Read Khoekhoegowab Jeremiab 27 Bible Online

Jeremiab 27 - Khoekhoegowab bible

Jeremiab 27

¹Tsoatsoas Sedekiab, Josiab ôab, Judab gao-aob di gaosis dis ǃnâs ge mîsa Jeremiaba ǃKhūba xu ge hāba, mî rase:

²Nētib ge ǃKhūba tita ǁga ge mî: ǃGae-ūdan tsî ǃnaogu tsîna dībasen îts ǁîna ǃaob âts ai ǁgui.

³Îts ǁîna sî Edommi gao-aob ǃoa tsî Moab gao-aob ǃoa tsî Amonni ôan gao-aob ǃoa tsî Tires gao-aob ǃoa, tsî Sidons gao-aob ǃoa, ǁnā sîsabegu Jerusalems tawa Sedekiab, Judab gao-aob, ǁga nî hāgu ǀkha.

⁴Îts ǁîga mîmā, î gu ǀhonkhoegu âga mîba: Nētib ra ǃKhūb ǂnubidi dib, Israeli Eloba mî: Nēti go ge sago ǀhonkhoegu ǃoa nî mî:

⁵Tita ge ge dī ǃhūb tsî khoeb tsî ǀgoan ǃhūbaib ai hân tsîna ti kai ǀgaib ǀkha tsî ti ǀhōǂuihesa ǁôab ǀkha, tsî tita ge ǁîna ǂgao ta ra-i hoa-e ra mā.

⁶Tsî nēsi, tita ge nē ǃhūgu hoaga Nebukadnesari, Babilons gao-aob, ti ǃgāb ǃomǁae ge mā; ǀgurun ǃaub din kōse ta ge tita ǁîna ǁîba ge mā, ǁîban nî ǃoabase.

⁷O di ge ǁaedi hoade ǁîb tsî ǁîb ôab tsî ǀgôab âb di ôaba nîra ǃoaba, ǁîb ǃhūb on di ǁaeb nîra hās kōse; ǃnubain ge ǀgaisa ǁaedi tsî kai gao-aogu tsîna ǁîba nîra ǃoabakaisen.

⁸Tsî i ge nîra ī, ǁnā ǁaes tsî ǁnā gaosis, hîa Nebukadnesari, Babilons gao-aoba ǃoaba ǂgao tama nî is tsî ǃaob âsa Babilons gao-aob ǃnaob ǃnaga mā ǂgao tama nî is, ǁnā ǁaes ǂama ta ge tita, tib ra ǃKhūba mî, ôaǃnâsa nîra dī gôab ǀkha tsî ǃâtsūǀkhāb ǀkha tsî ǂhīǁōb ǀkha, ǁîna ta nî hîkākās kōse ǃomǁaeb âba xu.

⁹Î du ǁnâi sado tā ǃgâ sadu di kēbo-aoga tsî sadu aimûǀgaru-aoga tsî sadu ǁhapo-aoga tsî sadu ǃgai-aogu, sadu ǃoa ra ǃhoa tsî: Sadu ge Babilons gao-aoba ǃoaba tide ti ra mîga.

¹⁰ǁÎgu sado ǂkhabase ra kēboba xui-ao, ǃnūse gu nî sadu ǃhūba xu ūbē duse, tsî tita nî ǂhāǂui duse, kā du nîga.

¹¹Xawe ǁnā ǁaes, ǃaob âsa Babilons gao-aob di ǃnaob ǃnaga ǃgamǃgam tsî ga ǁîba ǃoabas, ǁîsa ta ge tita ǁîs di ǃhūb ǃnâ nîra hâ kai, tib ra ǃKhūba mî, tsîn ge ǁîb ǃnâ nîra sîsen tsî ǁîb ǃnâ nîra ǁan.

¹²ǁNās khaoǃgâ ta ge Sedekiab Judab gao-aob ǃoa nē mîde ǃoa ǃhoa tsî ge mî: Ūhā sadu ǃaoga Babilons gao-aob ǃnaob ǃnaga, î du ǁîb tsî ǁîb ǁaesa ǃoaba, o du ge nîra ûi.

¹³Tarexa du kha ǁnâi nî ǁō, sats tsî sa ǁaes tsîdo, gôaba xu tsî ǃâtsūǀkhāba xu tsî ǂhīǁōba xu? ǃKhūb ge ǃhoa xase, ǁnā ǁaes, hîa Babilons gao-aoba ǃoaba tides xa.

¹⁴ǁNâi tā ǃgâ ǁnā mîdi kēbo-aogu sado ǃoa ra ǃhoagu dide, mî raǃâ: Sadu ge Babilons gao-aoba ǃoaba tide ti, ǁîgu ǂkhabase ra kēboba du xui-ao.

¹⁵Tita ǁîga sî tama xuige, tib ra ǃKhūba mî. Tsî gu ge ti ǀons ǃnâ ǂkhabase ra kēbo, tita sado nî ǂhāǂuiga, tsî sadu nî kāse, sadu tsî ǁnā kēbo-aogu sado ra kēboba gu tsîdo.

¹⁶ǁKhāti ta ge pristergu tsî nē ǁaes hoas ǃoa ǃhoa tsî ge mî: Nētib ra ǃKhūba mî: Tā ǃgâ ǁnā kēbo-aogu, sado ra kēboba gu di mîde, mî rase: Mû, xapan ǃKhūb ommi din ge nēsi ǃhaese Babilonsa xu ǁkhawa nîra ūhāhe. ǁÎgu ǂkhabase ra kēboba du xui-ao.

¹⁷Tā ǁîna ǃgâ, î du Babilons gao-aoba ǃoaba, o du ge nîra ûi. Tarexas kha ǁnâi nē ǃāsa nî ǃū-aisa ǃā kai?

¹⁸Tsî kēbo-aogu ka io tsî ǃKhūb mîs ga ǁîgu ǀkha hâo, a gu ǁnâi nēsi ǃKhūb ǂnubidi diba aiǀgoreba, în ǁnā xapan, ǃKhūb ommi ǃnâ tsî Judab gao-aob ommi ǃnâ tsî Jerusalems tawa ge ǃgauna, tā ǁkhāti Babilons tawa sī, ti.

¹⁹Nētib ra ǃKhūb ǂnubidi diba mî xui-ao, ǂkhâǃnâhaigu xa tsî hurib xa tsî ǂnûi-aiǃkhaidi xa tsî nau soadi, nē ǃās ǃnâ ge ǃgaudi tsîn xa,

²⁰Nebukadnesari Babilons gao-aob ūbē tamadi, Jexonjab, Jojakimmi ôab, Judab gao-aobab ge Jerusalemsa xu Babilons ǃoa ǃkhōsase ūǃgû ǃnubai, ǀgapiǃgôasagu Judab tsî Jerusalems tsîra digu ǀkha;

²¹ā, nētib ra ǃKhūb ǂnubidi dib, Israeli Eloba mî, ǁnā xapadi, ǃKhūb ommi ǃnâ hâdi xa, tsî Judab gao-aob ommi ǃnâ tsî Jerusalems tawa ge ǃgaudi xa:

²²ǁÎdi ge Babilons ǃoa nîra ūsīhe, tsî di ge ǁnāpa nîra hâ, ǁnā tsēs tita ǁîna ǁîs ai nîra ôaǃnâs kōse, tib ra ǃKhūba mî. ǃNubai ta ge tita ǁîna nîra ǂgaeǂguiǃapa tsî ǁîna nē ǃās ǁkhās ǃoa ǁkhawa nîra ūhā.