Read Khoekhoegowab Jeremiab 20 Bible Online

Jeremiab 20 - Khoekhoegowab bible

Jeremiab 20

¹Tsî Pashuri, Imeri ôab, pristeri, (ǁîb ge ǂnûiǂgāhe hâ aiǃgû-aob ǃKhūb ommi di ge i), ǁîb ge Jeremiab ra ǁnā mîde kēbo ǃkhaisa ǁnâuo,

²ob ge Pashura kēbo-aob Jeremiaba ǂnau tsî ǃkhō-oms ǃnâ ge ǂnûi, ǀgapise hâ ǁāb Benjaminni dib ǃKhūb ommi tawa hâb dis ǃnâ.

³O i ge sao ra tsēs ai ge ī, Pashuri ge Jeremiaba ǃkhō-omsa xu ūǀkhī ǃkhaisa, ǃnubaib ge Jeremiaba ǁîb ǃoa ge mî: ǃKhūb ge ǀons âtsa Pashur ti ǂgai tama tsî Magor-Missabib ti ra ǂgai si.

⁴Nētib ra ǃKhūba mî xui-ao: Mû, tita ge sats ǂûts tsî satsa ǀnam hân hoana ǃhurixūse ra ǂnûiba; ǁîn ge gôab ǁîn di khākhoen diba xu nîra ǁnā, sa mûra ǁîsa ra mû hîa. Tsî tita ge Judab hoaba Babilons gao-aob di ǃomǁae nîra mā, ǁnāb ge ǁîna ǃkhōsase nîra ūǃgûbē tsî ǁîna gôab ǀkha nîra ǂnau.

⁵Tsî tita ge xūn nē ǃās din hoan tsî ǁîs di sîsenni hoab tsî ǁîs di ǃgomǀgausa xūn hoan tsî ǁuigu Judab gao-aogu digu hoaga, ǁîna ta ge ǁîn khākhoen ǃomǁae nîra mā. ǁÎn ge ǁîna nîra ǃkhōǀhana tsî ū tsî ǁîna Babilons ǃoa nîra ūsī.

⁶Tsî sats Pashurts, tsî ommi âts di ǁansabedu, sadu ge ǃkhō-oms ǃnâ nîra ǂgâ, tsî sats ge Babilons tawa sī tsî ǁnāpa ǁō tsî ǁnāpa nîra ǁkhōhe, sats tsî sa ǀnamsaben, ǁînats ge ǂkhabase kēboban hoan tsîdo.

⁷ǃKhūtse, sats ge tita ge ǃhoadan, tsî tita ge ge ǃhoadankaisen; sats ge tita ge ǀgaidā, tsîts ge tita ge dan. Tita ge ge âiǂuixū kai tsēs hoasa; mâ-i hoa-i ân ra tita ǃhō.

⁸ǃHoa ta gesa xu ta ge ra ǂgaiǂui, tita ge ge ǃhoadankaisen. ǃKhūb di mîs ge tita tsēs hoasa ǃharaxū tsî ǃhōxūse ība amaga.

⁹O ta ge tita ge mî: ǁÎb xa ta ge ǃaruǀî ǂâi tide, tsî ǃaruǀî ǀons âb ǃnâ ǃhoa tide, xawes ge ǁî ǃkhaisa ti ǂgaob ǃnâ khau ra ǀae, ti ǂkhōgu ǃnâ ǂganamhe hâsa. Tsî ǁîsa ta nî ǃkhōdawase ta ge ge ǀhupuǀhupusen, xawe ta ge ǁkhā tama ge i.

¹⁰ǀHoes ǂguin disa ta ge ǁnâu xui-ao: Magor-Missabiba ǂanǂan re! ti, o da ge ǁîba nî ǂanǂan. Ti ǂkhîhoresan hoan ge ti ǁnāsa ra ǃkhē, ǁîn ge: ǀNîsib ge nîra ǃhoadankaisen ǃnubai da ge ǁîba dan tsî nî ǀkhaobasen, ti ge mî.

¹¹Xawe ǃKhūb ge tita ǃhuriǃhurisa ǁē-aose ība; ǁnā-amagan ge ti ǃgôaǃgonaona nîra ǃnôa tsî dan tide. ǁÎn ge kaise nîra tao, ǁnâuǃāxasen dī tama amaga; ǀamo tao-i ge nîra i, tātsē ǀuruhe tide-e.

¹²Sats ǁnâi, ǃKhūts, ǂnubidi dits ǂhanu-aiba ra ǃâitsâts ǃnaidi tsî ǂgaob tsîna ra mûtse, a ta sa ǀkhaoba ǁîn tawa mû, satsa ta ge ti ǂnoaguǃkhaisa ǂhaiǂhaiba xuige.

¹³ǃKhūba ǁnaeba re! ǃKhūba kare re! ǁÎb ge ǀoms ǂhâ hâb disa ǂkhabadī-aon ǃomǁaeba xu ore xuige.

¹⁴ǀÂxarexūhes hâ ǁnā tsēs, ǁîs ai ta ge ǃnaesa! ǁNā tsēs ǁîs ai ta ge ti îs xa ǁorahesa as tā ǀkhaehe!

¹⁵Ab ǀâxarexūhe ǁnā aob, ti îba ǁnā ǃgâi ǂhôa-e ūsība tsî: Aore ǀgôabats ǁorabahe hâ, ti ge mîba, kaise ǁîba ra ǃgâiaǂgao kaiǃâ.

¹⁶Ā, ǁnā aoba ab ī ǁnā ǃāra ǃKhūb ge dawaǃkhupura khami, ǁî ǃkhaisa ǃhausen tama i tsî, îb ǁîba ǁgoas ai ǂgai-e ǁnâu, tsî tsēǃgâǁaeb ai ǃau-e.

¹⁷Titab ǁgûs di ǃnāba xu ǃgam tama ǃkhaisa, tsî ti îs ti ǀhoba kai tama ǃkhaisa, tsî ǃnāb âs ǀamose ǀgamǀkhā hâs dib khami ī tamasa.

¹⁸Tare xū-i ǃaromasa kha ǁgûsa xu ta ge ǀkhīsa, ǀhupub tsî ǃoab tsîkha ta nî mûse, tsî ti tsēdi nî taosib ǃnâ kāse?