Read Khoekhoegowab Jeremiab 37 Bible Online

Jeremiab 37 - Khoekhoegowab bible

Jeremiab 37

¹Tsî Sedekiab, Josiab ôab, Nebukadnesari, Babilons gao-aob xa ge gao-ao kaiheb Judab ǃhūb ǃnâb, ge Konjab, Jojakimmi ôab di soas ǃnâ ge re gaosîsen.

²Xawe ǁîb ge ǁnâu tama ge i, ǁîb ǂûb tsî ǁîb ǃgāgu tsî ǃhūb di ǁaes tsîna ǁnā mîdi ǃKhūb didi, ǁîb ge kēbo-aob Jeremiab ǃoabasa xu gere ǃhoade.

³Ti i ī xaweb ge Sedekiaba Juxali Selemjab ôab, tsî Sefanjab, Maasejab ôab, pristeri tsîkha ge sî kēbo-aob Jeremiab ǁga mîba nîse: ǀGoreba da re ǃKhūb sada Elob ǃoa.

⁴Jeremiab ge ganupe ǂgâ tsî gere ǂoa ǁaes ǃnâ tsîn ge ǁîba ganupe ǃkhō-oms ǃnâ ge ǂnûi tama hâ i.

⁵Tsî Faraob di ǂnubis ge Egipteba xu ge ǃgûǂoa tsî, Xaldeaǁîn Jerusalemsa ra xaǂgān ge gommi ânan ge ǁnâu ǃnubai Jerusalemsa xu ge ǃgûbē.

⁶ǃNubais ge ǃKhūb di mîsa kēbo-aob Jeremiaba ge hāba, mî raǃâ:

⁷Nētib ra ǃKhūb Israeli Eloba mî: Nēti du ge Judab gao-aob tita ǃoa ge sî dub, dî te du nî gab ǃoa nî mî: Mû, Faraob di ǂnubis, sado nî huise ge ǂoas, ge ǁkhawa ǁîs di ǃhūb ǃoa nî oa Egipteb ǃoa.

⁸Tsî Xaldeaǁîn ge ǁkhawa oa, tsî nē ǃāsa nîra ǃkhamū; tsîn ge ǁîsa ū tsî ǀaes ǀkha nîra khauǃkhū si.

⁹Nētib ra ǃKhūba mî: Tā ǂgaeǂhapu sadu di ǀomde, mî rase: Xaldeaǁîn ge ǂanǂansase sida xu nîra ǃgûbē. ǁÎn ǃgûbē tide xuige.

¹⁰Xaldeaǁîn di ǂnubis, sado ra ǃkhamūs hoasa du ga ǂnau tsî gu ga ǀnî ǀhapiǂnûihe hâ aogu ǀguiga ǃgauo, o gu ge ǁîga mâb hoaba tentoms âb ǃnâ khâi tsî nē ǃāsa ǀaes ǀkha nîra khauǃkhū.

¹¹ǃAruǀî i ge ge ī, ǂnubis Xaldeaǁîn dis ge Jerusalemsa xu ǃgûbēo Faraob di ǂnubis ǃaroma,

¹²ob ge Jeremiaba Jerusalemsa xu ge ǃgûǂoa, Benjaminni ǃhūb ǁga, ǁnāpab nî ǁaes ǃnâ amǃnâs âba ǃkhōǃoase.

¹³Tsî Benjaminniǁāb ǃnâb ge hâ i, ob ge ǃûi-aoba ǁnāpa ge hâ i, Jerija ti ǀon hâb, Selemjab ôab, Hananjab ôaba: ǁÎb ge kēbo-aob Jeremiaba ǃkhō tsî ge mî: Sats ge Xaldeaǁîn ǀkha ra ǁaeǁaesen ǂgao!

¹⁴Ob ge Jeremiaba ge mî: Ama tama i, tita ge Xaldeaǁîn ǀkha ǁaeǁaesen ǂgao tama hâ. Xaweb ge ǁîba ǃgâ tama ge i, tsî Jerijab ge Jeremiaba ǃkhō tsî gaosagu tawa ge ūsī.

¹⁵O gu ge gaosaga Jeremiab ǂama kaise ǁaixa tsî ǁîba ge ǂnau, tsî gu ge ǁîba ǃkhō-oms ǃnâ ge ǂnûi, Jonatanni, xoa-aob di oms ǃnâ, ǁîsan ge ǃkhō-omse dī hâ i xui-ao.

¹⁶Nētib ge Jeremiaba ǃkhō-oms ǃnâ ǃnā-oms ǃnâ ge sī, tsî Jeremiab ge ǁnāpa ǂgui tsēdi kōse hâo,

¹⁷ob ge gao-aob Sedekiaba ǁnāǀî sî tsî ǁîba ge ūhā kai, tsî gao-aob ge ǁîba ǁîb ommi ǃnâ ǂganǃgâsase dî tsî ge mî: Mî-e kha hâ i a ǃKhūba xu?

¹⁸Ob ge Jeremiaba ge mî: Hâ a, tsîb ge: Sats ge Babilons gao-aob ǃomǁae nîra māhe, ti ge mî.

¹⁹ǃAruǀîb ge Jeremiaba gao-aob Sedekiab ǃoa ge mî: Tare-e ta tita sa ǃoagus kas, nē ǁaes ǃoagus kas hoasa ǁore hâ, o du ǃkhō-oms ǃnâ ge ǂnûi te?

²⁰Tsî mapa gu nēsi hâ, sadu kēbo-aogu sado ge kēboba tsî: Babilons gao-aob ge sadu ǃoagus kas, nē ǃhūb ǃoagus kas hoasa hā tide, ti a mîga?

²¹Îts ǁnâi nēsi tita ǁnâu, ti ǀhonkhoe, gao-aotse. As ti ǀkhomabasensa sa ais aiǃâ sī, îts tā ǁkhawa Jonatanni, xoa-aob oms ǃoa ūsī kai te, î ta tā ǁnāpa ǁō.

²²ǃNubaib ge gao-aob Sedekiaba ge mîmā, î gu Jeremiaba sâus di ai-ommi ǃnâ ūǀgara tsîb ge tsēkorobe ǀgui pereba gere māhe, ǁganaob di daoba xu, ǃās di pere-i hoa-i ge toas kōse. ǁNātib ge Jeremiaba ai-ommi sâus dib ǃnâ ge hâ.