Read Khoekhoegowab Jeremiab 24 Bible Online

Jeremiab 24 - Khoekhoegowab bible

Jeremiab 24

¹ǃKhūb ge tita ge kō kai, tsî mû ǀgam ǀharura ge ǀnomahais ǂûn ǀkha ge mâihe hâ i ǃKhūb di tempeli aiǃâ, gao-aob Nebukadnesari, Babilons gao-aob ge Jexonjab, Jojakimmi ôab, Judab gao-aoba, Judab gaosagu ǀkha tsî haikuru-aogu ǀkha tsî ǀuriǂnau-aogu ǀkha Jerusalemsa xu ǃkhōsase ūǃgû tsî Babilons ǃoa ūsīs khaoǃgâ.

²ǀGui ǀharus ǃnân ge kaise ǃgâi ǀnomana ge hâ i, ǂguro ǁan hâ ǀnoman khami īna; xawe nau ǀharus ǃnân ge kaise tsū ǀnomana ge hâ i ǁkhoaosib ân xa ǂûhe ǁoa ge ina.

³Ob ge ǃKhūba tita ǃoa ge mî: Tare-ets ra mû Jeremiatse? O ta ge tita: ǀNoman, ti ge mî. ǃGâi ǀnoman ge kaise a ǃgâi, tsî tsū ǀnoman ge kaise a tsū, ǁkhoaosib ân xa ǂûhe ǁoana.

⁴ǃNubais ge ǃKhūb di mîsa tita hāba tsî ge mî:

⁵Nētib ra ǃKhūb Israeli di Eloba mî: ǃGâi ǀnomana ta ge tita a ǂan ǁnās ǁkhās xase ta ge tita ǃkhōsase ge ǂgaeǂguibēhen Judab dina nîra ǂan nē ǃāsa xu ta ge Xaldeaǁîn di ǃhūb ǃoa sîbēna.

⁶Tsî tita ge ti mûsa ǁîn ai ǃgâib ǃoa nîra ǂnûi tsî ǁîna nē ǃhūb ǃnâ ǁkhawa nîra ūhā. Tsî tita ge ǁîna nîra ǂnubi tsî ǁîna khôaǁnâ tide, tsî ta ge ǁîna nîra ǂgā tsî ǁîna ǃhomǂui tide.

⁷Tita ge ǁîna ǂgao-e nîra mā, titan nî ǂanse, tita a ǃKhū ǃkhaisa, tsîn ge tita ǁaese nîra ība, tsî tita ge ǁîna Elose nîra ība, ǁîn nî ǁîn ǂgaob hoab ǀkha tita ǃoa ǃhobasen xui-ao.

⁸Tsî tsū ǀnoman hîa ǁkhoaosib ân xa ǂûhe ǁoan ī khami, tib ra ǃKhūba mî, ǁnāti ta ge tita Sedekiab Judab gao-aoba nîra dī, gaosagu âb ǀkha tsî ǃgau gen Jerusalems din, nē ǃhūb ǃnâ ge ǃgaun, tsî Egipteǃhūb ǃnâ ǁan hân ǀkha.

⁹Tita ge ǁîna gongonǃnâxūse nîra māǁnâ gaosidi ǃhūbaib didi hoadi di ǂkhabase, ǃharaxūb ǃoa tsî ǂkhoamîs ǃoa, ǃhōmîs ǃoa, ǀâxareb ǃoa, ǁnā ǃkhaidi, ǁîdi ǃoa ta ǁîna nî doeǁgasīdi hoadi ǃnâ.

¹⁰Tsî tita ge ǁîn ǃnâ nîra sî gôab tsî ǃâtsūǀkhāb tsî ǂhīǁōb tsîna ǁnā ǃhūb, tita ge ǁîn tsî ǁîn îna māb ǃnân nîra hîkākāhes kōse.