Read Khoekhoegowab Jeremiab 22 Bible Online

Jeremiab 22 - Khoekhoegowab bible

Jeremiab 22

¹Nētib ra ǃKhūba mî: ǃGûǁgôa Judab gao-aob ommi ǁga, îts ǁnāpa nē mîsa ǃhoa.

²Îts mî: ǁNâu re ǃKhūb di mîsa, sats Judab gao-aotse, sats Davib trons ai ǂnôatse, sats tsî sa ǃgāgu tsî sa ǁaes, nē ǁāga-ū ra ǂgâs tsîdo.

³Nētib ra ǃKhūba mî: ǂHanub tsî ǂhanu-aisib tsîkha sîsenū, î du ǀâǀhanahe hâba ore ǁgâiǀā-aob ǃomǁaeba xu, î du ǃhao khoeba tā ǁgâiǀā, î du ǃoaǀgôab tsî ǃoataras tsîra tā ǂkhôadī, î du ǀhapio ǀaoba tā ǂnâxū nē ǃās ǃnâ.

⁴Nē ǃkhaisa du ga ǁkhōse dīo, o gu ge nē ommi ǁāga-ū gao-aogu, Davib trons ai ǂnôaga, kunidi tsî hāgu ai ra ǃgapiga nîra ǂgâ, ǁîb tsî ǁîb ǃgāgu tsî ǁîb di ǁaes tsîna.

⁵Xawe nē mîde du ga ǁnâu tama io, o ta ge tita ti tawa ge nū, tib ra ǃKhūba mî, nē ommi nî ǃū-aisa ǃkhai kai ti.

⁶Nētib ra ǃKhūba mî xui-ao, Judab gao-aob ommi xa: Sats ge tita Gileadi ase ība, Libanonni di ǀgapise, xawe amase ta ge tita satsa ǃū-aisa ǃkhaise, ǁanǃnâhe tama ǃāse nîra ǂnûi.

⁷Tsî tita ge sa ǃoagu hîkākā-aona nîra khai, mâ-i hoa-e ǁî-i ǁâtanin ǀkha, ǁîn ge sa ǃkhōǂuihesa sederhaide ǁhāǁnâ tsî ǀaes ǃnâ nîra aoǂgā.

⁸O di ge ǂgui ǁaede nē ǃāsa ǃgû-īǀkhā tsî nîra mî, mâ-i hoa-e ǁî-i di ǀgūkhoe-i ǃoa: Tare xū-i ǃaromab kha ǃKhūba ǁnāti ge dī nē kai ǃās ǀkha?

⁹On ge ǁîna nîra mî: ǃGaeǀhaos ǃKhūb, ǁîn Elob disan ge ǁnāxū tsî ǀkhara elogu aiǃân ge ǃhonǁgoa tsî ǁîga ǃoaba amagas ge.

¹⁰Tā ǁō hâba āba, î du ǁîba tā ǃgaeba; î du āba ǁnāb ǃgûbē geba, ǁîb tātsē oa ǀkhī tide xuige, ǃhūb ǃnaes âb dibab nî mûse.

¹¹Nētib ra ǃKhūba mî xui-ao, Salummi Josiab ôab, Judab gao-aob, ǁîb îb Josiab di ǃās ǃnâ ge gaob nē ǃāsa xu ge ǂoab xa: ǁÎb ge tātsē ǁnāpa ǁkhawa sī tide.

¹²Tsîb ge ǁnā ǃās ǁîs ǃoab ge ǃkhōsase ūǃgûhes ǃnâ nîra ǁō; tsîb ge nē ǃhūba ǃaruǀî ǁkhawa mû tide.

¹³Tsūba ǁnā khoeb, oms âba ǂhanuoǃnâsib ǀkha ra ǂnubiba, tsî ǂamomdi âba ǂhanuoǃnâsib ǀkha, ǁîb ǀgūkhoeba ǁause ra ǃoaba kaiba, tsî sîsenamǃnâs âba ǁîba mā tamaba.

¹⁴ǁNāb hîa ra mîba: Tita ge ama ǀgapi omsa nî ǂnubibasen tsî hara ǂamomde. Tsîb ra mûǂuidaode kuruǂgābasen, tsî ǁîde sederhain ǀkha ǂganamde dība tsî ǀapase ǂkhau.

¹⁵Gaots nî xare satsa sederi ǀkhats ra an amaga? Sa îba ǂû tsî ā tamab ge i? Tsî ǂhanub tsî ǂhanu-aisib tsîkha dī tamab ge i? Tsîb ge ǁnāǃnubai ge ǃgâibahe.

¹⁶ǁÎb ge ǂhanuǂhanuǃkhais ǀkhomǀkhomsab tsî ǂhâ hâb disa ge ǀgoraǃgâ, ǃnubaib ge ge ǃgâibahe. Tita ǂans di ǂûtani tamasa a ǁî? Tib ra ǃKhūba mî.

¹⁷Xawe sa mûra tsî sa ǂgaob tsîn ge xūǃgunuxasib tsî ǀhapio ǀaob ǀguib ai hâ, ǁîbats nî ǂnâxūse, tsî ǁgâiǀāb tsî ǁgaridīb tsîkha ai, ǁîkhats nî dīse.

¹⁸ǁNā-amagab ra ǃKhūba nēti mî Jojakimmi, Josiab ôab, Judab gao-aob xa: ǁÎn ge ǁîba ǃgaeba tide: Ae, ti ǃgâtse, ti ǃgâse! ti. ǁÎn ge ǁîba ǃgaeba tide: Ae, ti ǀhonkhoetse, ti anusitse! ti.

¹⁹Esel-i ǁkhō-i ǀkhab ge ǁîba nîra ǁkhōhe, ǁîn ge ǁîba nîra ǃkhara tsî ǁîba nîra aoxū ǃnūse Jerusalems ǁāga xu.

²⁰ǃApa Libanonni ai îts ǂgai, îts dommi âtsa ǃhâkhâi Basanni ǃoa, îts ǁnāti ǂgai Abarimma xu, xawe sa ǀnamsaben hoan ge nî khôahe.

²¹Tita ge satsa ge ǃhoaǀî sa ǃgâiǃgâb ǃnâ, xawets ge satsa: Tita ge ǃgâ ǂgao tama hâ, ti ge mî. Nēb ge sa dao ge i ǂkhamsis âtsa xu; ti dommats ge ǁnâuǀnam tama i ǃkhaisa.

²²ǂOab ge sa ǃûi-aogu hoaga nîra ǃûsi, tsî sa ǀnamsaben ge ǃkhō-oms ǃnâ nîra ǂgâ, ǃnubaits ge amase nîra tao tsî taob xa nîra dāhe, sa ǂkhabusasib ǃaroma.

²³Sats Libanonni ai ǁan hâts, sederhai-i ǃnâ ra ǁantse, matikōsets satsa nîra ǃgae, tsûgu xats ga hāǂamheo, ǁora ras ra tsûb xa hāǂamhes ǁkhās xase!

²⁴Tita a ûitsama ǃkhais ao tib ra ǃKhūba mî, Konjab, Jojakimmi ôab, Judab gao-aob ga ǂganamǀgaiǀgai ǀkhunuǂnûida io ti amǀkhāb ǁôab tawa, xawe ta ge ga ǁnāpa xu tsububē tsi.

²⁵Tsî tita ge satsa nîra mā, ǁnān sa ǀomsa ra ôan ǃomǁae, tsî ǁnān ais ân aiǃâts ra ǃhurin ǃomǁae, Nebukadnesari, Babilons gao-aob ǃomǁae tsî Xaldeaǁîn ǃomǁae.

²⁶Tsî tita ge sats tsî sa îs, satsa ge ǁoras, tsîro nîra aoǂui ǀkhara ǃhūb ǁîb ǃnâ du ǃnae tamab ǃnâ, tsî ǁnāpats ge satsa nîra ǁō.

²⁷Tsî ǁnā ǃhūb ǁîn ǀoms ǁkhore hâb, ǁkhawan nî ǁnāpa sīse, ǁnāpan ge ǁîna ǁkhawa sī tide.

²⁸Nē aob Konjaba xare ǃharaxūhesa khôaǂkhūǂkhūhesa ǁgôa-eloba? Khoen ǁîb xa ǃgâibahe tama xūba a ǁî? Tarexasa kha ǁnâi ǁîb tsî surib âb aoǂuihe hâ, ā, ǃhū-i ǁîn a ǀū-i ǃnâb aoxūhe hâsa?

²⁹O, ǃhūtse, ǃhūtse, ǃhūtse ǁnâu ǃKhūb di mîsa!

³⁰Nētib ra ǃKhūba mî: Nē aob ǁkhāba ǀgôao khoese xoa, khoeb hîa tsēdi âb ǃnâ amǁnā tideb ase, ǀguib ǁîb surib dib xareb ge ǃgâiǃgâ tide, Davib trons aib nî ǂnû tsî Judab ǂama gaose.