Read Khoekhoegowab Jeremiab 34 Bible Online

Jeremiab 34 - Khoekhoegowab bible

Jeremiab 34

¹Mîs ǃKhūba xu Jeremiaba ge hābas, Nebukadnesari Babilons gao-aob tsî ǁîb ǂnubis hoas tsî gaosidi ǃhūbaib didi ǁîb ǃommi ǃnaga hâdi hoadi tsî ǁaedi hoadi Jerusalems tsî ǁîs di ǃādi hoadi ǃoagu ge re ǃkhamde ǃoa, mî raǃâ:

²Nētib ra ǃKhūb Israeli Eloba mî: ǃGû îts Sedekiab, Judab gao-aob ǃoa ǃhoa, îts ǁîb ǃoa mî: Nētib ra ǃKhūba mî: Mû tita ge nē ǃāsa Babilons gao-aob ǃomǁae ra mā, tsî ǁîb ge ǁîsa ǀaes ǀkha nîra khauǃkhū.

³Tsî sats ge ǁîb ǃomǁaeba xu ûi tide, xawe ǂanǂansase ǃkhōhe, tsî ǁîb ǃomǁae nî māhe. Tsî sa mûra ge Babilons gao-aob di mûra nîra mû, tsî ǁîb ams ge sa ams ǃoa nîra ǃhoa, tsîts ge Babilons tawa nîra sī.

⁴Îts ǁnâi ǁnâu ǃKhūb di mîsa, sats Sedekiats, Judab gao-aotse. Nētib ra ǃKhūba sats xa mî: Sats ge gôaba xu ǁō tide;

⁵sats ge ǂkhîb ǃnâ nîra ǁō, tsî ǀanǀandi sa îgu aibekam gao-aogu, sa aiǃâ ge hâ igu didi ge ī i khami, ǁnās ǁkhās xasen ge sa ǂama nîra ǀanǀan tsî nîra ǃgaeǂam tsi tsî: Ti ǁkhāǁkhā-aotse ti nî mî, tita ge ǁî mîsa ǃhoa xui-ao, tib ra ǃKhūba mî.

⁶Ob ge kēbo-aob Jeremiaba nē mîdi hoade Sedekiab Judab di gao-aob ǃoa ge ǃhoa Jerusalems tawa;

⁷ǂnubis Babilons gao-aob dis ge Jerusalems ǃoagu ǃkham ǃnubai tsî ǃgau ge ǃādi Judab didi hoadi ǃoagu tsî Laxis ǃoagu tsî Asekas ǃoagu. ǁÎdi ge ǁaposa ǃāse Judab ǃādi ǃnâ ǃgau xui-ao.

⁸Mîs Jeremiaba ǃKhūba xu ge hābas, gao-aob Sedekiab ge ǁaes Jerusalems tawa hâs hoas ǀkha ǃgaeǀhao-e dī ǃnubai, ǃnorasasibab nî ǁîna ǂgaiǂuibase.

⁹Mâ-i hoa-i nî ǁî-i di ǃgāb tsî ǁî-i di ǃgās, hîa Hebreǁîb kas Hebreǁîs kas hoasa ǃnorasase ǃgû kaiga, khoe-i xare-i ge ǁîn xa ǃaruǀî Jodeǁîb, ǃgâsab âba ǃoaba kaisen tidega.

¹⁰O gu ge gaosagu hoagu tsî ǁaes, nē ǃgaeǀhaos ǃnâ ge ǂgâs hoasa ge ǁnâu, mâ-i hoa-i ge ǃgāb â-i kas, ǃgās â-i kas hoasa ǃnorasase nî ǃgû kai ǃkhaisa, ǃaruǀîn ǁîna ǃoabakaisen tide ǃkhaisa. On ge ǁnâuǀnam tsî ǁîna ge ǃgû kai.

¹¹Xawen ge ǁnās khaoǃgâ ǁkhawa ǃgāgu tsî ǃgādi tsîn, hîan ge ǃgû kaina ge oa kai, tsî ǁîna ge ǃgādī.

¹²ǁNā-amagas ge ǃKhūb mîsa Jeremiaba ge hāba ǃKhūba xu, mî raǃâ:

¹³Nētib ra ǃKhūb, Israeli Eloba, mî: Tita ge ǃgaeǀhao-e ge dī sadu îgu ǀkha, tita ge ǁîna Egipteǃhūb, khobosis omma xu a ǂgaeǂguiǂui tsēs ai, mî raǃâ:

¹⁴Hû kurigu di ǀunis ai du ge mâ-i hoa-e ǁî-i di ǃgāb, Hebreǁîb, sa tawa ǁamaxūsen hâba nî ǁnāxū, ǃnani kurigab ǃoaba tsi hâs khaoǃgâ, ots ge ǁîba ǃnorasase satsa xu nî ǃgû kai. Xawe sadu îgu ge tita ǃgâ tama tsî ǂgaes âga ǂō tama ge i.

¹⁵Tsî sadu ge nētsē oa tsî ti mûǁae a ǃgâina goro dī, ǃnorasasiba ra ǂgaiǂuiǃâ, mâ-i hoa-e ǁî-i di ǀgūkhoe-iǀî, tsî du ge ǃgaeǀhao-e ge dī ti ais aiǃâ, ǁnā ommi, ti ǀons ǃoa ǂgaihe hâb ǃnâ.

¹⁶Xawe sadu ge ǁkhawa oa tsî ti ǀonsa ge ǀuriǀuri; tsî du mâ-i hoa-e ǁî-i di ǃgāb tsî ǁî-i di ǃgās tsîra, ǃnorasase du ge ǃgû kaira, ǁkhawa ge hā kai, tsî du ge ǁîra ge dā, ǃgāse ra nî ība du ga.

¹⁷ǁNā-amagab ra ǃKhūba nēti mî: Sadu ge tita ǃgâ tama tsî ǃnorasasi-e ǂgaiǂuiba tama ge i, mâ-i hoa-e ǁî-i di ǃgâsaba tsî mâ-i hoa-e ǁî-i di ǀgūkhoeba. Mû, o ta ge tita, tib ra ǃKhūba mî, ǃnorasasi-e ra ǂgaiǂuiba, ǃnorasasi-i gôab di-e, ǂhīǁōb di-e, ǃâtsūǀkhāb di-e, tsî ta ge sado ǃhuriǃhurixūse ra dība gaosidi ǃhūbaib didi hoade.

¹⁸Tsî tita ge ǁnā aoga nîra māǁnâ, ti ǃgaeǀhaosa ge ǃûǂamga, ǃgaeǀhaos di mîde ǁapoǁapo tamaga, ǁnā ǃgaeǀhaos tsâub ǀkha gu ge ti ais aiǃâ dīsa, ǁîba ǀgam ǃâra ǃnâ ra ǃkhaiǃāse tsî ǃâra ǁaegu ra ǃkharuse.

¹⁹Gaosagu Judab digu tsî ǂamsagu Jerusalems digu, ǃnā-oms ǃoabasabegu tsî pristergu tsî ǃhūb di ǁaes, ǃâra tsâub dira ge ǃkharuǃnâs hoas tsîna,

²⁰ā, tita ge ǁîna khākhoen ân ǃomǁae nîra mā, tsî ǁnān ǀoms âna ra ôan ǃomǁae, o di ge ǁō hâ sorodi âna ǀhommi anin tsî ǃhūbaib di ǀguruna ǂûse nîra ība.

²¹Tsî Sedekiab Judab gao-aob tsî ǁîb gaosagu ona ta ge tita khākhoen ân ǃomǁae, tsî ǁnān ǀoms âna ra ôan ǃomǁae nîra māǁnâ, ǁnās ge ǂnubis Babilons gao-aob dis ǃomǁaesa sado xu ge ǃgûǃapasa.

²²Mû, tita ge nîra mîmā, tib ra ǃKhūba mî, tsî ta ge ǁîna ǁkhawa nē ǃās ǁga nîra ūhā, tsîn ge ǁîs ǃoagu nîra ǃkham tsî ǁîsa nîra ū tsî ǁîsa ǀaes ǀkha nîra khauǃkhū. Tsî ta ge ǃādi Judab dide ǃū-aisa ǃkhaise nîra ǂnûi, khoe-i xare-i ǁnāpa ǁan tides kōse.