Read Khoekhoegowab Jeremiab 30 Bible Online

Jeremiab 30 - Khoekhoegowab bible

Jeremiab 30

¹Mîs Jeremiaba ǃKhūba xu ge hābas, mî raǃâ:

²Nētib ra ǃKhūb Israeli Eloba ǃhoa tsî mî: ǁNā mîdi, tita ge satsa ǃhoa-ūdi hoade ǂkhani-i ǃnâ xoabasen.

³Mû, tsēdi ge nîra hā, tib ra ǃKhūba mî, ǁîdi ǃnâ ta tita ǃkhōsis ti ǁaes Israeli tsî Judab tsîkha disa nîra unude, tsî tita ge ǁîna ǁkhawa nîra ūhā ǁnā ǃhūb, tita ge ǁîn îga māb ǃnâ, tsîn ge ǁîba ǀumise nîra ūhâ.

⁴Tsî nēdi ge ǁnā mîdi, ǃKhūb ge Israeli tsî Judab tsîkha xa ǃhoade:

⁵Nētib ra ǃKhūba mî xui-ao: Dommi ǃhuriǃhuris diba ta ge ge ǁnâu; ǃhurib ǀguib ge hâ, tsî ǂkhî-i xare-i ge a ǀkhai.

⁶Dî du re, î du mû, iseb ra aorekhoeba ǁora ǃkhaisa? Tarexasa kha ǁnâi mâ khoeb hoab di ǃomkha kamanab âb ai hâsa ǁora ra taras axase tsî aidi hoadi ra ǀnoro ǃkhaisa?

⁷Tita-e ǁnā tsēs a kai xui-ao, tsî ǁîs khami ī tsēs ge a ǀkhai. ǁAeb ǂōǂōsib dib aseb ge Jakoba nîra ība, xaweb ge ǁîba xu nîra orehe.

⁸ǁNātsē i ge nîra ī xui-ao, tib ra ǃKhūb ǂnubidi diba mî, ǁîb ǃnaoba ta sa ǃaoba xu khôa, tsî sa ǃgae-ūdana nîra ǂgaeǃgao ǃkhaisa; ǃhao khoen ge ǃaruǀî ǁîb xa ǃoabakaisen tide.

⁹Tsîn ge ǃKhūb, ǁîn Elob, tsî ǁîn gao-aob Davib, tita ǁîna ta nî ǂkhaiǂkhaibab tsîkha nîra ǃoaba.

¹⁰Î satsa ǁnâi tā ǃao, ti ǃgā Jakotse, tib ra ǃKhūba mî, îts tā ǃhuri, Israeltse, îts mû, tita ge satsa ǃnūseba xu nîra ore, tsî sa suriba ǁîn ǃkhōsis di ǃhūba xu. Ob ge Jakoba oa tsî nîra ǃnō tsî sâsase hâ tsî khoe-i ǁîba nî ǃhuriǃhuri-i xare-i ge nîra ǀkhai.

¹¹Tita ge sa ǀkha hâ xui-ao, tib ra ǃKhūba mî, ore tsi ta nîga, tita ge ǁnā ǁaedi, ǁîdiǀî ta ge ǀgaruǀgaru tsidi hoade nîra dīǀamǀam, xawe satsa ta ge tita dītoa tide; tsî ta ge satsa ǀgaus ai nîra ǁkhara tsî hoaragase ǀhapio khoese ūhâ tsi tide.

¹²Nētib ra ǃKhūba mî xui-ao: Sa ǀaeb ge a ǁōǁōsa, sa ǀhapis ge a tsûtsûsa.

¹³Khoe-i xare-i ǃgâiba nî dība tsi i ge a ǀkhai, ǂgauǂgauǁgui-aixūn xarenats ge ūhâ tama hâ, ǀhapidi âts ǃaroma.

¹⁴Sa ǀnamsaben hoan ge ge ǀuru tsi; ǁîn ge satsa dî tama hâ. Tita ge satsa ge ǂnau khākhoeb di ǁō-ai-i ǀkha, tsî tsûtsûsa ǁkhara-ai-i ǀkha, kaisib sa ǂhanuoǃnâsib dib ǃaroma, sa ǁoren kaise a ǂgui amaga.

¹⁵Tarexats ra ǃau, sa ǁō-aib ǃaroma, sa tsûb a ǁōǁōsa ǃkhais ǂama? Kaisib sa ǂhanuoǃnâsib dib ǂama, sa ǁoren kaise a ǂgui amaga ta ge nē xūna ge dī-ū tsi.

¹⁶ǁNā-amaga ǁnān satsa ra hapun hoan ge nîra hapuhe; tsî sa mâǃoasaben hoan ge ǃkhō-oms ǃnâ nîra ǂgâ, tsî satsa ra ǀâǀhanan ge nîra ǀâǀhanahe, tsî satsa ra ǁkhâuǁnân hoan, ge tita xa ǁkhâuǁnâxūse nîra māǁnâhe.

¹⁷Tita ge satsa ǂgausiba ǃnā kaiba, tsî sa tsûga xu nîra ǂuruǂuru tsi, tib ra ǃKhūba mî, ǂhāxūhe hâts tin ra ǂgai tsi amaga, Sions, khoe-i xare-i xa dîhe tamas, ge ǁîsa.

¹⁸Nētib ra ǃKhūba mî: Mû, tita ge ǃkhōsis Jakob tentommi disa nîra unu, tsî ta ge ǁîb ǁanǃkhaide nîra ǀkhomxa; os ge ǃāsa ǁîs ǂkhūǃkhaidi ai nîra ǂnubihe, ob ge gao-aosi omma ǁîb di ǂhunuma ǃkhais ai nîra mâ.

¹⁹Tsî ǁîna xus ge gangansa nîra ǂoa, tsî dommi ǀkhō ran diba. Tsî tita ge ǁîna nîra ǂguiǂgui, tsîn ge ǀoro tide; tsî tita ge ǁîna nîra ǂkhaiǂkhai, tsîn ge ǂkhari tide.

²⁰O gu ge ǁîb ôaga huga gu ge ī i xase nîra ī, tsî ǀhaohâb âb ge ti ais aiǃâ nîra ǀgaiǀgaihe, tsî tita ge ǁîb di ǁgâiǀā-aon hoana nîra ǁkhara.

²¹Tsî gao-aob âb ge ǁîba xu nîra hā; tsî gaosab âba ǁîn ǁaeguba xu. Tsî tita ge ǁîba nîra ǀgū kai, tsî ǁîb ge tita nîra ǀgū; tariba ǁnāb, ǁî-aitsama nî dītsâba, titab nî ǀgūsa? tib ra ǃKhūba mî.

²²Tsî sadu ge tita ǁaese nîra ība, tsî tita ge sado Elose nîra ība.

²³Mû, tūǀnanu-i ǃKhūb di-i, ǁgôasi-i ge ge ǂoa, hâhâ ra tūǀnanu-e; ǁî-i ge danas eloxoresan dis ai nîra ǁnā.

²⁴ǀGamsib ǃKhūb ǁaib dib ge ǀû tide, ǁîb nî dī tsî ǁîb nî ǂgaob âb di ǂâide dītoas kōse. ǀUnis tsēdi dis ai du ge ǁî ǃkhaisa nîra ǁnâuǃā.