Read Khoekhoegowab Jeremiab 16 Bible Online

Jeremiab 16 - Khoekhoegowab bible

Jeremiab 16

¹Tsî mîs ǃKhūb dis ge tita hāba tsî ge mî:

²Sats ge tara-e ū tide, tsî sats ge ǀgôagu tsî ǀgôadi tsîna ūhâ tide nē ǃās ǃnâ.

³Nētib ra ǃKhūba mî xui-ao, ǁnā ǀgôagu tsî ǀgôadi tsîn nē ǃās ǃnâ nîra ǁorahen xa, tsî ǁîn îdi, ǁîna ra ǁoradi xa, tsî ǁîn îgu, ǁîna nē ǃhūb ǃnâ ra hōgu xa:

⁴ǁÎn ge tsûsa ǁōga nîra ǁō. ǁÎn ge ǃgaebahe tsî ǁkhōhe tide, ǁîn ge ǃhūbaib ai nîra ǀaru kai, tsîn ge gôab xa tsî ǃâtsūǀkhāb xa nîra hapuhe, tsî ǁō hâ sorodi ân ge anin ǀhommi din tsî ǀgurun ǃhūbaib dina ǂûse nîra ība.

⁵Nētib ra ǃKhūba mî xui-ao: Tā oms ǁnāb ǃoa ran dis ǃnâ ǂgâ; îts tā ǃgû ǁînats nî ǃgaeba tsî ǀkhomse. Tita ge ti ǂkhîba nē ǁaesa xu ūbē xuige, tib ra ǃKhūba mî, ǀkhommi tsî ǀkhomxaǂgaosib tsîna.

⁶Kain tsî ǂkharin tsîn nē ǃhūb ǃnâ nîra ǁōs kōse, ǁîn ge ǁkhōhe tide, tsî khoe-i xare-i ge ǁîna āba tide tsî ǁî-aitsama ǃgaosen tide tsî ǁîn ǃaroma ǂkhomǃgoraǃgoradanasen tide.

⁷ǁKhātin ge xū-e ǀgoraǂuibahe tide ǃoab ǂama, ǁō hâ-i ǂama i nî khoe-e ǁkhaeǂgaohese, ǁkhātin ge ǁkhaeǂgaos di āǀgabis ǃnâ āsihe tide, khoe-i di îb ǂamas kas, khoe-i îs ǂamas kas hoasa.

⁸Îts ǁkhāti tā ǂgâ ǂûǁaes di ommi ǃnâ, ǁîn ǀkhats nî ǂnûse, ǂû tsîts nî āga.

⁹Nētib ra ǃKhūb ǂnubidi dib, Israeli Eloba mî: Mû tita ge nē ǃāsa xu sadu mûdi aiǃâ sadu tsēdi ǃnâ nîra ǀû kai dâb di dommi kas, ǃgâiaǂgaob di dommi kas, ǃgame-aob di dommi kas, ǃgame-aos di dommi kas hoasa.

¹⁰Tsî i ge nîra ī, nē ǁaesats ga nē mîdi hoade mîba tsî ǁîn ǃoa mîo: Tarexab ra ǃKhūba sida ǂama nē kai ǂkhabab hoaba ǃhoa, tsî mâsa sida dīsāsa, tsî mâba sida ǁoreb, ǃKhūb sida Elob ǃoagu da ge ǁoreba? ti.

¹¹Ots ge satsa ǁîn ǃoa nî mî: Sadu îgu ge tita ge ǁnāxū tib ra ǃKhūba mî, tsî ǀkhara eloga saoǃgon, tsî ǁîga ge ǃoaba, tsî ǁîgu aiǃâ ǃhonǁgoa ǃkhais xas ge, tsî tita ǁnāxū, tsîn ge ti ǂhanuba ǃkhōǀgaipe tama ge i.

¹²Tsî sadu ge ǁî ǃkhaisa ǁgûga ǃnā hâse dī ǃkhais ǃaromas ge: Kō, sadu ge mâ-i hoa-i âdo ǁî-i ǂkhaba ǂgaob di karokarosens ǃoa ra tanisen, tita du ǁnâu tidega.

¹³ǁNā-amaga ta ge tita nē ǃhūba xu nîra aoǂui du, ǃhū-i hîa sadu tsî sadu îgu tsîdu ge ǀū i-i ǁga, o du ge ǁnāpa ǀkhara eloga nîra ǃoaba tsēa tsî tsuxuba, ǀkhomma ta mā du tide amaga.

¹⁴ǁNā-amaga mû, tsēdi ge ǃgoaxa, tib ra ǃKhūba mî, ǁîdi ai mîhe tidede ǃKhūb, Israeli ôana Egipteǃhūba xu ge ǂgaeǂguiǂuib a ûitsama ǃkhais ao ti.

¹⁵Tsîn ge: ǃKhūb, ǁnāb Israeli ôana ǀapas di ǃhūb tsî ǁnā ǃhūgu ǁîgu ǃoab ge ǁîna doeǁgabēga xu ge ǂgaeǂguiǃapab, a ûitsama ǃkhais ao ti nîra mî. Tita ge ǁîna ǁkhawa ǁîn di ǃhūb, ǁîn îga ta ge māb ǃnâ nîra ūsī xui-ao.

¹⁶Mû, tita ge ǂgui ǁauǃkhō-aoga nîra sî, tib ra ǃKhūba mî, ǁîgu ge ǁîna nîra ǃkhō, tsî ǁnās khaoǃgâ ta ge tita ǂgui ǃau-aoga nîra sî, ǁîgu ge ǁîna nîra ǃau mâ ǃhommi hoaba xu, mâ ǃnoms hoasa xu tsî ǁhāgu ǃhaogu diga xu.

¹⁷Ti mûra ǁîn di daogu hoagu ai hâ xui-ao; ǁîn ge ti ais aiǃâ gaugausa tama hâ, tsî ǂhanuoǃnâsib ân ge ti mûra aiǃâ ǂganǃgâsa tama hâ.

¹⁸ǁNā-amaga ta ge tita ǂhanuoǃnâsib ân tsî ǁoreb âna ǃhonarisase nîra mādawa-am, ti ǃhūban ge ǀuriǀuri amaga. ǁÎn ge ti ǀumisa ǁō hâ sorodi ǁîn ui-uisan didi tsî ǁîn ǁgaiǁgaisan ǀkha ǀoaǀoa xui-ao.

¹⁹O, ǃKhūtse, sats ge a ti ǀgai tsî ti ǁkhāsi, tsî ti ǁhaiǁhâǃkhai ǂōǂōsib di tsēs ai; sa ǃoa di ge ǁaede ǃhūbaib di ǀkhâuǀamde xu hā tsî nîra mî: ǂHumib ǀguiba gu ge sida îga ǀumise ge ūhâ i, tsî ǁausib, hîa xū tama tsî harebe tamaba.

²⁰Khoeba kha eloga dībasen ib nî? Elo tamagu kom ǁîgao!

²¹ǁNā-amaga mû, tita ge ǁîna nē ǃnās ai nîra ǂanǂan; tita ge ǁîna ti ǃommi tsî ti ǀgaib tsîkha nîra ǂan kai, on ge nîra ǂan, ti ǀons a ǃKhū ǃkhaisa.