Read Khoekhoegowab Jeremiab 21 Bible Online

Jeremiab 21 - Khoekhoegowab bible

Jeremiab 21

¹Mîs ǃKhūba xu Jeremiaba ge hābas, gao-aob Sedekiab ge Pashuri, Malxiab ôab, tsî Sefanjab, Maasejab ôab, Pristera, ǁîb ǃoa sî ǃnubai, mî raǃâ:

²ǃKhūba dîba da re, Nebukadnesari, Babilons gao-aob ra ǃkhamū da xuige. ǀNîsib ge ǃKhūba nî sîsenū da ǁîb buruxa dīn hoan ǃoa, sida xub nî oa, ti.

³ǃNubaib ge Jeremiaba ǁîn ǃoa ge mî: Nēti du ge Sedekiab ǁga nî mî:

⁴Nētib ra ǃKhūb Israeli Eloba mî: Mû, tita ge ǁnā torob ǀāxūn, sadu ǃomǁae hâna, nîra dawa, ǁîn ǀkha du ra ǃkhamna, Babilons gao-aob tsî Xaldeaǁîn tsîn, ǂnubiǂgoab ǃaugaba xu sado ra xāǂgān ǃoagu, tsî tita ge ǁîna nîra ǀhaoǀhao nē ǃās ǁaegub ǃnâ.

⁵Tsî tita ǂûta ge sadu ǃoagu nîra ǃkham ǀhōǂuihesa ǃommi tsî ǀgaisa ǁôab ǀkha, ā, ǁaib ǀkha tsî ǁgôasib ǀkha tsî kai ǁaixasib ǀkha.

⁶Tsî tita ge ǁansaben nē ǃās dina nîra ǂnau, khoen kas ǀgoan kas hoasa, kai ǂhīǁō-i xan ge ǁîna nîra ǁō.

⁷Tsî ǁnās khaoǃgâ ta ge tita, tib ra ǃKhūba mî, Sedekiab, Judab gao-aob tsî ǁîb ǃgāgu tsî ǁaes tsî nē ǃās ǃnâ ǂhīǁōb xa tsî gôab xa tsî ǃâtsūǀkhāb xa ge ǃgauna Nebukadnesari, Babilons gao-aob, ǃomǁae nîra mā tsî ǁîb khākhoen ǃomǁae tsî ǁnān, ǀoms âna ra ôan ǃomǁae, tsîb ge ǁîna gôab di ǀā ǀkhāb ǀkha nîra ǂnau, ǁîb ge ǁîna sâu tide tsî ǀkhom tsî ǀkhomxaǂgao tide.

⁸Tsî nē ǁaes ǃoats ge nî mî: Nētib ra ǃKhūba mî: Mû, tita ge sadu ais aiǃâ ra mâi ûib di daob tsî ǁōb di daob tsîkha.

⁹ǃĀs ǃnâ ga hâ-i, ǁî-i ge gôaba xus kas, ǃâtsūǀkhāba xus kas tsî ǂhīǁōba xus kasa nîra ǁō, xawe ǃgûǂoa tsî ga Xaldeaǁîn, sadu ra xāǂgāna ǁaeǁaesen-i, ǁnā-i ge nîra ûi, tsî ǀoms â-i ge ǁî-e ǁkhâuǁnâxūse nîra ība.

¹⁰Tita ge ti aisa nē ǃās ǃoagu ǂkhababǀî ge ǂnûi tsî ǃgâibǀî tama xui-ao, tib ra ǃKhūba mî. ǁÎs ge Babilons ǃomǁae nîra māhe, ob ge ǁîba ǀaes ǀkha nîra khauǃkhū si.

¹¹Tsî ommi Judab gao-aob dib ǃoats ge nî mî, ǁnâu ǃKhūb di mîsa:

¹²Sats Davib omtse, nētib ra ǃKhūba mî: ǂHanuse ǀgoraǃgâ ǁgoaga, î du ǀâǀhanahe hâba ore ǁgâiǀā-aob ǃomǁaeba xu, îb ti ǁgôasiba tā ǀae-i khami ǂoa, îb tā khau, khoe-i xare-i ǁîba ǀari ǁoas kōse, ǂkhabasib ǁîn dīgu dib ǃaroma.

¹³Mû, tita ge nî tsâǀkhā si, sas ǃgoaǃnāba ǁanǃnâ hâs, sats, ǂgās di ǃhaotse, tib ra ǃKhūba mî. Sadu hîa: Tari-e sida ǃoa nî ǁgôaxa? Tari-e nî hā sida ǁanǃkhaidi ǃnâ? ti ra mîdo.

¹⁴Xawe ta ge tita sadu ǂama nîra ôaǃnâ ǂûtanib sadu dīgu dib xa, tib ra ǃKhūba mî. Tita ge ǁîs di haiǀgoms ǃnâ ǀae-e nîra khau, ǁîs ǂnamipe hân hoana nîra hapu-e.