Read Khoekhoegowab Jeremiab 36 Bible Online

Jeremiab 36 - Khoekhoegowab bible

Jeremiab 36

¹Tsî i ge ǁkhāti hakaǁî kurib Jojakimmi, Josiab ôab, Judab gao-aob dib ǃnâ ge ī, mîs ge ǃKhūba xu Jeremiaba ge hāba ǃkhaisa, mî raǃâ:

²Xamiǂkhani-e ū îts ǁî-i ai xoaǁnâ mîdi tita ge Israeli ǂama tsî Judab ǂama tsî ǁaedi hoadi ǂama satsa ǃhoa-ūde, satsa ta ge ǃhoa-ū tsēsa xu Josiab di tsēde xu nētsēs kōse.

³ǀNîsin ge ǁnān Judab ommi dina ǂkhabab, ǁîna dī-ūsa ta ǂâibasen hâb hoaba nî ǁnâu, ǃhobasenn nîga mâ-i hoa-e ǁî-i di ǂkhaba daoba xu, tsî tita nî ǁîna ǂhanuoǃnâsib ân tsî ǁoren âna ǀûbase.

⁴ǃNubaib ge Jeremiaba Baruxi, Nerijab ôaba ge ǂgai, ob ge Baruxa Jeremiab di amsa xu ǁnā mîdi ǃKhūb didi, ǁîb ǃoab ge ǃhoadi hoade xamiǂkhani-i ǃnâ ge xoa.

⁵Ob ge Jeremiaba Baruxa mîmā tsî ge mî: Tita ge ǂhanihe hâ, tsî ta ǃKhūb di ommi ǃoa a sī ǁoa.

⁶ǁNâi ǃgû satsa, îts sī khomai ǁnā xamiǂkhanisa xu, ǃKhūb ai mîdi ti amsa xuts ge ǁnâu tsî xoade ǁaes di ǂgaedi ǃnâ ǃKhūb ommi ǃnâ ǂûtamahâs tsēs ai. Tsîts ge ǁîde ǁkhāti Judab din hoan ǁîn di ǃāde xu nî ǀkhīn hoan ǂgaedi ǃnâ nî khomai.

⁷ǀNîsis ge ǀkhomabasens âna ǃKhūb di ais aiǃâ nî sī, tsîn ge nî ǃhobasen, mâ-i hoa-e ǁî-i di ǂkhaba daoba xu: ǁAib tsî ǁgôasib tsîkha, ǃKhūb ge nē ǁaesǀî ǃhoaǂuikha a kai xui-ao.

⁸Tsî Baruxi, Nerijab ôab, ge kēbo-aob Jeremiab ge ǁîba mîban hoan ǃoa ge dī, ǁnā ǂkhanis ǃnâ ǃKhūb di mîde ra khomaiǃâ, ǃKhūb ommi ǃnâ.

⁹Tsî i ge ge ī koroǁî kurib Jojakimmi, Josiab ôab, Judab gao-aob dib ǃnâ, khoeseǁî ǁkhâb ǃnân ge ǂûtama hâsa ǃKhūb di ais aiǃâ ǂgaiǂui ǃkhaisa, Jerusalems tawa hâ ǁaes hoasa tsî ǁaes Judab ǃāde xu Jerusalems tawa ge hās hoasa.

¹⁰Nētib ge Baruxa ǁnā ǂkhanis ǃnâ mîdi Jeremiab dide ǃKhūb ommi ǃnâ ge khomai Gemarjab, Safanni ôab, xoa-aob di ǃnā-oms ǃnâ ǀgapise hâ ai-ommi ǃnâ dao-ams ǀAsa ǁĀb ǃKhūb ommi dis tawa ǁaes hoas ǂgaedi ǃnâ.

¹¹Tsî Mikaiab, Gemariab ôab, Safanni ôab, ge mîdi ǃKhūb didi hoade ǁnā ǂkhanisa xu ǁnâuo;

¹²ob ge ge ǁgôa gao-aob ommi ǁga xoa-aob di ǃnā-oms ǃnâ, tsî mû, ǁnāpa gu ge gaosagu hoaga ge ǂnôa i: Elisamab, xoa-aob tsî Delajab, Semajab ôab, tsî Elnatanni, Akbori ôab tsî Gemarjab Safanni ôab tsî Sedekiab, Hananjab ôab, tsî gaosagu hoagu tsîga.

¹³Tsî Mikaiab ge ǁîga ǁnā mîdi ǁîb ge ǁnâudi hoade ge ǂanǂan, Baruxi ge ǁnā ǂkhanis ǃnâ ǁaes ǂgaedi ǃnâ khomaide.

¹⁴ǃNubai gu ge gaosagu hoaga Jehudib, Netanjab ôab, Selemjab ôab, Kusxi ôaba Baruxi ǃoa ge sî, mîb nîga: ǁNā xamiǂkhanis ǁîsa xuts go ǁaes ǂgaedi ǃnâ khomais, ǁnāsa ǃomǁae ū îts hā. Nētib ge Baruxi, Nerijab ôaba, ǁnā xamisa ǂkhanisa ǁîb ǃomǁae ū tsî ǁîgu tawa ge sī.

¹⁵O gu ge ǁîb ǃoa ge mî: ǂNû îts sige ǂgaedi ǃnâ khomaiba ge re. Ob ge Baruxa ǁîgu ǂgaedi ǃnâ ge khomai.

¹⁶Tsî i ge ge ī, mîdi hoade gu ge ǁnâuo, o gu ge ǃhuri hâse ge kōgu nēba nauba tsî gu ge Baruxi ǃoa ge mî: Amase ge ge nē mîdi hoade gao-aoba nîra ǂanǂan.

¹⁷Tsî gu ge Baruxa dî tsî ge mî: Mîǃāba ge re, matits ge nē mîdi hoade ams âba xu xoa ǃkhaisa?

¹⁸Ob ge Baruxa ǁîgu ǃoa ge mî: ǁÎb di amsa xub ge nē mîdi hoade ge mîba te, tsî tita ge ǁîde inki ǀkha nē ǂkhanis ǃnâ ge xoa.

¹⁹O gu ge gaosaga Baruxi ǃoa ge mî: ǃGû îts sī gaugausen sats tsî Jeremiab tsîkho. Î-i tā khoe-e ǂan mapa kho hâ ǃkhaisa.

²⁰O gu ge gao-aob tawa ge sī ai-ommi ǃnâ, xawe xamisa ǂkhanisa gu ge ǃnā-oms Elisamab, xoa-aob dis ǃnâ ge sâu tsî gu ge ǁnā mîdi hoade gao-aoba ge ǁgaeba.

²¹ǃNubaib ge gao-aoba Jehudiba ge sî, ǁnā xamisa ǂkhanisab nî ūhāse, ob ge ǁîsa ǃnā-oms Elisamab xoa-aob disa xu ge ūhā. Tsî Jehudib ge gao-aob ǂgaedi ǃnâ tsî gaosagu, gao-aob ǂnamipe mâgu hoagu ǂgaedi ǃnâ ge khomai.

²²Tsî gao-aob ge saob ommi ǃnâ ge ǂnôa i, khoeseǁî ǁkhâb ǃnâ. Tsî ǀae-i ge ais âb aiǃâ ǀaekhoros ai ge khauhe hâ i.

²³Tsî i ge ge ī, Jehudib ge ǃnona ǃâdi kas, haka ǃâdi kas hoasa khomaio, ob ge ǁîde xoas di gôa-i ǀkha ǃgaoǃā tsî ǀaes ǀaekhoros ai hâs ǃnâ ge aoǂgā, xamis hoas ge ǀaes xa hapuhes kōse.

²⁴Tsî gu ge ǃhuri tsî saran âga ǀkhau tama ge i, gao-aob kas ǁîb ǃgāgu nē mîde ge ǁnâugu kas hoasa.

²⁵Elnatanni tsî Delajab tsî Gemarjab tsîgu ge gao-aoba ǂkhanisab tā ǂhubi ti ge ǀkhoma, xaweb ge ǁîga ǃgâ tama ge i.

²⁶ǁNās tawab ge gao-aoba Jeraxmeeli, Hameleb ôab tsî Serajab, Asrieli ôab tsî Selemjab, Abdeeli ôab tsîga ge mîmā, xoa-aob Baruxi tsî kēbo-aob Jeremiab tsîkha gu nî ǃkhō ti, xawe ǃKhūb ge ǁîkha ge gaugau.

²⁷ǃNubais ge ǃKhūb di mîsa Jeremiaba ge hāba, gao-aob ge xamisa ǂkhanis tsî ǁnā mîdi Baruxi ge Jeremiab di amsa xu xoadi tsîna ǂhubis khaoǃgâ, mî rase:

²⁸ǀNî xamisa ǁkhawa ū, îts ǁîs ai ǂguro mîdi, ǂguro xamis, Jojakimmi, Judab gao-aob ge ǂhubis dide xoa.

²⁹Tsî Jojakimmi, Judab gao-aob ǃoats ge nî mî: Nētib ra ǃKhūba mî: Sats ge nē xamisa ge ǂhubi, mî raǃâ: Tare xū-i ǃaromats ǁîs ai xoa tsî gao-aob Babilons dib ge amase hā tsî nē ǃhūba nîra hîǀhuru, khoe-i kas, ǀgoa-i kas hoas ǁîb ǃnâ nîra ǀkhais kōse?

³⁰ǁNā-amagab ra ǃKhūba Jojakimmi, Judab gao-aob xa nēti mî: ǁÎb ge ǀguib, Davib trons ai nî ǂnûb xaweba ūhâ tide, tsî ǁō hâ soros âb ge nîra aoxūhe tsēa ǀgammi ǃnâ tsî tsuxuba ǃkhaib ǃnâ.

³¹Tsî tita ge ǁîb di surib ǂama tsî ǁîb ǃgāgu ǂama ǂhanuoǃnâsib ân ǃaroma nîra ôaǃnâ, tsî tita ge ǁîn ǂama tsî Jerusalems ǁansaben ǂama tsî Judab gao-aogu ǂama ǁnā ǂkhabab, ǁîna ta ge ǃhoa-ūb hoaba nîra ūhā, xawen ge ǃgâ tama ge i.

³²Ob ge Jeremiaba ǀnî xamisa ū tsî ǁîsa xoa-aob Baruxi, Nerijab ôaba, ge mā. ǁÎb ge ǁîs ai Jeremiab di amsa xu mîdi ǁnā ǂkhanis, Jojakimmi Judab gao-aob ge ǂhubis didi hoade ge xoa. Tsî di ge gorose ǀoasa mîdi nēti īde ge ǀarohe.