti mî: Sats ga oao, o ta ge tita satsa nî oa kai; ots ge satsa ti ais aiǃâ nîra mâ, tsî ǃgomǀgausa-ets ga ūǀkhīo ǂkhaba-i ose, ots ge ti amse nîra ī: An ǁîna sa ǃoa oa, xawe sats ge ǁîn ǃoa oa tide.

²⁰Tita ge satsa nē ǁaesa ǁaposa ǂaiǂnubiǂgoase ge mâiba, ǁîn ge satsa nî ǃkhamū, xawen ge xū-e dī tsi ǁkhā tide, tita sa ǀkha hâ xui-ao, satsa ta nî sâuse tsî satsa ta nî ǃnora kaise, tib ra ǃKhūba mî.

²¹A, tita ge satsa ǂkhaban ǃomǁaeba xu nîra huiǂui, tsî tita ge satsa ǁgauoǃnân ǃomǃnāba xu nîra ore.