Read Khoekhoegowab Jeremiab 33 Bible Online

Jeremiab 33 - Khoekhoegowab bible

Jeremiab 33

¹ǃAruǀîs ge ǃKhūb di mîsa ǀgamǁî ǃnās ai Jeremiaba ge hāba, ai-ommi sâus dib ǃnâb ǂganamhe hâ hîa, mî rase:

²Nētib ra ǃKhūb ǁîsa ra dība mî, ǃKhūb ǁîsa ra ǁāǁāba, ǁîsab nî ǁapoǁapoga, ǃKhūb tib ge ǁîba ǀon hâ:

³Tita ǂgaiǀî re, o ta ge tita satsa nîra ǃeream, o ta ge tita kai tsî ǁaposa xūn, ǀūts ana nîra ǂanǂan tsi.

⁴Nētib ra ǃKhūb Israeli di Eloba mî, omdi nē ǃās didi xa tsî omgu Judab gao-aob digu ǁkhuigu ǀkha tsî gôab ǀkha khôaǁnâhe hâgu xa;

⁵ǁîn ge ge ǂgâxa, Xaldeaǁînan nî ǃkhamūse tsî ǁîn omden nî ǁō hâ sorodi khoen didi ǀkha ǀoaǀoaga, tita ge ti ǁaib ǃnâ tsî ti ǁgôasib ǃnâ a ǃgamde, tsî ti aisa ta ge nē ǃāsa xu gaugau amaga, ǁîn di ǂkhabasib hoab ǃaroma.

⁶Mû, tita ge ǁîs di ǂgausib tsî ǂurusib tsîkha ra ǀkhī kai, tsî ta ge ǁîna nîra ǂgauǂgau, tsî ta ge ǁîna ǀoasa ǂkhîb tsî amab tsîkha ra ǂhaiǂhaiba.

⁷Tita ge ǃkhōsis Judab dis tsî ǃkhōsis Israeli disa nîra unu, tsî ta ge ǁîna nîra ǂnubi, ǂguros ǁkhās khami.

⁸Tsî ta ge ǁîna nîra ǃanuǃanu ǁîn di ǂhanuoǃnâsib, ti ǃoagun ge ǁoreb hoaba xu, tsî tita ge ǁîn di ǂhanuoǃnâsigu, ti ǃoagun ge ǁoregu, tsî ti ǃoagun ge ǃûǂamgu hoaga nîra ǀûba.

⁹Tsîs ge ǃāsa dâ ǀonse nîra ība te tsî ǃkhōǀkhāse tsî anixūse ǁaedi ǃhūbaib didi, ǁnā ǃgâin ǁîna ta nî dī-ūn hoan xa nî ǁnâudi hoadi tawa, on ge nîra ǃao tsî nîra ǀkhū ǁnā ǃgâib tsî ǁnā ǂkhîb, tita ǁîna ra ǂhomibab hoab ǂama.

¹⁰Nētib ra ǃKhūba mî: Nē ǃās ǁîs xa du ra: ǁÎs a ǃū-aisas, khoe-i xare-i tsî ǀgoa-i xare-i a ǀkhaiǃnâ ti mîs ǃnâ tsî Judab di ǃādi ǃnâ tsî Jerusalems di daogu, ǃū-aisase ǁgoegu ǃnâ, khoe-i xare-i tsî ǁansabe-i xare-i tsî ǀgoa-i xare-i ǁîgu ai ǀkhais ǃnâ, ǁnāpan ge ǁkhawa nîra ǁnâuhe.

¹¹Dommi dâb dib tsî dommi ǃgâiaǂgaob dib tsî dommi ǃgame-aob dib tsî dommi ǃgame-aos dib tsî dommi ǁnān: ǃKhōǀkhā re ǃKhūb ǂnubidi diba, ǁîb a ǃgâi, tsî ǀkhomxaǂgaosib âb ge ǀamos kōse hâ, ti ra mîn dib, ǁnān ganganǁguibade ǃKhūb ommi ǃoa ra ūhān diba; tita ǃkhōsis ǃhūb disa nîra unu xui-ao, ǂguros ǁkhās khami, tib ra ǃKhūba mî.

¹²Nētib ra ǃKhūb ǂnubidi diba mî: Nē ǃās ǃū-aisas ǃnâ, khoe-i xare-i tsî ǀgoa-i xare-i ǁîs ǃnâ a ǀkhais ǃnâ, tsî ǁîs di ǃādi hoadi ǃnâ di ge ǁkhawa ǁanǃkhaidi ǃûi-aogu, gūde ra ǂnaumâigu dide nîra hâ.

¹³ǃĀdi ǃhomgu didi ǃnâ tsî ǃādi ǂgās didi ǃnâ tsî ǃādi ǃkhawagas didi ǃnâ tsî ǃhūb Benjaminni dib didi ǃnâ tsî ǃādi Jerusalems ǂnamipe hâdi ǃnâ tsî ǃādi Judab didi ǃnâ di ge gūde ǁkhawa ǃgôa-aob di ǃommi ǃnaga nîra ī, tib ra ǃKhūba mî.

¹⁴Mû, tsēdi ge nîra hā, tib ra ǃKhūba mî, o ta ge tita ǁnā mîsa nîra ǂkhaiǂkhaikhâi, Israeli dommi ǃoa tsî Judab ommi ǂama ta ge ǃhoasa.

¹⁵ǁNā tsēdi ǃnâ tsî ǁnā ǁaeb ai ta ge tita Daviba ǂgonab ǂhanu-aisib diba nîra ǀkhī kaiba; tsî ǁîb ge ǂhanub tsî ǂhanu-aisib tsîkha nîra dī ǃhūbaib ai.

¹⁶ǁNā tsēdi ǃnâb ge Judaba nîra orehe, tsî Jerusalems ge sâusase nîra ǁan. Tsî nēb ge ǁnāb ǃKhūb sida ǂHanu-aisib ti nîra ǂgaiheba.

¹⁷Nētib ra ǃKhūba mî xui-ao: Davib ge khoeb Israeli ommi di trons ai nî ǂnûb xareba ǃgaoǁnâ-aihe tide.

¹⁸ǁKhāti gu ge Leviǁî pristerga ti ais aiǃâ tātsē ǃgaoǁnâ-aihe tide khoeb, khauǁguibasa nî ǁguibab tsî ǂûǁguibasa nî ǂhubib tsî ǂāǁguibasa tsēdi hoadi kōse nî ǁguibab xaweba.

¹⁹Tsîs ge ǃKhūb di mîsa Jeremiaba ge hāba, mî rase:

²⁰Nētib ra ǃKhūba mî: Sadu ga ti ǃgaeǀhaos tsēs dis tsî ti ǃgaeǀhaos tsuxub disa ǁauǁau ǁkhā io tsēs tsî tsuxub tsîra ǁaeb âra ai hâ tidega,

²¹ǁnās ǁkhās xases ge ti ǃgaeǀhaos, Davib ǀkha ta ūhâsa nî ǁauǁauhe ǁkhā, ǀgôab trons âb ai nî gaob xarebab ge ǃgaoǁnâ-aihe tide, ti; tsî Leviǁî pristergu ti ǃgāgu ǀkha.

²²ǂNubis ǀhommi dis a ǃgôahe ǁoa, tsî ǀgopab hurib dib a ǀguirohe ǁoa khami, ǁnās ǁkhās khami ta ge tita surib ti ǃgāb, Davib diba nîra ǂguiǂgui tsî Leviǁî pristergu tita ra ǃoabagu tsîna.

²³ǃAruǀîs ge ǃKhūb di mîsa Jeremiaba ge hāba, mî raǃâ:

²⁴Mû tamats kha hâ, tare-es ra nē ǁaesa ǃhoasa, mî raǃâ: ǁNā ǀgam ǃhaora, ǃKhūb ǁhûiǂuibasen hâra, ǁîrab ge ǁîba ǁnāxū hâ? Ā, ǁîn ra ti ǁaesa ǃharaxū, ǃaruǀîs ǁîn mûǁae ǁaese ī tamas kōse.

²⁵Nētib ra ǃKhūba mî: Ti ǃgaeǀhaos ga tsēs tsî tsuxub di tama io, tita ga ǂnûiǂgādi ǀhommi tsî ǃhūbaib tsîkha dide mîǁgui tama io;

²⁶o ta ge tita ǁkhāti surib Jakob dib tsî ti ǃgāb Davib diba nî aoxū, o ta ge ǁîb di surib xa ū tide, Abrahammi, Isaki tsî Jakob tsîgu di surib ǂama nî gaoba. Tita ǁîn di ǃkhōsisa unu, tsî ǁîna nîra ǀkhom xui-ao.