Read Khoekhoegowab Jeremiab 19 Bible Online

Jeremiab 19 - Khoekhoegowab bible

Jeremiab 19

¹Nētib ra ǃKhūba mî: ǃGû, îts sūǂnubi-aob di xapa-e sī ǁamabasen, îts ǁaes di kaigu xa ū tsî pristergu di kaigu xa,

²îts ǃgûǂoa ǃgoaǃnāb Hinommi ôab dib, Sūǃâroǁāb di ǂgâ-ams aiǃâ hâb dib ǃoa, îts ǁnāpa ǂgaiǂui ǁnā mîdi, tita nî satsa ǃhoa-ūde,

³îts mî: ǁNâu ǃKhūb di mîsa, sago Judab gao-aogo tsî sadu Jerusalems ǁansabedo. Nētib ra ǃKhūb ǂnubidi dib, Israeli Eloba mî: Mû, tita ge ǂkhaba-e nîra ūhā nē ǃās ǂama, ǁî-i xa ra mâ-i hoa-i ǁî-e ga ǁnâu-i di ǂgaera nîra ǃnuru-e.

⁴Titan ge ǁnāxū amaga, tsî nē ǃāsan ge ǃū-aisa kai, tsî ǀkhara elogu, ǁîn tsî ǁîn îgu tsî Judab gao-aogu tsîn ge ǀū igan ge ǁîs ǃnâ ge ǀanǀanba, tsî nē ǃāsan ge ǀaob ǀhapion dib ǀkha ǀoaǀoa amaga.

⁵ǁÎn ge ǀgapigu Baali diga ge ǂnubi ǁîn ôagan nî Baala khauǁguibase ǁguibaga, tita mîmā tama tsî ǃhoa tama tsî ti ǂgaob ǃnâ khâi tamasa.

⁶ǁNā-amaga mû, tsēdi ge ǃgoaxa, tib ra ǃKhūba mî, os ge nē ǃkhaisa Tofeti kas Hinommi ôab di ǃgoaǃnāb kas ti ǂgaihe tide tsî ǃGams ǃgoaǃnāb ti nîra ǂgaihe.

⁷Tita ǀapes Judab tsî Jerusalems tsîra disa nē ǃās ǃnâ nîra ǁauǁau xui-ao, tsî ta ge ǁîna khākhoen ân ais aiǃâ gôab ǀkha nîra ǁnā kai tsî ǁnān ǀoms âna ra ôan di ǃommi ǀkha, tsî tita ge ǁō hâ sorodi âna ǀhommi di anin tsî ǃhūbaib ǀgurun tsîna nîra ǂûmā.

⁸Tsî tita ge nē ǃāsa ǃū-aisa ǃkhaise tsî ǃhōxūse nîra ǂnûi; ǃgû-īǀkhā si ka khoe-i hoa-i ge ǃhurigâ tsî nîra ǃhō si ǁîs di ǁnora-ain hoan ǃaroma.

⁹Tsî tita ge ǁîna ǁgans ǁîn ôagu dis tsî ǁîn ôadi disa nîra ǂû kai, tsîn ge nîra ǂû mâ-i hoa-e ǁî-i ǀgūkhoe-i di ǁgansa, ǁnā xāǂgās tsî ǂōǂōs ǁîn khākhoen tsî ǀoms âna ra ôan tsîn nî ǁîna ǂōǂōs ǃnâ.

¹⁰ǃNubaits ge satsa xapasa nîra khôaǂkhūǂkhū, ǁnā aogu sa ǀkha nî ǃgûgu di mûdi aiǃâ,

¹¹ots ge ǁîna ǃoa nî mî: Nētib ra ǃKhūb ǂnubidi diba mî: Nēti ta ge tita nē ǁaes tsî nē ǃās tsîra nîra khôaǂkhūǂkhū, sūǂnubi-aob di xapas ra khôaǂkhūǂkhūhe khami, ǂuru ǁoas as kōse. Tsîn ge ǁîna Tofeti ǃnâ nîra ǁkhō, ǀnî ǁkhōǃkhai-i xare-i nîra ǀkhai xui-ao.

¹²Nēti ta ge tita ǃāsa nîra dī-ū, tib ra ǃKhūba mî, tsî ǁîs ǁansaben tsîna. O ta ge dī tsî ǁîsa Tofeti khami nîra ǂnûi.

¹³Tsî omdi Jerusalems didi, tsî omdi Judab gao-aogu didi ge Tofeti khami nîra ǃanuoǃnâ, ǁnā omdi, omǂamaidi âdi ain ge ǀhommi ǂnubis hoasa ǀanǀanba tsî ǃhao eloga ǂnâǁguibade ǁguibadi hoadi ǀkha.

¹⁴Tsî Jeremiab ge Tofeta xu hāo, ǃKhūb ge ǁîba ǁnāǀî sî hâ io, kēbob nîga, ob ge ǃKhūb di ai-omma xu khâi tsî ǁaes hoas ǃoa ge mî:

¹⁵Nētib ra ǃKhūb ǂnubidi dib, Israeli Eloba mî: Mû, tita ge nē ǃās ǂama tsî ǁîs ǃādi hoadi ǂama ǁnā ǂkhabab, ǁîs ǂama ta ge ǃhoab hoaba nîra ūhā, ǁîn di ǃaoban ge karokaro amaga, ti mîden ǁnâu tidega.