Read Khoekhoegowab Jeremiab 35 Bible Online

Jeremiab 35 - Khoekhoegowab bible

Jeremiab 35

¹Mîs Jeremiaba ǃKhūba xu ge hābas, Jojakimmi Josiab ôab, Judab gao-aob di tsēdi ǃnâ, mî rase:

²Rexabǁîn ommi ǃoa ǃgû, îts ǁîn ǀkha ǃhoa, îts ǁîna ǃKhūb di ommi ǃnâ ūǂgā ǃnā-omdi di ǀguis ǃnâ, îts ǁîna ǂauxûiba āsi.

³ǃNubai ta ge Jaatsanjab, Jeremiab ôab, Habasinjab ôaba ge ū ǁîb ǃgâsagu ǀkha tsî ǁîb ôagu hoagu ǀkha, tsî Rexabǁîn ommi hoab ǀkha.

⁴Tsî ta ge ǁîna ǃKhūb di ommi ǃnâ ge ūǂgâ ǃnā-oms Hananni, Jigdaliab ôab, Elob aob ôagu dis ǃnâ, ǂamsagu di ǃnā-oms Maasejab, Salummi ôab, ǁāb ǃûi-aob di ǃnā-oms xa ǀgapise hâsa.

⁵Tsî ta ge ǀgôan Rexabǁîn ommi dina ǂauxûib xa ǀoa hâ xapadi tsî ǀgabidi tsîna ge mâi-aiǃâ, tsî ta ge ǁîn ǃoa: ǂAuxûiba ā, ti ge mî.

⁶Xawen ge ǁîna ge mî: Sida ge ǂauxûiba ā tide, Jonadab, Rexab ôab sida îb ge mîmā tsî: Sadu ge ǂauxûi-i xare-e ā tide, sadu tsî sadu ôan tsîdo ǀamosib kōse, ti ge mî.

⁷Tsî du ge ǁkhāti om-i xare-e ǂnubibasen tide tsî ǃkhom-i xare-e tsorobasen tide tsî ǂauxûiǂûǃhana-i xare-e ǂgābasen tsî ūhâbasen tide, tsî du ge tentomdi ǃnâ nî ǁan sadu di tsēdi hoadi kōse, î du ǂomxa tsēdi kōse ûi ǁnā ǃhūb, ǁîb ǃnâ du ǃhao khoese hâb ǃnâ.

⁸O da ge dommi Jonadab, Rexab ôab, sida îb diba ge ǁnâuǀnam, sidab ge mîmā xūn hoan ǃnâ, o da ge ǂauxûi-i xare-e ā tama hâ, sida di tsēdi hoadi kōse, sige tsî sige di taradi tsî sida di ôagu tsî sida di ôadi tsîda;

⁹o da ge om-i xare-e ǁanǃkhaise ombasen tama hâ, o da ge ǁkhāti ǂauxûi-i xare-i tsî ǃhana-i xare-i tsî ǃkhom-i xare-e ūhâ tama hâ.

¹⁰O da ge tentomdi ǃnâ ge ǁan, nētimî da ge ǃgâ tsî gere dī, sida îb Jonadab ge sida mîmān hoan ǃoa.

¹¹Tsî i ge ge ī, Nebukadnesari, Babilons gao-aob, ge nē ǃhūb ǃoa ǂoaxa ǃnubai da ge sida ge mî: Hā î da Jerusalems ǃoa ǃapa ǂnubis Xaldeaǁîn dis ǃaroma tsî ǂnubis Siriaǁîn dis ǃaroma; nētimî da ge Jerusalems tawa ge hâhâ.

¹²ǃNubais ge ǃKhūb di mîsa Jeremiaba ge hāba, mî raǃâ:

¹³Nētib ra ǃKhūb ǂnubidi dib, Israeli Eloba, mî: ǃGû îts Judab aogu tsî Jerusalems ǁansabena sī mîba: Sado kha ǂgōǀau-i xare-e du ǃkhōǃoa tide, ti mîde du nî ǁnâuse, tib ra ǃKhūba mî.

¹⁴Mîdi Jonadab, Rexab ôab didi, ǁîb ôanab ge mîmādi, ǂauxûi-i xare-en ā tide, ti mîden ge ge ǃkhōǀgaipe, ǁîn ge ǂauxûi-i xare-e ā tama ge i xui-ao nētsēs kōse, tsîn ge ǁgûb di mîmāsa ge ǁnâu. Tsî tita ge sadu ǃoa ge sî ǃnauǁgoaga khâi tsî ra ǃhoaǃâ, xawe sadu ge tita ǁnâu tama ge i.

¹⁵Tsî ta ge sadu ǃoa ge sî ti ǃgāgu, kēbo-aogu hoaga, ǃnauǁgoaga khâi tsî ra sîǃâ, mî rase: ǃHobasen du re, mâ-i hoa-i ǁî-i ǂkhaba daoba xu, î du sadu ǂkhaba dīga ǃgâiǃgâi, î du ǀkhara eloga tā saoǃgon, ǁîga du nî ǃoabase, o du ge ǁnā ǃhūb, tita ge sadu tsî sadu îga māb ǃnâ nîra hâhâ. Xawe sadu ge sadu ǂgaesa ǂō tsî tita ǁnâu tama ge i.

¹⁶Tsî ǀgôan Jonadab Rexab ôab din ge ǁnā mîmās ǁîn îb dis, ǁîb ge ǁîna mîmāsa ǁapoǁapo amaga, xawe nē ǁaes ge tita ǁnâu tama hâ,

¹⁷ǁnā-amagab ra ǃKhūb ǂnubidi dib, Israeli Eloba, nēti mî: Mû, tita ge Judab ǂama tsî Jerusalems ǁansaben hoan ǂama ǁnā ǂkhabab, tita ge ǁîna ǃhoa-ūb hoaba nîra ūhā, tita ge ǁîna ge ǃhoa-ū, xawe ǁîn ge ǁnâu tama hâ, tsî tita ge ǁîna ge ǂgai, xawen ge ǃeream tama i amaga.

¹⁸Tsî ommi Rexabǁîn dib ǃoab ge Jeremiaba ge mî: Nētib ra ǃKhūb ǂnubidi dib, Israeli Eloba mî: Sadu ge mîmās, sadu îb Jonadab disa ǁnâuǀnamxa ge i tsî ǁîb mîmādi hoade sâu tsî ǁîb ge sado mîmān hoana gere dī.

¹⁹ǁNā-amagab ra ǃKhūb ǂnubidi dib, Israeli Eloba nēti mî: Jonadab, Rexab ôab, ge aob ti ais aiǃâ nî mâb xareba ǃgaoǁnâ-aihe tide tsēdi hoadi kōse.