Read Khoekhoegowab Jeremiab 23 Bible Online

Jeremiab 23 - Khoekhoegowab bible

Jeremiab 23

¹Tsūba ǁnā ǃûi-aogu, gūn ti ǃû-aib dina ǃgam tsî ra ǀgaruǀgaruga! tib ra ǃKhūba mî.

²ǁNā-amagab ra ǃKhūb Israeli Eloba nēti mî, ǁnā ǃûi-aogu ti ǁaesa ra ǃûsigu xa: Sago ge ti gūna ge ǀgaruǀgaru, tsî ǁîna ge doeǁgaxū tsî ǁîna ôa tama hâ, mû, o ta ge tita sago tawa ǂkhabasib sago dīgu diba nîra ôa, tib ra ǃKhūba mî.

³Tsî tita ge ǃgau nîn ti gūn dina ti aitsama nîra ǀhaoǀhao ǁnā ǃhūgu ǁîgu ǃoa ta ge ǁîna ǀgaruǀgaruga xu, tsî tita ge ǁîna ǁîn ǃharadi ǃoa nîra ūhā, tsîn ge ǂûtani tsî nîra ǂguiǂguisen.

⁴Tsî tita ge ǁîna ǃûi-aogu, ǁîna nî ǃûsiga nîra ǂkhaiǂkhaiba, tsîn ge ǃaruǀî ǃao tide tsî ǃhuri tide tsî ǁkhuihe tide tib ra ǃKhūba mî.

⁵Mû tsēdi nîra hā, tib ra ǃKhūba mî, ǁîdi ai ta tita Daviba ǂhanu-ai ǂGonaba nîra ǂkhaiǂkhaibade, ǁîb ge gao-aose nîra gaosîsen ǁnâuǃāxase tsî ǂhanub tsî ǂhanu-aisib tsîkha nîra dī ǃhūb ǃnâ.

⁶ǁÎb di tsēdi ǃnâb ge Judaba nîra orehe, tsî Israeli ge sâusase nîra ǁan. Tsî nēs ge nî ǀon, ǁîs ǀkhan nî ǁîba ǂgaisa: ǃKhūb sida ǂHanu-aisib, ti.

⁷ǁNā-amaga mû tsēdi ge ra hā, tib ra ǃKhūba mî, ǁîdi ain mî tidede ǃKhūb Israeli ôana Egipteǃhūba xu ge ǂgaeǂguiǃapab a ûitsama ǃkhais ao,

⁸xawe ǃKhūb Israeli di omma ge ǂgaeǂguiǃapab a ûitsama ǃkhais ao ti nîra mî, ǀapas di ǃhūba xu ǁîba ge ūhāba tsî ǁnā ǃhūgu, ǁîgu ǃoa ta ge ǁîna doeǁgabē hâ igu hoaga xu. Tsîb ge ǁîn di ǃhūb ǃnâ nîra ǁan.

⁹Kēbo-aogu xasa: Ti ǂgaob ge ti ǃnâ khôahe hâ; ti ǂkhōgu hoagu ge ra ǀkhū. Tita ge ǀhoro hâ khoeb ǂauxûib xa dāhe hâb khami ī, ǃKhūb xa tsî ǃanusib âb di mîdi xa.

¹⁰ǃHūb ǃgamekhôa-aon xa ǀoa hâ xui-ao; ǃhūb ra ǃoa ǀâxareb xa, ǃû-aigu ǃgaroǃhūb digu ge ra ǂnâ; ǁîn di ǃkhoes ge a tsū, ǀgaib ân a ǂkhaba xui-ao.

¹¹Hoagu, kēbo-aogu kas, pristergu kas hoas a hînaxaǃnâ xui-ao; ti ommi ǂûb ǃnâ ta ge ǁîn ǂkhabasiba ge hō, tib ra ǃKhūba mî.

¹²ǁNā-amagab ge ǁîn daoba ǂkhanu ǃkhaise ǁîna nîra ība ǃkhaenab ǃnâ; ǁîn ge doeǁgahe tsî ǁîb ai nîra ǁnā. Tita ǂkhaba-e ǁîn ǂama nîra ūhā xui-ao, kurib ǁîn ôaǃnâs dib ǃnâ, tib ra ǃKhūba mî.

¹³Tita ge kēbo-aogu Samariab digu on tawa tsū xūna ge mû: ǁÎgu Baala xu ge kēboga tsî ti ǁaes Israelsa ge ǂgaeǂhapuga.

¹⁴Xawe kēbo-aogu Jerusalems digu tawa ta ge tita ǃhuriǃhurisana ge mû: ǁÎn ra ǀai tsîn ra ǂkhabasiba sîsen. Tsîn ra ǂkhabadī-aon ǃomga ǀgaiǀgai, ǁîn ǃhobasen tidega mâ-i hoa-e ǁî-i ǂkhabasiba xu. ǁÎn hoan ge tita Sodoms khami ība; tsî ǁîs di ǁansabena Gomoras khami.

¹⁵ǁNā-amagab ra ǃKhūb ǂnubidi diba nē kēbo-aogu xa nēti mî: Mû, tita ge ǁîna au ǂûna nîra ǂûmā, tsî ǃgāxa ǁgam-e nîra āsi, Jerusalems di kēbo-aoga xub ge hînaxaǃnâsiba ǃhūb hoab ǃnâ ǂoa xui-ao.

¹⁶Nētib ra ǃKhūb ǂnubidi diba mî: Tā ǃgâ kēbo-aogu, sado ra kēbobagu di mîde; ǁîgu ge ra ǂgaeǂhapu du. ǁÎgu ge aidi ǁîgu ǂgaoba xu hâde ra ǃhoa, tsî ǃKhūb di amsa xu ǃhoa tama hâ.

¹⁷ǁÎn ra hugaǀgui ǁnān tita ra ǃkhāǃkhān ǃoa mî: ǃKhūb ge ǁîsa ge mî ǂkhîba du nî ūhâga. Tsî ǁnān ǁîn ǂgaob ǂâibasens ǃoa ra tanisenn ǃoa gu ge: Sadu ge ǂkhaba-i xare-i xa hāǂamhe tide, ti ra mî.

¹⁸Tari-e kha ǀapes ǃKhūb dis ǃnâ mâ, mîs âba mû tsî ge ǁnâu-e? Tari-e ǁîb mîsa ǃgâ tsî ge ǁnâu-e?

¹⁹Mû tūǀnanu-i ǃKhūb di-i ǁgôasi-i ge go hā, tūǀnanu-i ge eloxoresan di danas ai nîra ǁnā.

²⁰ǃKhūb di ǁaib ge ǁkhaedawasen tide, ǁîb nî dītoas kōse, tsî ǂâidi ǁîb ǂgaob dideb nî sîsenǂuis kōse ǀunis tsēdi dis ai du nî ǁnâuǃāxase ǁî ǃkhaisa ǃgaoǃgâ.

²¹Tita ge ǁnā kēbo-aoga sî tama hâ, xawe gu ge ge ǃkhoe; tita ge ǁîga ǃhoa-ū tama hâ, xawe gu ge ge kēbo.

²²Xawe ti ǀapes ǃnâ gu ga mâ hâ io, o gu ga ti ǁaesa ti mîde ǁnâu kai hâ, tsî gu ga ǁîna ǁkhaedawa hâ, ǁîn ǂkhaba daoba xu, tsî ǂkhabasib ǁîn dīgu diba xu.

²³Tita ge ǀgūseb di Elota, tib ra ǃKhūba mî, tsî ǃnūseb di Elo tama ta?

²⁴Khoe-e kha gaugausen ǁkhā-e ǂganǃgâsa ǃkhaidi tawa, tita ǁî-e mû tidega? tib ra ǃKhūba mî. Tita kha ǁî tama ta, ǀhommi tsî ǃhūbaib tsîkha ra ǀoaǀoa ta? tib ra ǃKhūba mî.

²⁵Tita ge tare-e gu ǁnā kēbo-aogu ti ǀons ǃnâ ǂhumise ra kēboga ra mî ǃkhaisa ge ǁnâu: Tita ge go ǁhapo, tita ge go ǁhapo! ti ra mîǃâ.

²⁶Matikōsesa kha ǁnâi? Xare ǁhapo-e hâ i a, ǂgaob ǁnā kēbo-aogu, ǂhumiga ra kēbogu dib ǃnâ? Hî-i, ǁîgu ge kēbo-aogu gāxaǃnâsib ǁîgu ǂgaob digu,

²⁷hîa nēs xa ra ǂâiga, mati gu ti ǁaesa ǀons âtasa nî ǀuru kai ǃkhaisa, ǁîgu ǁhapodi, mâb hoab âgu ǀgūkhoe-i âba ra ǃhoabade xu, ǁîn îgu ge ti ǀonsa Baala xu ǀuru khami.

²⁸ǁNā kēbo-aob ǁhapo-e ga ūhâba, ab ǁhaposa ǃhoa, tsî ti mîs ga ǁîb tawa hâba, ab ti mîsa amab ǃnâ ǃhoa. Tare-eb kha ǃhoroǁôaba ǃhorob ǀkha ǁae hâ? tib ra ǃKhūba mî.

²⁹Ti mîsa kha ǀaes khami ī tamas hâ, tib ra ǃKhūba mî, tsî hamers ǃhaoba ra ǂkhūǂkhūs khami ī tamas hâ?

³⁰ǁNā-amaga mû, tita ge ǁnā kēbo-aoga nîra hāǂam, tib ra ǃKhūba mî, ti mîde ra ǃnarigu mâb hoaba ǀgūkhoeb âba xu.

³¹Mû tita ge ǁnā kēbo-aogu ǃoagu hâ, tib ra ǃKhūba mî, ǁîgu nams ǂûs ǀkha ǃhoa tsî: ǃKhūb ge ǁî ǃkhaisa go mî ti ra mîga.

³²Mû tita ge ǁnāgu ǂkhaba ǁhapode ra kēbogu ǃoagu hâ, tib ra ǃKhūba mî, tsî ǁîde ra ǃhoamaga tsî ti ǁaesa ra ǂgaeǂhapuga ǁîgu ǂhumigu ǀkha tsî ǁîgu supuǂâixasib ǀkha, ǁîga ta sî tama tsî ǁîga ta ǁnāsa mîmā tama tsî nē ǁaesa gu harebes xawesa hîba tama hîa, tib ra ǃKhūba mî.

³³Tsî nē ǁaes kas, kēbo-aob kas, pristeri kas hoas ga dî tsî mîo: Mâ ǃgomma ǃKhūb diba? Ots ge satsa ǁîn ǃoa nî mî: Sadu ge ǁnā ǃgomdo. Tita ge sado nîra aoxū, tib ra ǃKhūba mî.

³⁴Tsî ǁnā kēbo-aob kas, ǁnā pristeri kas, ǁnā ǁaes kas hoasa ga mîn ǃKhūb di ǃgommi, ǁnāti ī khoeba ta ge tita nîra ôaǃnâ, ǁîb tsî ǁîb di ommi tsîna.

³⁵Nēti du ge sado, mâ-i hoa-e ǁî-i ǀgūkhoe-i ǃoa tsî mâ-i hoa-e ǁî-i ǃgâsa-e ǃoa nîra mî: Tare-eb ǃKhūba ge ǃeream tsî tare-eb ǃKhūba ge ǃhoa?

³⁶Xawe ǃKhūb di ǃgommi xa du ge ǃaruǀî ǂâi tide, mâ-i hoa-i ǁî-i mîs ǂûs xa ǃgomse nîra ībahe xui-ao, mîdi ûitsama Elob dide du ra dawaǃkhuni amaga, ǃKhūb ǂnubidi dib sida Elob dide.

³⁷Nētits ge ǁnā kēbo-aob ǃoa nî mî: Tare-eb ǃKhūba satsa ge ǃeream? tsî: Tare-eb ǃKhūba ge ǃhoa?

³⁸Xawe ǃKhūb di ǃgommi tits ra mî amaga, ǁnā-amagab ra ǃKhūba nēti mî: Nē mîsats ra mî amaga: ǃKhūb di ǃgommi ti, tita ge sa ǃoa sî tsî a mî: Tā mî ǃKhūb di ǃgommi ti, hîa.

³⁹ǁNā-amaga mû, tita ge sado nîra ǀuruǃari, tsî ta ge sadu tsî ǁnā ǃās tita ge sadu tsî sadu îna māsa, ti aisa xu nîra aoxū.

⁴⁰Tsî ta ge tita sado ǀamo ǃharaxūba nîra ǁgui-ai tsî ǀamo taob, tātsē ǀuruhe tideba.