Read Khoekhoegowab Jeremiab 25 Bible Online

Jeremiab 25 - Khoekhoegowab bible

Jeremiab 25

¹Mîs Jeremiaba ge hābas, Judab di ǁaes hoas ǂama hakaǁî kurib Jojakimmi, Josiab ôab, Judab gao-aob dib dis, ǂguro kurib Nebukadnesari, Babilons gao-aob dib ge ǁnāba ge i.

²Kēbo-aob Jeremiab ge Judab di ǁaes hoas ǃoa ge ǃhoa tsî ǁansaben Jerusalems din hoan ǃoa mî raǃâ:

³Disiǃnonaǀaǁî kurib Josiab Amonni ôab Judab gao-aob diba xu nē tsēs kōse; nēb ge a ǀgamdisiǃnonaǀaǁî kuri, nēs kōses ge ǃKhūb di mîsa tita ge hāba, tsî tita ge sadu ǃoa ǃnauǁgoaga khâi tsî ge ǃhoa, xawe sadu ge ǁnâu tama ge i.

⁴ǁKhātib ge ǃKhūba ǁîb ǃgāgu hoagu, kēbo-aoga, sado ǃoa ge sî, ǃnauǁgoaga khâi tsî ra sîǃâ, xawe sadu ge ǁnâu tama tsî sadu ǂgaesa ǂō tama ge i, ǁnâu du nîga.

⁵Mî rase: ǃHobasen du re, mâ-i hoa-e ǁî-i ǂkhaba daoba xu tsî ǂkhabasib ǁî-i dīgu diba xu, î du ǃhūb ǃnâ ǁan ǃKhūb ge sadu tsî sadu di îna māba ǀamosiba xu ǀamosib kōse.

⁶Î du tā ǀkhara eloga saoǃgon, ǁîga du nî ǃoabase tsî ǁîgu aiǃâ du nî ǃhonǁgoase, î du tā tita ǁaiǁai sadu ǃomgu di sîsengu ǀkha, î ta tita tā tsūdī du.

⁷Xawe sadu ge tita ǃgâ tama ge i, tib ra ǃKhūba mî, tita du nî ǁaiǁaiga sîsenni sadu ǃomgu dib ǀkha sadu di tsūǃōse.

⁸ǁNā-amagab ra ǃKhūb ǂnubidi diba nēti mî: Ti mîde du ge ǁnâu tama i amaga,

⁹mû, o ta ge tita nîra sî tsî ǃhaodi ǀapas didi hoade nîra ū, tib ra ǃKhūba mî, tsî Nebukadnesari Babilons gao-aob, ti ǃgāb ona, tsî ta ge ǁîna nē ǃhūb ǂama tsî ǁîb ǁansaben ǂama, tsî nē ǁaedi hîa ǁîb ǂnamipe hâdi hoadi ǂama nîra hā-ū tsî tita ge ǁîna nîra ǀâxarexū tsî ǁîna ǃhurise tsî ǃhōxūse tsî ǀamo ǃū-aisa ǃkhaise nîra ǂnûi.

¹⁰Tita ge ǁîna xu nîra toa kai dommi ǃgâiaǂgaob dib tsî dommi dâb dib tsî dommi ǃgame-aob dib tsî dommi ǃgame-aos dib, ǀōb ǁkhamis dib tsî ǃnâb ǃamamǀaes dib tsîna.

¹¹Tsî nē ǃhūb hoab ge nîra ǀuiǁkhopo, ǃū-aisa ǃkhai kai, tsî nē ǁaedi ge gao-aob Babilons diba hûdisi kurigu kōse nîra ǃoaba.

¹²Xawe i ge nîra ī, hûdisi kurigu ga ǀoa ǃnubai ta ge tita gao-aob Babilons dib tsî nē ǁaes ǂama, tib ra ǃKhūba mî, ǁîb ǂhanuoǃnâsiba ôaǃnâ tsî Xaldeaǁîn on di ǃhūb ǂama tsî ǁîba ǀamo ǃgaroǃhūse nîra ǂnûi.

¹³Tsî tita ge ǁnā ǃhūb ǂama ti mîdi tita ge ǁîn ǂama ǃhoadi hoade nîra ūhā, ǁnān nē ǂkhanis ǃnâ xoahe hân hoan, Jeremiab nē ǁaedi hoadi ǂama gere kēbona.

¹⁴ǁÎn on ge ǀgaisa ǁaedi tsî kai gao-aoga nîra ǃoaba kaihe xui-ao: Nēti ta ge tita ǁîna ǁîn dīgu ǃoa tsî ǁîn ǃomgu di sîsenni ǃoa nîra mādawa-am.

¹⁵Nētib ge ǃKhūb Israeli Eloba tita ǃoa mî xui-ao: Ū nē ǀgabis ti ǁgôasib di ǂauxûib disa ti ǃomǁaeba xu, îts ǁîsa ǁnā ǁaedi hoadi ǁîdi ǃoa ta nî sî tsidi hoade āsi,

¹⁶în ā, în ǀkhū, în ǃkhau ǁnā gôab, ǁîn ǁaegu ta nî sîb xa.

¹⁷O ta ge tita ǀgabisa ǃKhūb ǃomǁaeba xu ū tsî ǁîsa ǁnā ǁaedi ǃKhūb ge tita ǁîn ǃoa sîdi hoade ge āsi:

¹⁸Jerusalems tsî ǃādi Judab didi tsî ǁîdi gao-aogu tsî ǁîdi gaosagu tsîna, ǁîn nî ǃū-aisa ǃkhai tsî burugâxū tsî ǃhōxū tsî ǀâxare kaise nētsē i ī khami;

¹⁹Faraob Egipteb gao-aob, tsî ǁîb ǃgāgu tsî ǁîb gaosagu tsî ǁîb ǁaes hoas tsîna,

²⁰tsî habasa ǂguib hoab tsî gao-aogu Usǃhūb digu hoaga, tsî Filisteǁîn ǃhūb di gao-aogu hoagu tsî Askelons tsî Gasas tsî Ekrons tsî ǃgau gen Asdods dina;

²¹Edommi tsî Moab tsî Amonni ôan tsîna;

²²tsî gao-aogu Tires digu hoaga tsî gao-aogu Sidons digu hoaga tsî gao-aogu ǁnā ǃnāǃnuidi, hurib nauǃnani hâdi digu hoaga;

²³Dedanni tsî Temanni tsî Busi tsî ǀûn ân ǀamdi ai ǂkhomhe hân hoana;

²⁴tsî Arabiab gao-aogu hoaga, tsî habasa ǂguib gao-aogu, ǃgaroǃhūb ǃnâ ǁan hâga;

²⁵Simrib gao-aogu hoaga tsî Elammi gao-aogu hoaga tsî Medieb gao-aogu hoaga;

²⁶tsî ǀapas gao-aogu hoaga ǀgūse hâgu kas, ǃnūse hâgu kas, nēb kas naub kas hoasa, ā, gaosidi ǃhūbaib didi, ǃhūbaib ai hâdi kas hoasa. Tsî gao-aob Sesaxs dib ge ǁîgu khaoǃgâ nîra ā.

²⁷Ots ge satsa ǁîgu ǃoa nî mî: Nētib ra ǃKhūb ǂnubidi dib, Israeli Eloba, mî: Ā î du āǁō, î du ǀkhûi î du ǁnāǁgoe, ǁkhawa du khâi ǁkhā tides kōse ǁnā gôab sadu ǁaegu ta nîra sîb xa.

²⁸Tsî i ge nîra ī, ǀgabisa sa ǃomǁaeba xu ūsa gu ga ǂkhā ǃnubaits ge satsa ǁîgu ǃoa nî mî: Nētib ra ǃKhūb ǂnubidi diba mî: Sago ge ǂanǂansase nîra ā.

²⁹Tsî mû, ǁnā ǃās, ti ǀons ǃoa ǂgaihe hâs ǃnâ ta ge tita nîra ǂkhabadītsoatsoa, tsî sado kha, ǀhapiose du nî ūhâhe? Sadu ge ǀhapiose ūhâhe tide, tita ge gôaba nîra ūkhâi ǁansaben ǃhūbaib din hoan ǂama, tib ra ǃKhūb ǂnubidi diba mî.

³⁰Ots ge satsa nē mîdi hoade ǁîna nî kēboba, tsîts ge ǁîn ǃoa nî mî: ǃKhūb ge ǀgapiseba xu nîra ǃguru tsî nîra ǃau ǁanǃkhais ǁîb ǃanusib disa xu, ǃhuriǃhurisaseb nî ǁîba ǃguru ǁîb ǁanǃkhaisa xu, ǁîb nî dâǃau-e ǂgaiǂui xui-ao, ǂauxûiǂûhais ǂûna ra ǃgao khoen di-i khami ī-e, ǃhūbaib di ǁansaben hoanǀî.

³¹ǀŌb ge ǃhūbaib di ǀams kōse nîra sī, ǃKhūb ǂnoaguǃkhai-e ūhâ ǁaedi ǀkha xui-ao; ǁîb ge ǁgans hoasa nîra ǀgoraǃgâ eloxoresanab ge ǁîba gôaba ge māǁnâ, tib ra ǃKhūba mî.

³²Nētib ra ǃKhūb ǂnubidi diba mî: Mû, ǂkhaba-i ge ǁaesa xu ǁaes ǃoa ra ǂoa; tsî kai tūǀnanu-i ge ǃhūbaib di ǀkhāgu hoaga xu ra khâi.

³³Tsî ǃgamhesan ǃKhūb din ge ǁnātsē nîra ǁgoe ǃhūbaib di nē ǀamsa xu ǃhūbaib di nau ǀams kōse. ǁÎn ge ǃgaebahe tamas ka io ūkhâihe tamas ka io ǁkhōhe tide, ǁîn ge nîra ǀaru kai ǃhūb ai.

³⁴Ā kō re, sago ǃûi-aogo; î go ā tsî tsaob ǃnâ ǃhobosen, sago gūn di gaoǂamaogo. Sago di tsēdi go ǀoa xuige, ǂāhe go nîse, tsî go nî ǀgaruǀgaruhese; ǁgoasi go ge ǃgomǀgausa xapa-i khami nîra ǁnā.

³⁵Tsî ǁhaiǁhâs ge ǃûi-aoga nîra ǀkhaiba, tsî ûiǂoasa gūn di gaosaga.

³⁶Dommi ǃûi-aogu ǂgais dib ge nîra hâ tsî ǃgae-ās gūn gaosagu disa, ǃKhūb ra ǃû-aib âna hîǀhuru amaga.

³⁷ǃÛ-aidi ǂkhîb didi ge nîra hîkākāhe ǀgamsib ǃKhūb ǁaib dib ǃaroma.

³⁸ǁÎb ge ǂkham xammi khami hâǃkhais âba ge ǁnāxū: ǁÎn di ǃhūb ge ge hîǀhuruǃkhai kai ǀgamsib ǁgâiǀā-aob dib xa, ā, ǀgamsib ǁîb ǁaib dib xa.