Read Khoekhoegowab Jeremiab 29 Bible Online

Jeremiab 29 - Khoekhoegowab bible

Jeremiab 29

¹Tsî nēdi ge mîdi ǁnā ǂkhanis, kēbo-aob Jeremiab ge Jerusalemsa xu ǃgau ge kaigu, ǃkhōsase ge ūǃgûbēhegu ǃoa tsî pristergu tsî kēbo-aogu ǃoa tsî ǁnā ǁaes hoas Nebukadnesari xa Jerusalemsa xu Babilons ǃoa ge ūǃgûbēhes ǃoa sîs dide;

²gao-aob Jexonjab tsî gaosas tsî ǃnā-omǃoabasabegu tsî gaosagu Judab tsî Jerusalems tsîra digu tsî haikuru-aogu tsî ǂnūǀuriǂnau-aogu Jerusalems digu tsîn ge ǂoa ǃnubai.

³Eleasab, Safanni ôab tsî Gemarjab Hilkiab ôab tsîkha ǀkha Sedekiab, Judab gao-aob xa Babilons ǃoa Nebukadnesari Babilons gao-aob ǁga ge sîhekha, mî rase:

⁴Nētib ra ǃKhūb ǂnubidi dib, Israeli Eloba, mî ǁnān ǃkhōsase ge ūǃgûhen hoan ǃoa, ǁnān tita ge ǃkhōsase Jerusalemsa xu Babilons ǃoa ǂgaeǂguibē kain ǃoa:

⁵Omde ǂnubibasen, î du ǁîdi ǃnâ ǁan, î du ǃhanaga ǂgā, î du ǁîgu ǂûn xa ǂû.

⁶Tarade ū, î du ǀgôagu tsî ǀgôadi tsîna hō; î du sadu ôaga tarade ūba, î du sadu ôade aoga mā, în ǀgôagu tsî ǀgôadi tsîna ǁora. Î du ǁnāpa ǂguiǂguisen, î du tā ǀoro.

⁷Î du ǁnā ǃās, ǁîs ǃoa ta nî ǃkhōsase ǂgaeǂguibē kai dus di ǂkhîba ôa. Î du ǁîsa ǃKhūba ǀgoreba, ǁîs ǃnâb ǂkhîba hâ, o du sado ǂkhîba nîra ūhâ xuige.

⁸Nētib ra ǃKhūb ǂnubidi dib, Israeli Eloba, mî xuige: A gu sadu kēbo-aogu tsî sadu aiǀgaru-aogu tsîgu, sadu ǁaegu hâga, tā ǂgaeǂhapu du, î du tā ǃgâ sadu ǁhapo-aogu hîa du ra ǁhapo kai ga.

⁹ǁÎgu ge ti ǀons ǃnâ ǂkhabase ra kēboba du xuige. Tita ge ǁîga sî tama hâ, tib ra ǃKhūba mî.

¹⁰Nētib ra ǃKhūba mî xuige: Amase, hûdisi kurigu ga Babilons tawa ǀoao, o ta ge nîra ôaǃnâ du, o ta ge tita ti ǃgâi mîsa nîra ǂkhaiǂkhaiba du, nē ǃās ǁga ǁkhawa ra ūhā duǃâ.

¹¹Tita ge ǁnā ǂâidi sadu xa ta ra ǂâide a ǂan xui-ao, tib ra ǃKhūba mî, ǂâidi ǂkhîb dide tsî ǂkhabab di tamade, î ta ǃâubasens ǀkha hâ ǀamsa mā du.

¹²ǃNubai du ge tita nîra ǂgaiǀî tsî ǃgû tsî tita ǃoa nîra ǀgore, o ta ge sado nîra ǁnâu-am.

¹³Tsî du ge tita nîra ôa tsî hō, tita du ga sadu ǂgaob hoab ǀkha dî ôa ǃnubai.

¹⁴O ta ge tita sadu xa nîra hōkaisen, tib ra ǃKhūba mî, o ta ge tita sadu ǃkhōsisa dī-unu tsî nîra ǀhaoǀhao du ǁaedi hoade xu tsî ǁnā ǃādi, ǁîdi ǃoa ta ge doeǁgabē du di hoade xu, tib ra ǃKhūba mî, o ta ge tita ǁnā ǃās ǁîsa xu ta ge sado ǃkhōsase ǂgaeǂguibē kais ǃoa ǁkhawa nîra ūhā du.

¹⁵Sadu: ǃKhūb ge kēbo-aoga Babilons tawa ge ǂkhaiǂkhaiba da ti ra mî amaga.

¹⁶ǁNā-amagab ra ǃKhūba nēti mî ǁnā gao-aob, Davib trons ai ǂnôab xa tsî ǁnā ǁaes, nē ǃās ǃnâ ǁan hâs hoas xa, ǁnā ǃgâsan âdu, sadu ǀkha ǃkhōsisa xu ǃgûǂoa taman xa.

¹⁷Nētib ra ǃKhūb ǂnubidi diba mî: Mû, tita ge gôab tsî ǃâtsūǀkhāb tsî ǂhīǁōb tsîga ǁîn ǁaegu nîra sî tsî tita ge ǁîna ǁnā ǁgaisi ǀnoman, hîa ǁgaorasib ân ǃaroma ǂûhe ǁoan khami nîra dī.

¹⁸Tsî tita ge ǁîna nîra sauruǃgon gôab ǀkha tsî ǃâtsūǀkhāb ǀkha tsî ǂhīǁōb ǀkha. Tsî ta ge ǁîna gaosidi hoade ǃhuriǃhurixūse nîra māǁnâ tsî ǀâxarese tsî burugâse tsî ǃhōxūse tsî ǃharaxūxūse ǁnā ǁaedi, ǁîdi ǃoa ta ǁîna nî doeǁgasīdi hoadi ǁaegu.

¹⁹Ti mîdi ain ge ǃgaoǃgâ tama i amaga, tib ra ǃKhūba mî, ti ǃgāgu kēbo-aoga ta ge ǁîn ǃoa sî ǃnubai, ǃnauǁgoaga khâi tsî ra sîǃâ. Xawe sadu ge ǁnâu ǂgao tama ge i, tib ra ǃKhūba mî.

²⁰Î du ǁnâi ǁnâu ǃKhūb di mîsa, sadu ǃkhōsase ge ǂgaeǂguibēhedo, tita xa Jerusalemsa xu Babilons ǃoa sîbēhe hâdu hoado.

²¹Nētib ra ǃKhūb ǂnubidi dib, Israeli Eloba mî Axab Kolajab ôab tsî Sedekiab Maasejab ôab tsîkha, ti ǀons ǃnâ ǂkhabase ra kēboba du kha xa: Mû, tita ge ǁîkha Nebukadnesari Babilons gao-aob ǃomǁae nîra mā, ob ge ǁîba ǁîkha sadu di mûdi aiǃâ nîra ǂnau.

²²Tsî ǁîkha xu i ge ǀâxare-e nîra ūhe, ǃkhōsase Judaba xu ge ǂgaeǂguibēhe hâ in hoan, Babilons, ǃnâ hâ khoen tawa: Ab ǃKhūba dī tsi Sedekiab tsî Axab tsîkha, Babilons gao-aob xa ǀaes ǃnâ ge amhekha khami, tin nî mîs kōse.

²³Gâresi-e kha Israeli ǃnâ gere dī; tsî ǀgūkhoegu âkha di taradi ǀkha kha gere ǀai tsî mîsa kha ti ǀons ǃnâ ǂkhabase gere kēbo amaga, ǁîkha ta mîmā tama khami. Tsî tita ge ǁnā ta, ǁî xūna a ǂan tsî ǁîna ra ǀhûǀguitimî ta, tib ra ǃKhūba mî.

²⁴Tsî Semajab Nexelamǁîb ǃoats ge ǃhoa tsî nî mî;

²⁵Nētib ra ǃKhūb ǂnubidi dib, Israeli Eloba ǃhoa tsî mî: ǂKhanidets ge satsa sa ǀons ǃnâ ǁaes Jerusalems ǃnâ hâs hoas ǃoa tsî Sefanjab, Maasejab ôab, pristeri tsî pristergu hoagu ǃoa sî amaga, mî rase:

²⁶ǃKhūb ge satsa pristerse ge mâi, pristeri Jojadab di ǃās ǃnâ mûǂamaots nîga, ǃKhūb ommi ǃnâ mâ aob, ǃkhausab tsî kēbo-aose ra dīsenni hoab ǂama, ǁîbats nî ǂnûise ǃkhō-oms ǃnâs kas ǃnaob ǃnâs kas hoasa.

²⁷Tsî nēsi tarexats kha ǁnâi Jeremiab, Anatotǁîb, ǁî-aitsama sadu tawa kēbo-aose ra dīsenna ǀau tama hâ?

²⁸ǁNā-amagas ge sida ǁga Babilons ǃoab ge sîsa mî raǃâ: ǂOmxa nîra, xuige omde ǂnubibasen, î du ǁîdi ǃnâ ǁan, î du ǃhanaga ǂgā, î du ǁîgu ǂûn xa ǂû.

²⁹Tsî Sefanjab, pristeri, ge nē ǂkhanisa ge khomai kēbo-aob Jeremiab ǂgaera ǃnâ.

³⁰ǁNā-amagas ge ǃKhūb di mîsa Jeremiaba hāba tsî ge mî:

³¹Sîsī ǁnān ǃkhōsabese ge ūǃgûbēhen hoan ǃoa, mî raǃâ: Nētib ra ǃKhūba mî Semajab, Nexelamǁîb xa Semajab sado gere kēboba amaga, tita ǁîba sî tama hîa, tsî ǂhumib ai du nî ǂgomaiǂnûi ǃkhaisab ge dī amaga.

³²ǁNā-amagab ra ǃKhūba nēti mî: Mû, tita ge nîra ôaǃnâ Semajab, Nexelamǁîb ǂama tsî ǁîb di surib ǂama. ǁÎb ge khoe-i ǁaes ǁaegu nî ǁan-i tsî ǁnā ǃgâib, tita ti ǁaesa nî dī-ūba nî mû-i xare-e ūhâ tide, tib ra ǃKhūba mî, ǁnāǁgôasi-eb ǁîba ǃKhūb ǃoagu gere ǃhoa xui-ao.