Read Khoekhoegowab Jeremiab 18 Bible Online

Jeremiab 18 - Khoekhoegowab bible

Jeremiab 18

¹Mîs Jeremiaba ge ǃKhūba xu a hābas, mî rase:

²Khâi îts ǁgôa sūǂnubi-aob di oms ǃoa; o ta ge tita ǁnāpa ti mîde nîra ǁnâu kai tsi.

³Nēti ta ge tita sūǂnubi-aob di oms ǃoa ge ǁgôa, tsî mû, ob ge ǁîba sūǂnubiǀnūs ai xū-e gere sîsen.

⁴Tsî ǁnā soa-i, hîab ra dī-i ge ǁgao, ǂgoa-i sūǂnubi-aob ǃomǁae ra ī khami, ǃnubaib ge ǁî-e xu ǁkhawa ǀnî soa-e ge dī; sūǂnubi-aob mûǁae i ge ǃgâi i khami.

⁵ǃNubais ge ǃKhūb di mîsa tita ǃoa ge hā, mî raǃâ:

⁶Tita xare sadu ǀkha dī ǁoa ta a, nē sūǂnubi-aob khami, sats Israeli omtse? tib ra ǃKhūba mî: Mû, ǂgoab sūǂnubi-aob ǃomǁae ī xase, ǁnās ǁkhās xase du ge ti ǃomǁae ī, Israeli omtse.

⁷ǃNapetaman hâ hîa ta ge tita ǁae-i ǃoagu tsî gaosi-i ǃoagu nîra ǃhoa, ǁî-e ta nî ǃhomǂui tsî khôaǁnâ tsî hîkākā ti;

⁸xawe ǁnā ǁae-i, ǁî-i ǂama ta ge nēsa ǃhoa-i, ga ǂkhabasib â-e xu ǃhobaseno, o ta ge nî ǃhausen ǁnā ǂkhabab, ǁîna dī-ūsa ta ge ǂâibasen hâ ib xa.

⁹ǁKhāti ta ge ǃnapetaman hâ hîa nîra ǃhoa ǁae-i ǂama tsî gaosi-i ǂama, ǁî-e ta om tsî nî ǃhana ti,

¹⁰xawe ti mûǁae a tsūna i ga dīo, ti domma i ǁnâu tamas kōse, o ta ge tita nîra ǃhausen ǁnā ǃgâib ǁîna ta nî dī-ū, ti ta ge mîb xa.

¹¹Îts ǁnâi nēsi aogu Judab digu ǃoa tsî ǁansaben Jerusalems din ǃoa ǃhoa, mî rase: Nētib ra ǃKhūba mî: Mû! Tita ge ǂkhaba-e sadu ǃoagu ra kuru, tsî ta ge sadu ǀape-e ra ǂâi. Î du ǁnâi nēsi ǃhobasen, mâ-i hoa-e ǁî-i ǂkhaba daoba xu, î du daogu âdu tsî dīgu âdo dīǃgâiǃgâi.

¹²Xawen ra ǁîna mî: ǁAu a, sida di ǂâide ǃoa da nî tanisen. Î da dī mâ-i hoa-e ǁî-i ǂkhaba ǂgaob di ǂâibasens ǃoa.

¹³ǁNā-amaga nētib ra ǃKhūba mî: Dîǃgâ re ǁaedi ǃnâ, tari-e nēti ī xūna ge ǁnâu. ǂKhamkhoes Israels ra kaise ǁgaiǁgaisa ǃkhaisa dī.

¹⁴Tsamaros Libanonni disa xare ǃhaoba xu ǃaub ǃoa dâuǁgôaǀûs ra? ǁNā ǃhao tsî ǃkhai dâu ra ǁgamga xare ǂnâ gu ra?

¹⁵Xawe ti ǁaes ge tita ge ǀuru; ǁîna ta ǁausiba ge ǀanǀanba, ǁîn ge ǁîna daogu ân ai ge ǃnôa kai, ǁnā ǀoro daogu ai, dao-i ǂhanuǂhanuhe tama hâ-i di ǃgangu ain nî ǃgûse.

¹⁶ǁÎn ǃhūban nî ǃū-aisa ǃkhaise ǂnûise, ǀamo ǂnamǀîxūse; ǃgû-īǀkhā si ka khoe-i hoa-i ge ǃhurigâ tsî nîra ǃnabindana.

¹⁷Aiǂoas di ǂoa-i axase ta ge tita ǁîna nîra ǀgaruǀgaru khākhoeb ais aiǃâ; tita ge ǁîna ǃaoba nîra mû kai tsî aisa mû kai tide tsūǀkhāb ân di tsēs ai.

¹⁸ǃNubain ge ge mî: Hā î da ǀapeǀape Jeremiab ǃoagu; ǂhanub ge pristera xu kā tide xuige tsî ǀapesa gā-aiba xu tsî mîsa kēbo-aoba xu. Hā î da ǁîba ǂnau nams ǀkha, î da tā ǃgâ ǁîb mîdi hoade.

¹⁹ǃKhūtse, tita ǃgâ re; îts dommi ti mâǃoasaben diba ǁnâu re!

²⁰ǃGâi-i ama-i kha ǂkhaba-e nî mādawa-amhe? ǁÎn ge ti ǀomsa tsau-e ge khaoba. ǂÂi re, sa ais aiǃâ ta ge mâ i ǃkhaisa, ǁîna ta ǃgâi mî-e nî ǃhoabase, ǁgôasib âtsa ta nî ǁîna xu ǁkhaedawaga.

²¹ǁNā-amaga ǁîn ôana ǃâtsūǀkhāba mā; îts ǁîna gôab di ǀgaib ǃnâ māǁnâ. Îts ǁîn tarade ǀgôana ūǀhanahe hâ ǃoatara kai; î gu ǁîn aoga ǂhīǁōb xa ǃgamhe, î gu ǂkhamkhoegu âna gôab ǀkha ǃgamhe ǃkhams ǃnâ.

²²A-i ǀō-e ǁnâuhe ǁîn omde xu, ǃhaesets ga satsa ǁîna toroǂnubi-e hāǂam kaio, ā-en ge khao amaga, titan nî ǃkhōse, tsî ti ǂaiden nî ǁnoaga ǁguibase.

²³Xawe sats ǃKhūts ge ǁîn di ǀapes, ti ǃoagun ǃgam te nîse ūhâs hoasa a ǂan. Tā ǃgū-ai ǁîn di ǂhanuoǃnâsiba, îts ǁîn di ǁoreba tā ǀari, sa ais aiǃâba xu. Xawen ǁîna ǁnā sa ais aiǃâ; ǁnāti ǁîna sîsenū ǁaib âts di ǁaeb ai.