Read Khoekhoegowab Jeremiab 28 Bible Online

Jeremiab 28 - Khoekhoegowab bible

Jeremiab 28

¹ǃAruǀî i ge ǁnā kurib ǁkhāb ǃnâ, Sedekiab, Judab gao-aob, di gaosis tsoatsoas ǃnâ, hakaǁî kurib di koroǁî ǁkhâb ǃnâ ge ī, Hananjab Asuri ôab, kēbo-aob Gibeons di ge ib, ge tita ǃhoa-ū ǃkhaisa ǃKhūb ommi ǃnâ pristergu tsî ǁaes hoas di mûdi aiǃâ, mî rase;

²Nētib ra ǃhoa ǃKhūb ǂnubidi dib, Israeli Eloba, mî raǃâ: Tita ge ǃnaob Babilons gao-aob diba ge khôa.

³ǀNî ǀgam kurikha ǃnâ ta ge tita nē ǃās ǃoa ǁkhawa nîra ūhā ǁnā xapadi ǃKhūb ommi didi, Nebukadnesari, Babilons gao-aob, ge nē ǃāsa xu ūbē tsî Babilons ǃoa ūsīdi hoade.

⁴ǁKhāti ta ge tita Jexonjab, Jojakimmi ôab, Judab gao-aob, tsî ǁnān ǃkhōsase Judaba xu ge ǂgaeǂguibēhen, Babilons tawa ge sīn hoana nē ǃās ǃoa ǁkhawa nîra ūhā, tib ra ǃKhūba mî, tita ǃnaob Babilons gao-aob diba nîra khôaǂkhū xui-ao.

⁵ǃNubaib ge kēbo-aob Jeremiaba kēbo-aob Hananjab ǃoa ge ǃhoa pristergu di mûdi aiǃâ tsî ǁaes hoas di mûdi aiǃâ tsî ǁnān ǃKhūb ommi ǃnâ ge mâ in aiǃâ.

⁶Tsî kēbo-aob Jeremiab ge ge mî: Amen, ab ǃKhūba ǁnāti dī. Ab ǃKhūba ǁapoǁapo sa mîdi, sats ge kēbode, îb ǁîba xapadi ǃKhūb ommi didi tsî ǁnān ǃkhōsase ge ǂgaeǂguibēhen hoana Babilonsa xu ǁkhawa ūhā nē ǃās ǃoa.

⁷Xawe nēsi ǁnâu nē mîs, sa ǂgaera ǃnâ tsî ǁaes hoas ǂgaedi ǃnâ ta ra ǃhoasa;

⁸ǁnā kēbo-aogu, ti aiǃâ tsî sa aiǃâ hugasa xu ge hâ igu, ǁîgu ge ǂgui ǃhūgu ǃoagu tsî kai gaosidi ǃoagu gere kēbo torob xa tsî ǃâtsūǀkhāb xa tsî ǂhīǁōb xa.

⁹ǁNā kēbo-aob hîa ǂkhîb xa nî kēbob, ǁnā kēbo-aob di mîs ga hāo, ob ge ǁîba nîra ǂansa ǃKhūb ge ǁîba amab ǃnâ sî ǃkhaisa.

¹⁰ǃNubaib ge kēbo-aob Hananjaba Jeremiab ǃaoba xu ǃnaoba ūǁnâ tsî ge khôaǂkhū bi,

¹¹tsî Hananjab ge ǁaes hoas di mûdi aiǃâ ǃhoa tsî ge mî: Nētib ra ǃKhūba mî: Nēti ta ge tita ǃnaob Nebukadnesari, Babilons gao-aob diba ǀnî ǀgam kurikha ǃnâ ǁaedi hoadi di ǃaoba xu nîra khôaǂkhū. Ob ge kēbo-aob Jeremiaba ǁîb daoba ge ǃgû.

¹²Xawes ge ǃKhūb mîsa Jeremiaba ge hāba, kēbo-aob Hananjab ge ǃnaoba kēbo-aob di ǃaoba xu khôaǂkhū ǃnubai, mî rase:

¹³ǃGû, îts Hananjab ǃoa ǃhoa îts mî: Nētib ra ǃKhūba mî: Haiǃnaogats ge satsa go khôaǂkhū, ots ge nēsi ǁîgu di amǃnâs ai ǂnūǀuriǃnaoga nî dī.

¹⁴Nētib ra ǃKhūb ǂnubidi dib, Israeli Eloba, mî xui-ao: Tita ge ǂnūǀuriǃnaoba nē ǁaedi hoadi di ǃaob ai ge ǁgui, Nebukadnesari, Babilons gao-aoban nî ǃoabase, tsîn ge ǁîba nîra ǃoaba. Ā, ǀgurun ǃaub din ona ta ge tita ǁîba ge mā.

¹⁵Ob ge kēbo-aob Jeremiaba kēbo-aob Hananjab ǃoa ge mî: ǃGâ re, sats Hananjatse, ǃKhūb ge satsa sî tama hâ, tsî sats ge ǁîts, nē ǁaesa ge ǂhumigu ai ǂgomaiǂnûi kaitsa.

¹⁶ǁNā-amaga nētib ra ǃKhūba mî: Mû, tita ge satsa ǃhūbaiba xu nîra ǂhābē, nē kurib ǃnâts ge satsa nîra ǁō, ǁnāǁgôasats go ǃKhūb ǃoagu ǃhoa amaga.

¹⁷Nētib ge kēbo-aob Hananjaba ǁnā kurib ǁkhāb ǃnâ ge ǁō, hûǁî ǁkhâb ǃnâ.