Read Khoekhoegowab Jeremiab 39 Bible Online

Jeremiab 39 - Khoekhoegowab bible

Jeremiab 39

¹Khoeseǁî kurib Sedekiab, Judab gao-aob dib ǃnâb ge Nebukadnesari, Babilons gao-aob, tsî ǁîs di ǂnubis hoasa Jerusalems ǃoagu hā tsî ǁîsa ge xāǂgā.

²Disiǀguiǀaǁî kurib Sedekiab dib ǃnâ, hakaǁî ǁkhâb di khoeseǁî tsēs ais ge ǃāsa ge khôaǃkhopahe.

³O gu ge gaosagu Babilons gao-aob digu hoaga ǁîs ǃnâ ǃgûǂgâ tsî ǁAegub ǁāb ǃnâ sī ge mâ: Nergal-Sareseri, Samgar-Nebub, Sarseximmi hîa Rabsarib, Nergal-Sareseri, ǂamǃgaidī-aob, tsî gaosagu Babilons digu hoaga.

⁴Tsî i ge ge ī, Sedekiab, Judab gao-aob, tsî toro-aogu hoagu ge ǁîga mûo, o gu ge ge ǁhâ, tsî gu ge tsuxuba ǃāsa xu ge ǃgû, gao-aob ǃhanaba-ū garu daob ǀkha, ǀgam ǂnubiǂgoakha ǁaegu hâ ǁāb ǃnâ-ū tsîb ge ǂgās di daoba-ū ge ǃgûǂoa.

⁵Xawe ǂnubis Xaldeaǁîn dis ge ǁîna ge ǃkhoeǃgon, tsîn ge Sedekiaba ǂgādi Jerixos didi ǃnâ saoǁae tsî ǃkhō bi tsî Nebukadnesari, Babilons gao-aob ǃoa Riblas, Hamatǃhūb dis ǁga ge ūsī; ǁîb ge ge ǀgoraǃgâ bi.

⁶Tsî gao-aob Babilons dib ge Sedekiab ôaga ǁîb mûra aiǃâ ge ǂā Riblas tawa, ǁkhātib ge Babilons gao-aoba ǀgapiǃgôasagu Judab digu hoaga ge ǂā.

⁷Tsîb ge mûra Sedekiab dira ge ǂgīǂgī, tsîb ge ǁîba ǀgam ǂaiǁkhamkha ǀkha ge ǃgae, Babilons ǃoab nî ǂgaeǂguisīhese.

⁸Tsî ommi gao-aob dib tsî omdi ǁaes didi tsîden ge Xaldeaǁîna ǀaes ǀkha ge khauǃkhū, tsîn ge ǂnubiǂgoagu Jerusalems diga ge khôaǁnâ.

⁹Tsî ǃgau gen ǁaes din, ǃās ǃnâ ge ǃgaun, tsî ǁnāǁgôasan, ǁîba xu ge ǁnāǁgôan, ǁînab ge Nebusaradanni, ǃûiǃgâ-aogu di ǂamsaba ǃkhōsase Babilons ǁga ge ǂgaeǂguisī.

¹⁰Xawe ǁnā ǁaes, ǀgâsa ge i tsî xū-i xare-e ūhâ tamas, ǁîsab ge Nebusaradanni ǃûiǃgâ-aogu di ǂamsaba, ǀnîna ge ǃgau kai Judab ǃhūb ǃnâ, tsîb ge ǁîna ǁnātsē ǂauxûiǂûǃhanagu tsî nau ǃhanagu tsîna ge mā.

¹¹Tsî Jeremiab xasab ge Nebukadnesari, Babilons gao-aoba, Nebusaradanni ǃûiǃgâ-aogu di ǂamsab ǃomǁae mîmāsa mā tsî ge mî:

¹²ǁÎba ū, îts sa mûra ǁîb ai ūhâ, îts tā tsūdī bi, îts ǁîb nî mîba tsi khami dī-ū bi.

¹³Nēti gu ge Nebusaradanni, ǃûiǃgâ-aogu di ǂamsab, tsî Nebusxasbanni, Rabsarib, tsî Nergal-Sareseri, ǃgai-aogu di ǂamsab, tsî Babilons gao-aob di ǂamsagu hoagu tsîna ge sî,

¹⁴o gu ge sî tsî Jeremiaba ai-ommi sâus diba xu ū tsî ǁîba Gedaljab, Ahikammi ôab, Safanni ôaba ge māǁnâ, ǁarusī-ū bib nîga, nētib ge ǁaes ǁaegu ge hâ.

¹⁵Tsî mîs ǃKhūb dis ge ǁkhāti Jeremiaba ge hāba, ai-ommi sâus dib ǃnâb ǂganamhe hâ hîa, mî rase:

¹⁶ǃGû îts Ebed-Meleki, Etiopiaǁîb ǃoa ǃhoa îts mî: Nētib ra ǃKhūb ǂnubidi dib, Israeli Eloba mî: Mû, tita ge ti mîde nē ǃāsa nîra hāǂam kai, ǂkhabab ǃoa tsî ǃgâib ǃoa tama. Tsîn ge ǁnātsē sa ais aiǃâ nîra hâ.

¹⁷Xawe tita ge satsa ǁnātsē nîra ore, tib ra ǃKhūba mî, tsîts ge satsa ǁnā aogu, ais âgu aiǃâts ra ǃaogu ǃomǁae māǁnâhe tide.

¹⁸Tita satsa ǂanǂansase nîra ore xui-ao, tsîts ge gôab xa ǁnā tide, tsîts ge ûib âtsa ǁkhâuǁnâxūse nîra ūhâ, ti aits ge satsa ǂgomaiǂnûi hâ amaga, tib ra ǃKhūba mî.