Read Khoekhoegowab Jeremiab 31 Bible Online

Jeremiab 31 - Khoekhoegowab bible

Jeremiab 31

¹ǁNā ǁaeb ǁkhāb ai ta ge tita, tib ra ǃKhūba mî, ǃhaodi Israeli didi hoade Elose nîra ība, tsî ǁîn ge tita ǁaese nîra ība.

²Nētib ra ǃKhūba mî: ǁAes, gôab ǀkha ge ǃgamhe tama a-is, ge ǀkhomma ge hō ǃgaroǃhūb ǃnâ; Israelǁaes, nî sâba hōse.

³ǃKhūb ge tita tawa ǃnūseba xu ge ǂhaiǂhaisen. Ā, tita ge ǀamo ǀnammi ǀkha satsa ge ǀnam hâ i amaga ta ge tita satsa ǀkhomxasib ǀkha ge ǂgae.

⁴Tita ge satsa ǁkhawa nîra ǂnubi, tsîs ge nîra ǂnubihe, sas ǂkhamkhoes Israeli dise. Sas ge ǁkhawa nîra anihe sa ǃkhomǃkharurudi ǀkha tsîs ge nîra ǂoa dâxase ra ǀkhōn ǀkha.

⁵Sas ǁkhawa ǂauxûiǂûǃhanaga nîra ǂgā Samarias di ǃhomgu ai; ǂgā-aon ge ǂgā tsî ǂûna nîra ǂû.

⁶Tsē-i ge nîra hā xui-ao, ǁî-i ai gu ge ǃûi-aoga Efraimmi di ǃhomgu ai nîra ǂgai: Khâi î du Sions ǃoa ǃapa, ǃKhūb sida Elob ǁga.

⁷Nētib ra ǃKhūba mî xui-ao: ǃGarise ǂgai Jakob ǂama ǃgâiaǂgaob ǀkha; î du dâ danab ǁaedi dib ǂama. ǁÎ ǃkhaisa ǁnâu kai, ǃkhōǀkhā î du mî: ǃKhūtse sâu re sa ǁaesa, Israeli di ǃgaurosa.

⁸Mû, tita ge ǁîna nîra ūhā ǀapas di ǃhūba xu, tsî ǁîna nîra ǀhaoǀhao ǃhūbaib di ǀkhâuǀamsa xu. ǁÎn ǁaegun ge ǂgī hân tsî ǃhom hân tsî ǀgamǀkhā hâdi tsî ǁora ra di tsîna nîra hâ; kai ǀhaohâsen ge nēxopa ǁkhawa nîra oaǀkhī.

⁹ǁÎn ge ās ǀkha nîra hā, tsî ǀkhomabasendi ǀkha ta ge tita ǁîna nîra ǂguiǂgui; tita ge ǁîna ǁgamxa ǃārogu ǃoa nîra ǂgaeǂguisī, ǂhau daob, ǁîb ain ǃnôa tideb ai. Tita ge Israela ǁgûse ība, tsî Efraimmi ge a ti ǂguroǃnaesabe.

¹⁰ǁNâu du re ǃKhūb di mîsa, sadu ǁaedo; î du aoǁnâ ǃnū ǃhūgu hurib ǀgūse ǁgoegu ǃnâ; î du mî: ǁNāb, Israela ge ǀgaruǀgarub ge ǁîba ǁkhawa nîra ǀhaoǀhao, tsî ǁîba ǃûi-aob gūn dib axase nîra sâu.

¹¹ǃKhūb ge Jakoba ge ǁamaǃnoraǃnora, tsî ǁîb ge ǁîba ge ore ǁnāb ǁîb xa a ǀgaisab di ǃomǁaeba xu.

¹²On ge hā tsî nîra dâ Sions ǂaob ai; tsîn ge nîra ǃkhoehā ǃKhūb di xūn ǁga, ǃhorob ǁga tsî ǂkhon ǂauxûib ǁga tsî olib ǁga tsî ǂkham gūn tsî goman tsîn ǁga. Tsî ǁîn di ǀoms ge ǂnâhe hâ ǃhanab ase nîra ī, tsîn ge ǃaruǀî ǃoa tide.

¹³ǃNubais ge ǂkhamkhoesa nîra ǃgâiaǂgao ǂnās ǃnâ, tsî ǂkhamkhoegu tsî kairagu tsîn hoana. Tita ge ǃoab âna ǃgâiaǂgaob ǃnâ nîra ǀkharaǀkhara; tsî ǁîna nîra ǁkhaeǂgao tsî ǁîna nîra ǃgâiaǂgao kai ǃoab ân khaoǃgâ.

¹⁴Tsî tita ge ǀoms pristergu disa kaub ǀkha nîra khoakhoa, tsî ti ǁaes ge ti ǃgâib xa nîra ǁâ, tib ra ǃKhūba mî.

¹⁵Nētib ra ǃKhūba mî: Dommi ge Ramas ǃnâ ge ǁnâuhe, āb tsî au ǃgaeb tsîna. Raxels ge ǀgôan âsa ra āba, tsîs ǁkhaeǂgaokaisensa ra ǂkhā, ǀgôan âs ǂama, ǁîn a ǀkhai amaga.

¹⁶Nētib ra ǃKhūba mî: Tā ǃgarise ā î ǁgamrona ǁkhaesen, amǃnâ-i sa sîsenna hâba xuige, tib ra ǃKhūba mî. ǁÎn nî khākhoeb di ǃhūba xu ǁkhawa hā xuige.

¹⁷Tsî i ge ǃâubasen-e surib âdo hâba, tib ra ǃKhūba mî. Sadu ôan ge ǁîn ǀkharib ǃoa ǁkhawa nîra hā xui-ao.

¹⁸Tita ge ge ǁnâu, Efraimmi ra ǃgae ǃkhaisa; sats ge tita ge ǁkhara, tsî tita ge ǁkhāǁkhāhe tama tsâu-i axase ge ǁkharakaisen. ǃHobasen kai te re, o ta ge nî ǃhobasen, sats ge a ǃKhū, ti Elo, xui-ao.

¹⁹Amase, ǃhobasen ta hâsa xu ta ge ra ǃhausen; tsî ǁî-aitsama ta a ǂansen sa xu ta ge ǂnamib ai ra ǂnau. Tita ge tao hâ, ā taob xa ta ge dāhe hâ, ti ǂkhamsis di ǃharaxūba ta ge tani xui-ao.

²⁰Efraimma kha ǀgapiǃgôasa ǀgôase ība te tamab hâ, ǀnamǀnamsa ǀgôase kha ība te tamab hâ? Tita ge ǁîba ge ǃhoaǃoa, xawe ta ge ganupe ǁîb xa ra ǂâi. ǁNā-amagab ra ti ǃnāba ǁîb ǂama ā; o ta ge tita ǂanǂansase ǁîba nîra ǀkhom, tib ra ǃKhūba mî.

²¹Saoǃkhai-e dībasen; daob saode mâibasen, îts daob âtsa ǃgaoǃgâ, ǁnā daob ǁîba-ūts ge ǃgûba, oa, sas ǂkhamkhoes Israeli dise, ǁkhawa oa nē ǃādi âs ǃoa.

²²Matikōses kha sas ǁnāǁgôasa ǀgôasa nî îganǀgē? ǃKhūb ǀasa xū-e ǃhūbaib ai go kuru xui-ao, taras nî aoba sâu ti.

²³Nētib ra ǃKhūb ǂnubidi dib, Israeli Eloba mî: Nē mîsan ge ganupe Judab ǃhūb ǃnâ nîra mî tsî ǁîb ǃādi ǃnâ, ǁîn di ǃkhōsisa ta ga unu ǃnubai: Ab ǃKhūba ǀkhae tsi, sats ǂhanu-aisib di ǁanǃkhaits, ǃanusib di ǃhomtse.

²⁴Tsîn ge Judab tsî ǁîb ǃādi tsîna ǀhûpe ǁîb ǃnâ nîra ǁan, ǃhanasîsenaogu tsî gūdi ǀkha ra doemagu tsîna.

²⁵Tita ge ǀhupu hâ ǀomsa ge ākhanu kai xui-ao, tsî tita ge ǃoa hâ ǀoms hoasa ǀoaǀoa xui-ao.

²⁶Nēs khaoǃgâ ta ge ǃnoaǂkhai tsî ge kō, tsî ti ǂoms ge ǂkhonba te ge i.

²⁷Mû, tsēdi ge nîra hā, tib ra ǃKhūba mî, o ta ge tita Israeli ommi tsî Judab ommi tsîna nî tsoro-ai ǃkhommi khoen dib tsî ǃkhommi ǀgoan dib ǀkha.

²⁸Tsî i ge nîra ī, ǂkhaikari ta ge ǁîn ǂama hâ i xase, tsuruǂui ta nîse tsî khôaǁnâ ta nîse tsî hîkākā ta nîse tsî hîǀhuru ta nîse tsî ǂkhôadī ta nîse. ǁNās ǁkhās xase ta ge tita ǁîn ǂama ǂkhaikari nî hâ, ǂnubi tsî ta nî ǂgāse, tib ra ǃKhūba mî.

²⁹ǁNā tsēdi ǃnân ge ǃaruǀî mî tide: ǁGûgu ge ora ǂauxûiǂûhais ǂûna ge ǂû on ge ǁgûn ǀgôan dina ge ǀkhuruǁgû kai.

³⁰Xawe mâ-i hoa-i ge ǁî-i di ǂhanuoǃnâsib ǂhanib ǃaroma nîra ǁō; mâ khoe-i ora ǂauxûiǂûhais ǂûna ga ǂû-i hoa-i ge nîra ǀkhuruǁgû.

³¹Mû, tsēdi ge nîra hā, o ta ge tita Israeli ommi tsî Judab ommi ǀkha ǀasa ǃgaeǀhao-e nîra dī.

³²ǁNā ǃgaeǀhaos, ǁîn îgu ǀkha ta ge dīs ǃoa tama ǁîn di ǃomma ta ge ǃkhō ǃnubai, Egipteǃhūba xu ta nî ǁîba ǂgaeǂguiǂuise, ǁnā ǃgaeǀhaos hîan ge, ǁîna ta ge ge ǃgame, xawe ǁauǁausa, tib ra ǃKhūba mî.

³³Xawe nēs ge ǁnā ǃgaeǀhaos, tita ǁnā tsēdi khaoǃgâ Israeli ommi ǀkha nîra dīsa, tib ra ǃKhūba mî. Tita ge ti ǂhanuba ǁîn di ǃnā khoesib ǃnâ nîra mā, tsî ta ge ǁîba ǁîn ǂgaob ǃnâ nîra xoa. Tsî tita ge ǁîna Elose nîra ība, tsî ǁîn ge tita ǁaesa nîra ība.

³⁴Tsîn ge ǃaruǀî, mâ-i hoa-e ǁî-i di ǀgūkhoe-e tsî mâ-i hoa-e ǁî-i di ǃgâsa-e ǁkhāǁkhā tsî ǃKhūba ǂan ti mî tide, hoan tita nîra ǂan xui-ao, ǂkham-i âna xu kai-i ân kōse, tib ra ǃKhūba mî. Tita ǁîn di ǂhanuoǃnâsiba nîra ǀûba, tsî ǁoren ân xa ǃaruǀî ǂâi tide xui-ao.

³⁵Nētib ra ǃKhūba mî; ǁnāb soresa ǃnâse tsēsa ra māb, ǁkhâb tsî ǀgamirodi tsîna tsuxub di ǃnâse, ǁnāb huriba ra gongonna, ǃgabigu âb ra ǀōs kōse. ǃKhūb ǂnubidi dib, tib ge ǁîba ǀon hâ.

³⁶Nē ǂnûiǂgādi ga ti ais aiǃâba xu ǂgō-o, tib ra ǃKhūba mî, ob ge ǁkhāti ǃkhommi Israeli diba nîra ǀû, ǃaruǀîn ti ais aiǃâ ǁaese ī tidese tsēdi hoadi kōse.

³⁷Nētib ra ǃKhūba mî: ǀHomgu ga ǀgapise ǀnōhe ǁkhāo tsî ǃgaoǃgaodi ǃhūbaib didi ga ôaǃnâǃganuhe ǁkhāo, o ta ge ǁkhāti tita Israeli di ǃkhommi hoaba nîra aoxū, ǁîn ge dīn hoan ǃaroma.

³⁸Mû, tsēdi ge ǃgoaxa, tib ra ǃKhūba mî, os ge nē ǃāsa ǃKhūba ǁkhawa nîra ǂnubikhâibahe, ǂgō-ommi Hananela xu ǁHôaǁāb kōse.

³⁹Tsî ǀnō-ūtsurib ge ǃaruǀî nîra ǂoa Garebǃnoms kōse tsîb ge Goas ǃoa nîra dawa.

⁴⁰Tsî ǃgoaǃnāb ǁō hâ sorodi tsî tsaob dib tsî ǃaugu hoagu ǃārob Kidronni Hānǁāb di ǁhôas kōse aiǂoasǀî, ǁîn ge ǃKhūba ǃanuse nîra ība; xū-i xare-i ge ǁkhawa ǃhomǂuihe tsî khôaǁnâhe tide ǀamosib kōse.