Read Khoekhoegowab Jeremiab 3 Bible Online

Jeremiab 3 - Khoekhoegowab bible

Jeremiab 3

¹Khoen ra mî: Aob ga taras âba xūo, tsîs ga ǁîba xu bē tsî ǀkhara aob di kaio, ǁkhawab kha ǁîba ǁîs ǃoa nî oa? ǁNā ǃhūba ǀuriǀuriheb tide? Tsî sas ge ǂgui ǀai-aoga ge ǀai, tsî ti i ga ī, xawe tita ǃoa ǁkhawa oa tib ra ǃKhūba mî.

²Kōkhâi ǀgapi ǃkhaidiǀî îs mû, mâ ǃkhai-i ais ǁom-ūhe tama ǃkhaisa. Sas ge ǁîga daob amǃgâ gere ǂnûǃâu, Arabiaǁîb khami ǃgaroǃhūb ǃnâ, ǁnās ǁkhās khamis ge sasa ǃhūba ge ǀuriǀuri ǀaib tsî ǂkhabasigu âs ǀkha.

³ǁNā-amaga gu ge ǀapib di ǁgamga ge ǃkhōdawahe, tsî ǃnaresi-i xare-i ge ge ǀkhai, xawe sas ge ǀai-aoǃūsa ūhâ, tsîs ge taosa ra ǂkhā.

⁴Tsîs kha nēsisa xu tita: Ti î, ti ǂkhamsis di ǂgaeǂgui-aots ge satsa, ti ǂgai tide?

⁵ǀAmoseb kha nî ǁaixahâhâ? Ūhâhâb nî ǁaib âba? Mû, sas ra ǁnā ǂkhabasiga ǃhoa tsî dī, tsîs ra dā.

⁶ǃAruǀîb ge ǃKhūba tita ǁga ge mî, gao-aob Josiab di tsēdi ǃnâ: Mûts ge ǁnāǁgôaxa Israels ge dī ǃkhaisa? ǁÎs ge gere ǃgûma ǀgapi ǃhommi hoab ai tsî mâ ǃam hais hoas ǃgao, tsîs ge ǁnāpa gere ǀai.

⁷O ta ge tita nēn hoanas ge dīs khaoǃgâ: Tita ǃoa ǃhobasen, ti ge mî, xawes ge ǁîsa ǃhobasen tama ge i. ǁÎ ǃkhaisas ge ǁnā ǂgomǂgomsa tamas, ǁîs ǃgâsas Judasa ge mû.

⁸O ta ge tita ge mû, ǁnāǁgôaxa Israelsa ta ge ǃgamekhôas ge xūn hoan ǃaroma ǁnāxū tsî ǀgoraǂkhanisa a mā, xawes ge ǁnā ǂgomǂgomsa tamasa, ǁîs ǃgâsas Judasa ǃao tama i tsî ǃgû tsî ǁkhāti gere ǀai ǃkhaisa.

⁹Tsî i ge ge ī, gommi ǀaib âs dib xab ge ǃhūba ǀuriǀurihe ǃkhaisa, ǀui-i tsî hai-i tsîn ǀkhas ge ǀaigu xui-ao.

¹⁰Tsî nēn hoan on ǃnâs ge ǁîs di ǂgomǂgomsa tama ǃgâsas Judasa tita ǃoa ǂgaob hoab ǀkha ǃhobasen tama tsî ǂkhabase ge ǃhobasen, tib ra ǃKhūba mî.

¹¹Ob ge ǃKhūba tita ǁga ge mî: ǁNāǁgôaxa Israels ge ǀoms âsa ǂgomǂgomsa tama Judas xa ge ǂhanu-ai kai.

¹²ǃGû îts nē mîde ǀapasǀî ǂgai îts mî: ǃHobasen re, ǁnāǁgôaxa Israelse, tib ra ǃKhūba mî, o ta ge tita ti ǁaiba sa ai ǁnā kai tide, tita a ǃgâiǃnâxa xui-ao, tib ra ǃKhūba mî, tita ge ǀams kōse ǁaixahâhâ tide.

¹³Xawe ǂan sa ǂhanuoǃnâsiba, ǃKhūb sa Elob ǃoagus ge ǃûǂam tsî daogu âs ais ge ǃhao-elon ǃoa gere ǃkhoema ǃkhaisa, mâ ǃam hai-i hoa-i ǃgao, tsîs ge ti domma ǁnâuǀnam tama i ǃkhaisa, tib ra ǃKhūba mî.

¹⁴ǃHobasen du re, sadu ǁnāǁgôa hâ ǀgôado, tib ra ǃKhūba mî, tita a sadu di ǃgame-ao xuige. O ta ge tita nî ǃkhōǃoa du, ǀguiba nē ǃāsa xu, tsî ǀgamna ǀgui ǃhaosa xu, tsî ta ge Sions tawa nîra ūsī du.

¹⁵O ta ge sado ǃûi-aoga nîra mā, tita ra ǂgao khami īga: ǁÎgu ge ǂans tsî ǁnâuǃāb tsîra ǀkha nîra ǃûi du.

¹⁶Tsî i ge nîra ī, ǃhūb ǃnâ du ga ǂgui tsî ǂûǂûxao, ǁnā tsēdi ǃnân ge ǃaruǀî mî tide, tib ra ǃKhūba mî: ǃGaeǀhaos ǂgaes ǃKhūb dis; ǁkhātis ge ǂgaob ǃnâ khâi tide, tsîn ge ǁîs xa ǂâi tide tsî ǁîsa sari tide, tsîs ge ǁkhāti ǁkhawa dīhe tide.

¹⁷ǁNā ǁaeb ǁkhāb ain ge Jerusalemsa, ǃKhūb di tron, ti nîra ǂgai, o di ge ǁaedi hoade ǁîs tawa nîra ǀhao ǃKhūb di ǀons ǃaroma Jerusalems ǃnâ, on ge ǃaruǀî tsū ǂâis ǁîn ǂkhaba ǂgaob dis ǃoa dī tide.

¹⁸ǁNā tsēdi ǃnâb ge Judab omma Israeli ommi ǃoa nîra ǃgû; on ge ǃhūb ǀapas diba xu nîra ǀguihā, ǁnā ǃhūb, sadu îna ta ge tita ǀumise māb ǃnâ.

¹⁹Tita ge ge mî: Mati ta ǁnâi tita satsa ǀgôan ǃnâ nî ǂnûi tsî ǃgomǀgausa ǃhūb hoan xa ǂkhaisa ǀumis ǁaedi dis diba nî mā tsi? O ta ge tita ge mî: Sadu ge tita: Ti îtse ti nîra ǂgaiǀî, tsî du ge tita xu ǁkhawa oa tide.

²⁰Amase taras ra îǂhôaoǃnâse ǀnamsab âsa xu ǀgora khami, ǁnās ǁkhās khami du ge tita îǂhôaoǃnâse ge sîsenū, sadu Israeli ommi dido, tib ra ǃKhūba mî.

²¹Dommi ge ǀgapi ǃkhaidi ai ge ǁnâuhe, Israeli ôan di ās tsî ǀkhomas tsîra diba, ǁîn daoba xūn ge dawasen tsî ǃKhūb ǁîn di Eloban ge ǀuru amaga.

²²ǁKhawa oaǃhoba du re, sadu ǁnāǁgôaxa ǀgôado; tita nî sadu di ǁnāǁgôasiga ǂgauǂgau xuige. Mû, nē da hâ, sida ge sa ǃoa ra hā, sats ge a ǃKhū, sida di Elo xui-ao.

²³Amase, ǁaub ge a ǃnomdi tsî ǃhomgu di ǂguiba, amase, ǃKhūb sida Elob ǀguib ǃnâb ge ǃgâiǃōb Israeli diba hâ.

²⁴Taob ge xūreb sida în diba hapu xui-ao, sida ǂkhamsisa xu; ǁîn di gūn tsî ǁîn goman, ǁîn ôagu tsî ǁîn ôadi tsîna.

²⁵Sida ge sida taob ǃnâ ǁgoe, tsî da ge taob âda xa ra ǃgū-aihe. ǃKhūb sida Elob ǃoagu da ge ǁore amaga, sida tsî sida di în tsîda; sida di ǂkhamsisa xu nētsēs kōse, tsî da ge dommi ǃKhūb sida Elob diba ǁnâuǀnam tama ge i.