Read Khoekhoegowab Jeremiab 38 Bible Online

Jeremiab 38 - Khoekhoegowab bible

Jeremiab 38

¹Tsî Sefatjab, Matanni ôab, tsî Gedaljab, Pashuri ôab, tsî Juxali, Selemjab ôab, tsî Pashuri, Malxiab ôab tsîgu ge ǁnā mîdi, Jeremiab ge ǁaes hoas ǃoa ǃhoadi hoade ǁnâuo, mî rase:

²Nētib ra ǃKhūba mî: Nē ǃās ǃnâ ga hâ-i ǁî-i ge gôab ǀkhas kas, ǃâtsūǀkhāb xas kas, ǂhīǁōb xas kas hoasa nîra ǁō, xawe Xaldeaǁîn ǃoa ga ǂoa-i, ge nîra ûi; ǁî-i ge ǀoms â-e ǁkhâuǁnâxūse ūhâ tsî nîra ûi xui-ao.

³Nētib ra ǃKhūba mî: Nē ǃās ge ǂanǂansase ǂnubis Babilons gao-aob dis ǃomǁae nîra māhe, ǁîs ge ǁîsa nîra ū.

⁴O gu ge gaosaga gao-aob ǃoa ge mî: Ab nē aoba ǃgamhe re. Nē dommi aib ra ǃomgu toro-aogu, nē ǃās ǃnâ ge ǃgaugu tsî ǃomgu ǁaes hoas diga ǂkhabu kai xuige, nēti ī mîdeb ǁîga ra mîbas ǀkha. Nē aob ǂkhîb nē ǁaes diba ôa tama, tsîb ra tsūba ôa xuige.

⁵Ob ge gao-aob Sedekiaba ge mî: Mû, ǁîb ge sago ǃomǁae hâ, gao-aota sago xū-i xare-e dī ǁkhā tama xui-ao.

⁶O gu ge Jeremiaba ū tsî tsaus Malxiab Hameleb dib dis, sâus di ai-ommi ǃnâ ǁîba ge aoǂgā, tsî gu ge tsurigu ǀkha ge ǁgôa kai bi, tsî tsaus ǃnâ i ge ǁgam-e ge ǀkhai i, tsî ǂgoab ǀguib ge ge hâ i, ob ge Jeremiaba ǂgoab ǃnâ ge domǂgâ.

⁷Tsî Ebed-Meleki Etiopiaǁîb, ǃnā-oms ǃoabasabegu ǀguib, ǁnā ǁaeb ai gao-aob ommi ǃnâ ge hâ ib, ge ǁnâuo, Jeremiaba gu ge tsaus ǃnâ aoǂgā ǃkhaisa, gao-aob Benjaminni di ǁāb ǃnâ ǂnôa hîa,

⁸ob ge Ebed-Meleka gao-aob omma xu ǂoa tsî gao-aoba ǃhoaǀî tsî ge mî:

⁹Ti ǀhonkhoe gao-aotse, nē aogu ge tsūse go dī, kēbo-aob Jeremiaba gu go dī-ūn hoan ǃnâ, tsaus ǃnâ gu go aoǂgāba, ǃkhais âb aib ga huga ǃâs xa ǁō hâ hîa, pere-i ǃās ǃnâ a ǀkhai amaga.

¹⁰ǃNubaib ge gao-aoba Etiopiaǁîb, Ebed-Meleka mîmā tsî ge mî: ǃNona khoega nēpa xu ūsao, îts kēbo-aob Jeremiaba tsausa xu sī ūǂui, ǁō tamab hâ hîa.

¹¹Ob ge Ebed-Meleka ǁnā khoega ūsao tsî ge ǂgâ gao-aob ommi ǃnâ, ǁui-oms kōse, tsîb ge ǁnāpa xu ǀkhauhe hâ tsî ǀorotoa hâ ǃkhaina ge ū, tsîb ge ǁîna tsurigu ǀkha Jeremiab ǃoa tsaus ǃnâ ge ǁgôa kai.

¹²Ob ge Ebed-Meleki Etiopiaǁîba Jeremiab ǃoa ge mî: Îts ǁnâi nē ǀkhauhe hâ tsî doa hâ ǃkhaina sa gamǃnâkha ǃnâ tsurigu ǃnaga ǁgui. Ob ge Jeremiaba ǁnāti ge dī,

¹³o gu ge Jeremiaba tsurigu ǀkha ǂgae tsî tsausa xu ge ūǂui. Tsî Jeremiab ge sâus di ommi ǃnâ ge hâ.

¹⁴ǃNubaib ge gao-aob Sedekiaba sî tsî kēbo-aob Jeremiaba ge ūhā kai ǃnonaǁî ǂgâs, ǃkhais ǃKhūb ommi tawa hâs dis kōse. Tsî gao-aob ge Jeremiab ǃoa ge mî: Tita ge ǀgui xū-e nî dî tsi, xū-i xare-e tā gaugauxū te re.

¹⁵Ob ge Jeremiaba Sedekiab ǃoa ge mî: ǂHaiǂhaiba tsi ta kao, xare ǃgam tets tide? Tsî ǀapemā tsi ta ka xawets ge satsa tita ǃgâ tide.

¹⁶ǁGoasib ge gao-aob Sedekiaba Jeremiaba ǂganǃgâsib ǃnâ nūba tsî ge mî: ǃKhūb nē ǀomra sakhoma ge dībab a ûitsama ǃkhais ao ta ge tita ǃgam tsi tide, tsî ǁkhāti nē aogu sa ǀomsa ra ôagu ǃomǁae māǁnâ tsi tide.

¹⁷Ob ge Jeremiaba Sedekiab ǃoa ge mî: Nētib ra ǃKhūb ǂnubidi di Elob, Israeli Eloba, mî: Māsenxasets ga satsa Babilons gao-aob di gaosagu ǃoa ǂoao, os ge ǀoms âtsa nîra ûi, os ge nē ǃāsa ǀaes ǀkha khauǃkhūhe tide; ots ge satsa nîra ûi, sats tsî ommi âts dido.

¹⁸Xawe Babilons gao-aob di gaosagu ǃoats ga ǂoa tama io, os ge nē ǃāsa Xaldeaǁîn ǃomǁae nîra māhe, on ge ǁîna ǁîsa ǀaes ǀkha nîra khauǃkhū, tsî sats ǂûts ge ǃomǁaeb âna xu ûi tide.

¹⁹Ob ge gao-aob Sedekiaba Jeremiab ǃoa ge mî: Tita ge ǁnā Jodeǁîn, Xaldeaǁîna ǁaeǁaesen hâna ra ǃao ǀnîsin ge tita ǁîn ǃomǁae nî māǁnâ, on ge nî ǃhō te.

²⁰Ob ge Jeremiaba ge mî: ǁÎn ge māǁnâ tsi tide, ǁnâuǀnam ǁnâi dommi ǃKhūb dib, ǁîb ǃoa ta ra ǃhoa-ū tsiba, ots ge nîra ǃgâibahe, tsîs ge ǀoms âtsa nîra ûi.

²¹Xawe ǃgûǂoasats ga ǂkhāo, os ge mîs ǃKhūb ge tita a mû kaisa a nē:

²²Mû, ǁnā taradi, Judab gao-aob ommi ǃnâ ge ǃgaudi hoadi ge Babilons gao-aob di gaosaga nîra ǂgaeǂguiǂuibahe; o gu ge ǁîga nîra mî: Sa horesagu ge satsa ǃkhē tsî ge dā, o ra ge ǂaira âtsa ǂgoab ǃnâ ge dom; o ra ge khaosǀî ge oa.

²³On ge sa taradi hoadi tsî sa ôagu hoaga Xaldeaǁîn ǃoa nîra ǂgaeǂguiǂui. Tsî sats ǂûts on ge ǃommi âna xu ûi tide, tsîts ge ǃommi Babilons gao-aob dib ǀkha nîra ǃkhōhe; tsîs ge nē ǃāsa ǀaes ǀkha nîra khauǃkhūhe.

²⁴ǃNubaib ge Sedekiaba Jeremiab ǃoa ge mî: A-i khoe-i xare-e nē mîdi xa tā ǂan, îts tā ǁō.

²⁵Tsî gaosagu ga ǁnâuo, sa ǀkha ta go ǃhoa ǃkhaisa, tsî gu ga sa tawa hā tsî sa ǃoa mîo: Mîǃāba ge re nēsi, tare-ets go gao-aob ǀkha ǃhoasa; tā xū-e gaugau-ai ge re, o ge ge ǃgam tsi tide; tsî tare-eb go gao-aoba satsa ǃhoa-ū?

²⁶Ots ge ǁîga nî mîba: Tita ge ti ǀkhomabasensa gao-aob di ais aiǃâ ge ǁgui, ǁkhawab Jonatanni oms ǃnâ ūsī te tide ǃkhaisa, ǁnāpa ta nî ǁōse.

²⁷Tsî gaosagu ge Jeremiab tawa hā tsî ǁîba dîo, ob ge ǁîga ge mîǃāba nē mîdi gao-aob ge mîmādi hoadi ǃoa. O gu ge ǁîba ge ǁnāxū, ǃkhais ge ǂanhe tama hâ i amaga.

²⁸Tsî Jeremiab ge ai-ommi ǃûis dib ǃnâ ge hâ i, Jerusalems ge ūhe tsēs kōse. Tsîs ge ǁî ǃkhaisa ge ī Jerusalems ge ūhe hâ is kōse.