Read Khoekhoegowab Jeremiab 4 Bible Online

Jeremiab 4 - Khoekhoegowab bible

Jeremiab 4

¹ǃHobasen ǂgaots kao, sats Israeltsa, tib ra ǃKhūba mî, tita ǃoa ǃhobasen. Tsî sa ǁgaiǁgaisanats ga ti aisa xu dībē ǂgao-o, tā ǀnarema,

²îts nū, ǃKhūb a ûitsama ǃkhais ao, amab ǃnâ tsî ǂhanub ǃnâ tsî ǂhanu-aisib ǃnâ, amagan ge ǀǁaede ǁîb ǃnâ nîra ǀkhaesen tsî ǁîb ǃnâ nîra koasen.

³Nētib ra ǃKhūba Judab aogu tsî Jerusalems ǃoa mî xui-ao: ǀAsa ǃhūǃâ-e ǃhūǃgaobasen, î du tā ǁkhūn ǃnâ tsoro.

⁴ǃKhūba ǃgaosenba, î go sago ǂgaogu di aikhōga dībē, sago Judab aogo tsî sadu Jerusalems ǁansabedo, îb ti ǁgôasiba tā ǀae-i axase ǂoa, îb tā khau, khoe-i xare-i ǁîba a ǀari ǁoas kōse, ǂkhabasib sadu dīgu dib ǃaroma.

⁵Aoǁnâ ǁîsa Judab ǃnâ, î du ǁîsa Jerusalems ǃnâ ǁnâu kai, î du ǁîna mîba: Ā, xâi ǀgapadasa ǃhūb ǃnâ! ǂGai ǃgari dommi ǀkha î du mî: ǀHao du re, î da ǁaposa ǃādi ǃnâ ǂgâ re!

⁶ǃKhauba ǃkhā Sionsǀî! ǀHûpe ǃhū, î du tā mâ, tita tsū ǃkhaisa ra hā kai ǀapasa xu tsî kai ǂkhôa-e xuige.

⁷Xammi ge ǃnawas âba xu go ǂoaxa; tsî hîkākā-aob ǁaedi dib ge go ǀkhī. ǁÎb ge ǃkhais âba xu ge ǂoaxa, sa ǃhūbab nî ǃgaroǃhū kaise, o di ge sa ǃāde nîra hîǀhuruhe, khoe-i xare-i ǁîdi ǃnâ ǁan tides kōse.

⁸ǁNās ǂama ǁhōga ana î du ǃoa, î du ā, ǀgamsib ǃKhūb ǁaib dib sida xu ǁkhaedawahe tama xuige.

⁹Tsî i ge ǁnā ǁaeb ǁkhāb ai nîra ī, tib ra ǃKhūba mî, ob ge ǂgaob gao-aob dib tsî ǁkhoaǂgaosib gaosagu diba nîra kā, o gu ge pristerga nîra ǃhurigâ, tsî gu ge kēbo-aoga nîra burugâ.

¹⁰ǃNubai ta ge tita ge mî: Okha, ǃKhūtse, ǃKhūtse, amasets ge satsa nē ǁaes tsî Jerusalems tsîra kaise gara tsî: Sadu ge ǂkhîba nîra ūhâ, ti ge mî, gôab ǀoms kōse ra sī hîa.

¹¹ǁNā ǁaeb ǁkhāb ai ra ge nē ǁaes tsî Jerusalems tsîra nîra mîbahe: ǀGamsa ǂoab ge ǃgaroǃhūb di ǀgapi ǃkhaide xu ra hā daob ti ǁaes di ôas diba-ū, ǃanuǃanu rase tama, tsî ǁkhāti ǀkhaiǀkhaiǃnâ rase tama;

¹²ǂoab ge tita nîra hāba, ǁîna nîra ǀgaidāba. O ta ge tita ǁkhāti ǀgoraǃgâde ǁîn ǂama nîra ǃhoaǂui.

¹³Mû, ǁîb ra ǀnanudi axase ǂoaxa, tsî kunidi âb ge sare-i khami ī, hān âb ge ǃariǃkhān ǃgâ-ai a ǃhae. Tsūba da, hîkākāhe da hâ xui-ao!

¹⁴ǂGaob âsa ǂkhabasiba xu ǁā Jerusalemse, îs sâuhe. Matikōses kha ǁnâi ǂâidi sa ǁausib dide ǂgaob âs ǃnâ nîra hâǁgoa kai?

¹⁵Dommi ge Dansa xu ra ǂhôa, tsîb ra Efraimmi di ǃhomma xu ǀkhomǀkhomsana ǁnâu kai.

¹⁶ǁAede ǁî ǃkhaisa aoǁnâba! Mû, î du ǁîsa ǁnâu kai Jerusalemsǀî: ǃÛi-aogu ge ǁnāpa ǃgoaxa ǃnū ǃhūba xu, tsî gu ge dommi âga ra ǃhâkhâi Judab di ǃādiǀî.

¹⁷ǃAub di ǃûi-aogu xase gu ge ǁîsa ra hâǂnamipe, titas ge mâǃoa hâ i xui-ao tib ra ǃKhūba mî.

¹⁸Sa daob tsî sa dīgu tsîn ge nē xūna ge dī-ū tsi. Sa ǂkhabasiba xus ge nēsa, nētikō ausets ra hāǂamhesa, ǂgaob âts kōse i ra sīsa!

¹⁹Ti, ǃnātse, ti ǃnātse, tita ge ǁoratsûba ūhâ, tita-e, ti ǂgaob di ǃnātse, ti ǂgaob ra ǂnau ti ǃnâ, o ta ge tita a ǃnō ǁoa. Ti ǀoms ra ǀōb ǀgapadas dib tsî auǁnaes diba ǁnâu xui-ao.

²⁰ǂKhôa-i ge ǂkhôa-i ama ra ǂgaiǂuihe; ǃhūb hoab hîǀhuruhe hâ xui-ao. ǃHaese di ge ti tentomde hîkākāhe hâ, ti xordainga ǀgui mûsǀapiros ǃnâ.

²¹Matikō ǁaeb kōse ta kha ǃkhauba nîra mû, ǀōb ǀgapadas diba nî ra ǁnâu?

²²Amase gâres ge a ti ǁaesa; titan ge a ǀū, ǁîn ge a ǃkhausa ǀgôa, tsîn ge ǁnâuǃāxa tama hâ. ǂKhabadīsan ge a gā-aiba; xawe ǃgâidīsan ge ǁîna a ǀū.

²³Tita ge ǃhūba ge kōǀî tsî mû, ǁîb ge ǃū-ai tsî ǀkhaiǃnâ ge i; ǁkhāti ǀhommiǀî, tsî ǃnâb âb ge ǀkhai ge i.

²⁴Tita ge ǃhomga ge kōǀî tsî mû, ǁîgu ge ge ǀkhū; tsî ǃnomdi hoadi ge ge gon.

²⁵Tita ge ge kō tsî mû, khoe-i xare-i ge ǀkhai ge i; tsî anin ǀhommi din hoan ge doebē ge hâ i.

²⁶Tita ge ge kō tsî mû, ǂûǂûxa ǃhūb ge ǃgaroǃhū kaihe hâ; tsî ǁîb di ǃādi hoadi ge khôaǁnâhe ge hâ i, ǃKhūb ǃaroma tsî ǀgamsib ǁaib âb dib ǃaroma.

²⁷Nētib ra ǃKhūba mî xui-ao: Nē ǃhūb hoab ge nîra ǃū-aisa ǃhū kai, xawe ta ge tita dītoa bi tide.

²⁸ǁÎ ǃkhais xab ge ǃhūba nîra ǃoa tsî ǀhommi ǀgapise hâb ge nîra ǂnū: Tita ge ǁîsa ge ǃhoa, tita ge ǁîsa ge ǂâibasen, tsî ta ge ǃhausen tide, tsî tita ge ǁî ǃkhaisa xu ǁkhaedawasen tide.

²⁹ǀŌb ǃgapi-aogu tsî khāǁkhâu-aogu tsîn dib xa di ge ǃādi hoade ra ǃhū, ǁîdi ge ǀnanudi ǃnâ ra ǂgâ, tsî ǃhaogu ai ra ǃapa. ǃĀdi hoadi ge ǁnāxūhe hâ, khoe-i xare-i ǁîdi ǃnâ ǁan tamas kōse.

³⁰Tare-es kha nî dī, sas hîǀhuruhe hâsa? Tsî skarlak saranas ga ana xawe, ǃhuniǀuri-anixūn ǀkhas ga anisen xawe, mûra âsas ga î-î-xū-i ǀkha boro xawe, xawes ra ǁause î-îsen, ǁâsabegu ge sasa ra ǃharaxū; ǁîgu ge ǀoms âsa ôa tide.

³¹Dommi ǁoratsûb ǃnâs hâs dib khami īb, ǂōǂōsib ǂguro ǀgôa-e ra ǁoras dib khami īb, ge Sionni ôas di domma; ǁîs ra ǃgae, ǁîs ra ǃomkha âsa ǀhōǂui tsî: Tita-e, ti ǀoms ra ǂkhabu ǃgamaon xa, ti mî.