Read Khoekhoegowab Jeremiab 32 Bible Online

Jeremiab 32 - Khoekhoegowab bible

Jeremiab 32

¹Mîs Jeremiaba ǃKhūba xu ge hābas, disiǁî kurib Sedekiab, Judab gao-aob, dib ǃnâ; nē kurib ge disiǁkhaisaǀaǁî kurib Nebukadnesari di ge iba.

²Tsî ǂnubis Babilons gao-aob dis ge Jerusalemsa ge xāǂgā, tsî kēbo-aob Jeremiab ge ai-ommi Judab gao-aob ommi dib ǃnâ ge ǂganamhe hâ i.

³Sedekiab, Judab gao-aob, ge ǁîba ǂganam tsî mî xui-ao: Nētib ra ǃKhūba mî: Tarexats ra nēti kēbo. Mû, tita ge nē ǃāsa Babilons gao-aob ǃomǁae ra mā tsî ǁîb ge ǁîsa nîra ū.

⁴Tsî Sedekiab, Judab di gao-aob ge Xaldeaǁîn ǃomǁaeba xu ûi tide tsîb ge ǂanǂansase Babilons gao-aob ǃomǁae nîra māhe, tsîb amsa xu ams ǁga ǁîba nîra ǃhoa-ū tsî aisa xu ais ǁga ǁîba nîra mû.

⁵Tsî ǁîb ge Sedekiaba Babilons ǃoa nîra ǂgaeǂgui, tsî ǁnāpab ge ǁîba nîra hâ, tita ǁîba nîra ôaǃnâs kōse, tib ra ǃKhūba mî; sadu ga Xaldeaǁîna ǃkhamū xawe du ge amǁnā tide.

⁶Ob ge Jeremiaba ge mî: ǃKhūb di mîs ge tita hāba tsî ge mî:

⁷Mû, Hanameeli, Salummi ôab, sa ǁnaob ge sa ǃoa hā tsî nîra mî: ǁAmabasen re ti ǃhanab, Anatots tawa hâba, sats ores di ǂhanuba ūhâ xuige, ǁamats nîse.

⁸Nētib ge Hanameeli ti ǁnaob ôaba ǃKhūb di mîs ai ti tawa sâuǃkhais di ai-ommi ǃnâ hā tsî tita ǁga ge mî: Ti ǃhanab, Anatots Benjaminni di ǃhūb ǃnâ ǁgoes tawa hâba, ǁamabasen, sats ge ǀumiǂhanuba ūhâ tsî oresa a anu xuige. ǃNubai ta ge ge hōǃâ, ǃKhūb di mîs a ǁî ǃkhaisa.

⁹ǁNā-amaga ta ge Hanameeli, ti ǁnaob ôaba xu ǁnā ǃhanab, Anatots tawa hâba ge ǁama, tsî ta ge ǁîba mariba ge ǀnōba, disihûǀa ǀhaiǀurisekeln kōse.

¹⁰Tsî ta ge ǁî xūna ǂkhanis ǃnâ xoa tsî ǁîsa ge ǂganamǀgaiǀgai, tsî ta ge ǀhûǀguitimî-aoga ge ǀhûǀguitimî kai, mariba ta ge ǀnō-ūxūs ai ǀnō ǃnubai.

¹¹Tsî ta ge ǁamaǂkhanis, hîa ǂganamǀgaiǀgaihe hâsa ge ū mîmās tsî ǂnûiǂgādi tsîn ǃoa tsî ǁkhowa-amsa ǂkhanis ona.

¹²Tsî ta ge ǁamaǂkhanisa Baruxi, Nerijab ôab, Maxsejab ôaba, ge mā, Hanameeli ti ǁnaob ôab, tsî ǁnā ǀhûǀguitimî-aogu, ǁamaǂkhanisa ge xoaǃgaogu tsîgu di mûdi aiǃâ tsî ǁnā Jodeǁîgu, sâus di ai-ommi ǃnâ ge ǂnôa igu hoagu di mûdi aiǃâ.

¹³Tsî ta ge Baruxa ǁîgu di mûdi aiǃâ mîmā tsî ge mî:

¹⁴Nētib ra ǃKhūb ǂnubidi dib, Israeli Eloba, mî: Ū nē ǂkhanide, ǁamaǂkhanis tsî ǂganamǀgaiǀgaihe hâ ǂkhanis tsî ǁkhowa-amsa ǂkhanis tsîde, îts ǁîde ǂgoasū-i ǃnâ ǂgā, î di ǂomxa ǁaeb kōse hâ.

¹⁵Nētib ra ǃKhūb ǂnubidi dib Israeli Eloba mî: Omdi kas ǃhanagu kas ǂauxûiǂûǃhanagu kas hoas ge nē ǃhūb ǃnâ ǁkhawa nî ǁamahe.

¹⁶ǁNās khaoǃgâ, ǁamaǂkhanisa ta ge Baruxi Nerijab ôaba mā ǃnubai ta ge ǃKhūba ǀgore tsî ge mî:

¹⁷O, ǃKhūtse, ǃKhūtse, mû sats ge ǀhommi tsî ǃhūbaib tsîkha ge dī sa kai ǀgaib ǀkha tsî sa ǀhōǂuihesa ǁôab ǀkha. ǀGui xū-i xare-i ge buruxaba tsi tama hâ.

¹⁸Sats ǀoadisina ǀkhomxaǂgaosiba ra dī-ūts, tsî ǂhanuoǃnâsiba ǁîn khaoǃgâ ǀgôab ân di tîǂams ǃnâ ra mādawa-amtse: Sats kai tsî ǀgaisa Elots, ǂnubidi di ǃKhū, ti ra ǂgaihetse,

¹⁹ǀapes xa a kai tsî dīs xa a ǀgaisatse; sa mûra ge khoen ôan di daogu hoagu ǂama a khowasa, mâ-i hoa-ets nî daogu â-i ǃoa māse, tsî ǂûtanib ǁî-i dīgu dib ǃoa.

²⁰Sats saodi tsî buruxa dīn tsîna Egipteǃhūb ǃnâ ge ǂnûitse nētsēs kōse, Israeli ǃnâs kas, nau khoen ôan ǃnâs kas hoasa, tsî sats ǀonsa ge dībasentse, nētsēs kōses ī khami.

²¹Tsî sats sa ǁaes Israelsa saodi ǀkha tsî buruxa dīn ǀkha tsî ǀgaisa ǃommi ǀkha tsî ǀhōǂuihesa ǁôab ǀkha tsî kai ǃhurib ǀkha Egipteǃhūba xu ge ǂgaeǂguiǂuitse.

²²Tsî sats nē ǃhūb, sats ǁîn îga māts nîse ge nūbaba, daib tsî danib tsîkha ra dâuǃnâba ge mātse.

²³ǁÎn ge ǁkhāti ǁîb ǃnâ ge sī tsî ǀumise ǁîba ge ū, xawen ge dommi âtsa ǁnâuǀnam tama tsî ǂhanub âts ǃnâ ǃgû tama ge i, tsîn ge sats ge ǁîna, în dī, ti mîmān xa xū-i xare-e dī tama ge i; ǁnā-amagats ge satsa ǁîna nē ǂkhabab hoaba ge hāǂam kai.

²⁴Mû, ǁkhuigu ge ǃās kōse ge sī, ǁîs nî ūhese tsî ǃās ge Xaldeaǁîn, ǁîsa ra ǃkhamūn ǃomǁae ge māhe gôab ǃaroma tsî ǃâtsūǀkhāb ǃaroma tsî ǂhīǁōb ǃaroma, tsî sats ge mîn ge ge ī, tsî kō sats ra ǁîna mû.

²⁵Xawets ge satsa tita ǃoa ge mî, ǃKhūtse, ǃKhūtse, ǁamabasen ǁnā ǃhanaba marib ama, îts ǁî ǃkhaisa ǀhûǀguitimî-aoga ǀhûǀguitimî kai, ǃās Xaldeaǁîn ǃomǁae hâ xawe.

²⁶ǃNubais ge mîs ǃKhūb disa Jeremiaba hāba tsî ge mî:

²⁷Mû, tita ge ǃKhūta, ǁgans hoas di Elota, xū-i xa buruxabahe ta nî?

²⁸ǁNā-amagab ra ǃKhūba nēti mî: Mû tita ge nē ǃāsa Xaldeaǁîn ǃomǁae nî mā tsî Nebukadnesari, Babilons gao-aob ǃomǁae, tsîb ge ǁîsa nîra ū.

²⁹Tsî Xaldeaǁîn nē ǃāsa ra ǃkhamūn ge ǁîs ǃnâ ǂgâ tsî nē ǃāsa ǀaes ǀkha ǂhubi tsî ǁîsa nîra khauǃkhū, ǁnā omdi, ǂamaidi âdi ain ge Baala ǀanǀanba tsî ǀkhara eloga ǂnâǁguibade gere ǁguibadi tsîn ǀkha, titan nî ǁaiǁaise.

³⁰Israeli ôan tsî Judab ôan tsîn ǂkhamsis âna xu ti mûǁae a ǂkhaban ǀguina gere dī xui-ao; Israeli ôan ge tita ǁîn ǃomgu di sîsenni ǀguib ǀkha gere ǁaiǁai, tib ra ǃKhūba mî.

³¹Ti ǁaese tsî ti ǁgôasises ge nē ǃāsa tita ge ība, ǁîsan ge ǂnubi tsēsa xu nētsēs kōse, ǁîsa ta nî ti aisa xu dībēse.

³²ǁNā ǂkhabasib Israeli ôan tsî Judab ôan dib, hîan gere dīb hoab ǃaroma, titan nî ǁaiǁaise, ǁîn tsî ǁîn gao-aogu tsî ǁîn i gaosagu tsî ǁîn pristergu tsî ǁîn kēbo-aogu tsî aogu Judab digu tsî ǁansaben Jerusalems din tsîna.

³³ǁNān tita ge ǃnorosa mān aisa tama i tsî, tita gere ǁîna ǁkhāǁkhā xawe, ǃnauǁgoaga khâi tsî, xawen ge ǁnâu tama ge i, ǂgōǀausan nî ǃkhōǃoase.

³⁴Tsîn ge ǁgaiǁgaisan âna, ǁnā ommi, ti ǀons ǃoa ǂgaihe hâb ǃnâ ge mâi, ǁîban nî ǀuriǀurise.

³⁵Tsîn ge ǀgapigu Baali digu, Hinommi ôab di ǃgoaǃnāb ǃnâ hâga ge ǂnubi, ǁîn ôagu tsî ǁîn ôadi tsînan nî Moloxa ǀaesa ǃgûǃganu kaibase, tita ǁîna mîmā tama ǃkhais tsî ti ǂgaob ǃnâ hâ tamas, nē ǁgaidīban nî dīse, Judaban nî ǁoreba dī kai ga.

³⁶Tsî nēsi, ǁnāxab ra ǃKhūb Israeli i Eloba nēti mî ǁnā ǃās, ǁîsats ra mîs xa: ǁÎs ge Babilons gao-aob ǃomǁae ge māhe gôaba xu tsî ǃâtsūǀkhāba xu tsî ǂhīǁōba xu:

³⁷Mû, tita ge ǁîna nîra ǀhaoǀhao ǁnā ǃhūgu, ǁîgu ǃoa ta ge ti ǁaib ǃnâ tsî ti ǁgôasib ǃnâ tsî kai ǁgôasib ǃnâ ǁîna doeǁgasīga xu; tsî tita ge ǁîna ǁkhawa nē ǃās ǃoa ūhā tsî sâusase nîra ǁan kai.

³⁸Ā, ǁîn ge tita ǁaese nîra ība, tsî tita ge ǁîna Elose nîra ība.

³⁹Tita ge ǁîna ǀgui ǂgaob tsî ǀgui daoba nîra mā, titan nî ǃaoga, tsēdi hoadi kōse, ǁîn tsî ǁîn ôan tsîn di ǃgâiba ǃoa.

⁴⁰Tsî ta ge ǁîn ǀkha ǀamo ǃgaeǀhao-e nîra dī, ǁîn khaoǃgâba xu ta ǃaruǀî oa tide ti, ǁîna ta nî ǃgâidīse, tsî tita ge ti ǃaoǃgâba ǁîn ǂgaob ǃnâ nîra mā, tita xun ǁnāǁgôa tidega.

⁴¹Tsî tita ge ǁîn ǂama nîra ǃgâiaǂgao, ǁîna ta nî ǃgâidīga, tsî tita ge ǁîna ǂgomǂgomsase nîra ǂgā nē ǃhūb ǃnâ ti ǂgaob hoab ǀkha tsî ti ǀoms hoas ǀkha.

⁴²Nētib ra ǃKhūba mî xui-ao: Tita ge nē ǁaes ǂama nē kai ǂkhabasib hoaba a ūhās ǁkhās xase ta ge tita ǁîn ǂama ǁnā ǃgâib, tita ǁîn ǂama ra ǃhoaba nîra ūhā.

⁴³Tsî gu ge ǃhanaga nîra ǁamahe, ǁnā ǃhūb ǁîb xats ra: ǁÎb a ǃū-aisa, khoe-i xare-i tsî ǀgoa-i xare-i ǁîb ǃnâ a ǀkhais kōse ti mîb ǃnâ; ǁîb ge Xaldeaǁîn ǃomǁae ge māǁnâhe.

⁴⁴ǃHanagu ge marib ama nîra ǁamahe, tsî ǂkhanidi ge nîra xoahe tsî nîra ǂganamǀgaiǀgaihe tsî ǀhûǀguitimî-aogu xa nîra ǃkhō-amhe Benjaminni ǃhūb ǃnâ tsî Jerusalems ǂnamipe hâ ǃādi ǃnâ tsî Judab di ǃādi ǃnâ tsî ǃhommi di ǃādi ǃnâ tsî ǂgās di ǃādi ǃnâ tsî ǃkhawagas ǃādi ǃnâ, tita ǃkhōsis âna nîra unu xui-ao, tib ra ǃKhūba mî.