Read Khoekhoegowab Jeremiab 17 Bible Online

Jeremiab 17 - Khoekhoegowab bible

Jeremiab 17

¹ǁOreb Judab dib ge ǂnūǀurixoa-ūxūb ǀkha xoahe hâ, ǀams diamantǀuis dis ǀkha, ǀhanni ǁîn ǂgaob dib ai tsî ǁnâgu sadu altardi digu ai;

²ǁîn ôan ǁîn altardi xa ra ǂâi xase tsî ǁîn di khaihesa haigu xa, mâ ǃam haiǃnôan hoan ǃgao tsî mâ ǀgapi ǃnomdi hoadi ai.

³Tita ge ti ǃhommi ǃaub ǃnâ mâb, sa xūn tsî sa ǁuigu hoaga ǁkhâuǁnâxūse nîra mā, tsî sa ǀgapigu ona ǁoreb, sa ǀkharigu hoagu ǃnâ hâb ǃaroma.

⁴Nētits ge satsa aitsama nîra ǀû sa ǀumis, tita ge satsa mās ǀkha. Tsî tita ge satsa sa khākhoena nîra ǃoaba kai, ǃhū-i sats a ǀū-i ǃnâ, sadu ge ǀae-e khau, ti ǁaib ǃnâ ǀamosib kōse nîra khau-e xui-ao.

⁵Nētib ra ǃKhūba mî: ǀÂxarexūhesab ge ǁnā aob, khoeb ai ga ǂgomaiǂnûib, ǁgansa ǁôab âb ase ga ǂnûib tsî ǂgaob âb ǀkha ǃKhūba xu ga ǁnāǁgôaba.

⁶ǁÎb ge hais ǃgaroǃkhais dis khami ī, hîa ǃgâib ga hā ǃnubai ǁî ǃkhaisa hōǃâ tamasa. Tsîs ra hâ ǃū-aisa ǃkhaidi ǃgaroǃhūb didi ǃnâ, ǀū tsî ǁanǃnâhe tama hâ ǃhū-i ǃnâ.

⁷Xawe ǀkhaehesab ge ǁnā aob ǃKhūb ai ga ǂgomaiǂnûib, ǂgomǃgâsens âb ǃKhūb ai hâba.

⁸ǁÎb ge hais khami nîra ī, ǁgammi amǃgâ ǂgāhe hâs, tsî ǃāb amǃgâ ǃnomaǃkhō hâsa, ǀgammi ra hā ǃnubai ǁîsa hōǃâ tamas, tsî kai tsî nî ǃamhâhâsa. Tsî kurib ǀkhurub dib ǃnâs ǂhansen tsî ǂûtani ǀû tama.

⁹Îbe gāxaǃnâ tsî a tsū xūb ge ǂgaoba, ā, ǁōǁōsa xūb ge. Tari-e ǁîba ǂan ǁkhā?

¹⁰Tita ǃKhūta ge ǂgaoba ra ôaǃnâǃganu, tsî ǃnaide ra ǃâitsâ, tsî ta ge ǁîsa ra dī mâ-i hoa-e ta nî māse ǁî-i di daogu ǃoa, ǂûtanib ǁî-i dīgu dib ǃoa.

¹¹ǃAub di anis hîa ǃupuna ra ǂnû-ais ǁîs aitsama ǁgoe tamanas ǁkhās khamib ge ǁnāb, ǃkhūsiba ra ǀhaoǀhaob, xawe ǂhanu dommi ai ǁîsa dī tamaba ī, ǃkhareb ǁîb di tsēdi dib ǃnâb ge ǁîba nîra ǁnāxū, tsî ǀunis âb ge gârese nîra ī.

¹²Trons ǂkhaisib dis, tsoatsoasa xu a ǀgapis ge, sida ǃanusib di ǃkhaisa!

¹³O ǃKhūtse, Israeli ǃâubasentse, satsa ge ǁnāxūn hoan ge nîra taotaohe. Tsî satsa xu ga ǂgōn, ge ǃhūb aib ai nîra xoamâihe, ǁîn ra ǃKhūb, ûitsama ǁgam-i di ǀauba, ǁnāxū amaga.

¹⁴ǂGauǂgau te re, ǃKhūtse, o ta ge nîra ǂgau; sâu te re, o ta ge nîra sâuhe, sats a ti ǃkhōǀkhā xuige.

¹⁵Mû ǁîn ra tita ǃoa: Mapas hâ ǃKhūb di mîsa? As ǁnâi hā, ti mî.

¹⁶Xawe tita ge ǃûi-aoba i a anus ǃgâ-ai satsa ǁgūǀkhā tama ge i, tsî ta ge ǂkhôab tsēsa ǁkhāti ǂgao tama ge i. Sats ge ǁî ǃkhaisa a ǂan, ti amǁgaukha xu ge ǂoan ge sa ais aiǃâ ge hâ i.

¹⁷Tā ǃhurise ība te; sats ge a ti ǁhaiǁhâǃkhai ǂkhabab di tsēs ai.

¹⁸Ti ǃgôaǃgonaona an tao, î ta tita tā tao, an ǃhuri, î ta tita tā ǃhuri, ǁîn ǂama ūhā ǂkhabab di tsēsa, îts ǁîna ǃhonarisase khôaǂkhūǂkhū.

¹⁹Nētib ge ǃKhūba tita ǃoa ge mî: ǃGû îts sī mâ ǁnā ǁāb ǁaes ôan dib, Judab gao-aogu ǁîba-ū ra ǂgâb, tsî ǁîba-ū ra ǂoab ǃnâ, ā, ǁāgu Jerusalems digu hoagu ǃnâ.

²⁰Îts ǁîn ǃoa mî: ǁNâu ǃKhūb di mîsa, sago Judab gao-aogo tsî sats Judats hoats tsî sadu Jerusalems ǁansabedu, nē ǁāga-ū ra ǂgâdu hoado.

²¹Nētib ra ǃKhūba mî: ǂAnbasen sadu ǀomdi ǃaroma, î du sâtsēs ai tā ǃgom xū-e tani, î du ǁî-e ǁkhāti Jerusalems ǁāga-ū tā ūǂgā.

²²Î du ǃgom xū-i xare-e sâtsēs ai tā sadu omde xu tanibē, î du mâ sîsenai-i hoa-e tā dī, î du sâtsēsa khai, sadu îga ta ge mîmā xase.

²³Xawe ǁîn ge ǁnâu tsî ǂgaes âna ǁkhāti ǂō tama ge i, tsîn ge ǃaob âna ge karokaro, ǁnâun tidega tsî ǂgōǀausan ǃkhōǃoa tidega.

²⁴O i ge nîra ī, tita du ga ǂōrisase ǃgâo, tib ra ǃKhūba mî, ǃgom xū-i xare-e du ga nē ǃās di ǁāga-ū sâtsēs ai ūǂgâ tama io tsî sâtsēsa khai, tsî du ga ǁîs ai sîsen-i xare-e dī tama io,

²⁵o gu ge nē ǃās ǁāga-ū gao-aogu tsî gaosabegu tsîga nîra ǂgâ, Davib trons ai nî ǂnûse, kunidi ai ǂnû tsî hān ai nî ǃgapise, ǁîn tsî ǁîn gaosagu tsî Judab aogu tsî Jerusalems ǁansaben tsîna, tsî nē ǃās ge ǀamosib kōse nîra ǁanǃnâhe.

²⁶Tsîn ge ǃādi Judab dide xu nîra hā, tsî Jerusalems ǂnamipe hâ ǃāde xu tsî Benjaminni ǃhūba xu tsî ǃgam ǃkhaide xu tsî ǃhomma xu tsî ǃkhawagasa xu, khauǁguibasa ra ūhāse tsî ǂāǁguibas tsî ǂûǁguibas tsî wiroki tsî ganganǁguibasa ra ūhāse, ǃKhūb ommi ǁga.

²⁷Xawe tita du ga ǁnâu ǂgao tama io, sâtsēsa du nî khaise tsî ǃgom xū-i xare-e du tani tidese sâtsēs ai Jerusalems ǁāga-ū, o ta ge tita ǀae-e ǁāgu âs ǃnâ nîra ǂhubi, î-omgu Jerusalems diga nî hapu tsî ǀari tide-e.