Read Khoekhoegowab Jeremiab 2 Bible Online

Jeremiab 2 - Khoekhoegowab bible

Jeremiab 2

¹Tsîs ge ǃKhūb di mîsa tita ge hāba mî rase:

²ǃGû îts Jerusalems ǂgaedi ǃnâ ǂgai tsî mî: Nētib ra ǃKhūba mî: Tita ge ra ǂâi ǃgâisib sa ǂkhamsis dib xa, ǀnammi sa ǃgameb dib xa, titas ge ǃgûǃgon ǃnubai ǃgaroǃhūb ǃnâ, ǃhū-i tsorohe tamab ǃnâ.

³Israeli ge ǃKhūba ǃanusise ge ība i, ǂgurosan hōǂgābasendi âb din ase; ǁîba ge hapun hoan ge ǀhapixase ge ūhâhe, ǁîn ge ǂkhabab xa ge hāǂamhe, tib ra ǃKhūba mî.

⁴ǁNâu ǃKhūb di mîsa, sadu Jakob ommi dido, tsî Israeli ommi di ǃhaodi hoadi dido.

⁵Nētib ra ǃKhūba mî: Mâ ǂkhaba-en kha sadu îna ti ǃnâ ge hō, on tita xu ǃnūse ge bē? On ǁausiba ǃgûǃgon, tsî ge ǁau kai?

⁶On mî tama ge i: Mapab hâ ǁnā ǃKhūb Egipteǃhūba xu ge ǂgaeǂguiǃapa daba, ǃgaroǃhūb ǃnâ ge ǂgaeǂguiǂgâ daba, ǃhū-i ǃū-aisa ǃkhaidi tsî āgu tsîn di-i ǃnâ, ǃhū-i ǀkhurub tsî ǁōb sommi tsîkha di-i ǃnâ, ǃhū-i khoe-i xare-i xa ǃgûǃnâhe tama tsî khoe-i xare-i xa ǁanǃnâhe tama-i ǃnâ?

⁷Tsî tita ge sado ǂûtanixa ǃhū-i ǃnâ ge ūǂgâ, ǁîb ǂûb tsî ǁîb ǃgâib xa du nî ǂûga. Xawe ǁîb ǃnâ du ge sīo, o du ge ti ǃhūba ǀuriǀuri tsî ti ǀumisa ǁgaiǁgaisa xūse ge dī.

⁸O gu ge pristerga: Mapab ǃKhūba hâ? ti mî tama hâ, o gu ge ǁnāgu ǂhanuba ra sîsenūga tita ǀū ge i; o gu ge ǃûi-aoga ti ǃoagu ge ǃûǂam, o gu ge kēbo-aoga Baala xu ge kēbo, o gu ge harebe tama xūna ge saoǃgon.

⁹ǁNā-amaga ta ge tita ganupe nî ǂnoagu-ū du, tib ra ǃKhūba mî. Ā, sa ôan di ôan ǀkha ta ge tita nîra ǂnoagu.

¹⁰ǃGâu ǃnāǃnuidi Sipruǁîn dide ǃoa î du mû, î du sî Kedari ǃoa, î du ôasase ǃgaoǃgâ, î du mû, ise i ge nēti ī xū-e ī ǃkhaisa.

¹¹Mâ ǁae-e kha elogu â-e ge ǀkharaǀkhara, elo tama gu a xawe? Ti ī xawes ge ti ǁaesa ǁîs di ǃgôasiba harebe tama xū-i ǃnâ ge ǀkharaǀkhara.

¹²ǁÎ ǃkhais ǂama burugâ, sago ǀhomgo, î go ǃhurigâ, î go ǃū-ai, tib ra ǃKhūba mî.

¹³Ti ǁaes ge ǀgam ǂkhabasikha ge dī xuige: Tita ûitsama ǁgam-i di ǀautan ge ǁnāxū, tsî ǁî-aitsama tsaude ge ǁhāǂuibasen, ǂkhū hâdi, ǁgam-e ǃkhōǀgara ǁoade.

¹⁴Israela ǃgāb a? Ommi ǃnâ ge ǃnae ǃgāba? Tarexasa ǁnâi ǁkhâuǁnâxū kaib gosa?

¹⁵ǂKham xamgu ge ǁîb ǂama ge ǃguru; ǁîgu ge dommi âga ge ǃhâkhâi, tsî gu ge ǃhūb âba ge hîǀhuru, o di ge ǃādi âba khauǃkhūhe hâ khoe-i xare-i ǁîde ǁanǃnâ tamas kōse.

¹⁶ǁKhātin ge Memfis tsî Taxpanhes tsîra di ôana sa danaǂkhōsa nîra ǂnauǂkhū.

¹⁷Amasets kha nēna ǁî-aitsama dīsen tama hâ, ǃKhūb sa Elobats, daob aib ra ǂgaeǂgui tsi hîa, ge ǁnāxū ǃkhais ǀkha?

¹⁸Tsî nēsi, tare-ets nî Egipteb ǁgā ǃgûs ai nî hō, Nylǃāb di ǁgamgats nî āse? Tsî tare-ets nî Asiriab ǁgā ǃgûs ai nî hō, Eufratǃāb di ǁgamgats nî āse?

¹⁹Sa ǂkhabasib ge nîra ǀham tsi; tsî sa ǁnāǁgôasigu ge nîra ǁkhara tsi. ǂAn îts ǁnâi mû, tsū tsî i a au ǃkhaisa, ǃKhūb sa Elobats ga ǁnāxū tsî ti ǃaoǃgâb ga sa ǀkha hâ tama io, tib ra ǃKhūb ǂnubidi diba mî.

²⁰Hukasa xu ta ge ǃnaob âtsa khôaǂkhū tsî ǃgae-ūdan âtsa gere ǂgaeǃgao; xawets ge satsa: Tita ge ǃoaba tide! ti ge mî. Tsîts ge mâ ǀgapi ǃnoms hoas ai tsî mâ ǃam hais hoas ǃgao ra ǀai.

²¹Tita ge satsa ge ǂgā ǃgâi ǂauxûiǂûhaise, hoaragase a ǂgomǂgomsa ǃkhomse. Tsî matits kha ǁnâi ǃhao ǂauxûiǂûhais di ǂgona-i ǃnâ ge ǀkharaǀkharasenba te?

²²Tsî ǀūǃkhuwub ǀkhats ge ǁānai tsî kaisets ga sē-e sîsenū xaweb ge ǂhanuoǃnâsib âtsa ti ais aiǃâ xoamâihe hâ, tib ra ǃKhūb ǃKhūba mî.

²³Tsî matits kha ǁnâi: Tita ge ǂnaoǂnaosen tama ta; tita ge Baalga saoǃgon tama ta? ti mî ǁkhā. Kōǀî sa daoba ǃgoaǃnāb ǃnâ, ǂan dīts ge xū-e, sats supu ǃhae ǃnais khami daogu âtsa ra dawaǃkhunitsa.

²⁴ǁÎs ge ǃgore i khami ǃgaroǃhūba ǁnaeti hâsa, turab âs ī khami ǂoaba ra ǃkhapasa. Tari-e ǃkhoehās âsa nî ǁkhae? ǁÎsa ga ôan hoan ge ǀhupu tide; ǁîs di ǁkhâb ǃnân ge ǁîsa nîra hō.

²⁵ǂAis âtsa tā ǁharosa xu ǂgaeǂui ǁharos âsas ǂoaǃnâ tidega tsî dommi âtsa ǁgâsa. Xawets ge satsa: ǁAu ta ge a, ti ra mî, tita ǃhao khoega a ǀnam xui-ao, tsî ta ge ǁîga ra saoǃgon.

²⁶ǃNari-ao-i hōhe i ra ǃnubai ra taos ǁkhās xasen ge ǁnān Israeli ommi dina tao hâ; ǁîn tsî ǁîn di gao-aogu, ǁîn di gaosagu, ǁîn di pristergu tsî ǁîn di kēbo-aogu tsîna.

²⁷ǁNān, haib ǃoa: Sats ge a ti î tsî ǀuis ǃoa sas ge tita ge ôa, ti ra mîna: ǃKhomǃnoroxū ten ra, tsîn ti ǃoa kō tama xui-ao; xawe tsūǃōb ân ǁaeb ain ra: Khâi, îts ore da re, ti mî.

²⁸Mapa gu ǁnâi hâ sa elogu, sats ge kurubasenga? A gu khâi satsa gu tsūǃōb âts di ǁaeb ai nî ore ǁkhāse. Sa ǃādi a ǂgui khami gu ge sa eloga a ǂgui Judatse.

²⁹Tarexa du kha ǁnâi tita ra ǂnoagu-ū? Sadu hoadu ge ti ǃoagu ge ǃûǂam hâ i, tib ra ǃKhūba mî.

³⁰ǁAuse ta ge tita sa ôana ge ǂnau; ǁîn ge ǂgōǀausa ǃkhōǃoa tama ge i. Sadu gôab ge ǁîn kēbo-aoga ge ǃgam, ǀkhauǃā ra xammi xase.

³¹Ti ǃhaose ǃgaoǃgâ du re ǃKhūb mîsa: ǃGaroǃhūse ta kha tita Israela ība, durutsuxub di ǃhūse? Tarexas kha ti ǁaesa: Sida ge a ǀhonkhoe, tsî da ǃaruǀî sa tawa sī tide, ti ra mî?

³²ǂKhamkhoesa ǀurus ra ǁîs anisenxūna, ǃgame-aosa ais âs di ǃgū-aixūna? Ti ī xawes ge ti ǁaesa tita ge ǀuru ǂgui tsēdi kōse.

³³Matits ra daob âtsa ǃgâiǃgâi, ǁâǃgâ-aosats nî ôaga! ǁNā-amagats ge ǁkhāti hoadi xa tsū ǀai-aode sa daoga ge ǁkhāǁkhā.

³⁴Ā, ǀaob ǀhapio ǀkhomǀkhomsa ǀomdi dib ge sa saran ǂomamǃgâgu ǃnâ ge hōhe, tita ge ǁî ǃkhaisa ǂganǃgâsa ǃkhai-i ai hō tama hâ, hî-i, mâ ǃkhai-i hoa-i tawa.

³⁵Xawets ra satsa mî: Amase ta ge tita a ǀhapio; ǁaib âb ge tita xu go ǁkhaedawahe ti. Mû, tita ge satsa nîra ǂnoagu-ū, tita a ǀhapio tits ra mî amaga.

³⁶Matits ra kaise ǃgûma, daob âtsa ra ǀkharaǀkharaǃâ? Egipteb on xats ge nîra tao, Asiriab xats ge taos ǁkhās xase.

³⁷Ā, ǁnāpa xus onats ge ǃomkha âts sa danas ai hâse nîra ǂoa: ǃKhūb ge sa ǂgomaiǂnûis hoasa aoxū xui-ao, ǁîs ǀkhats amǃnâ tidese.