Read Khoekhoegowab Jeremiab 40 Bible Online

Jeremiab 40 - Khoekhoegowab bible

Jeremiab 40

¹Mîs Jeremiaba ǃKhūba xu ge hābas, Nebusaradanni ǃûiǃgâ-aogu di ǂamsab ge ǁîba Ramasa xu ǃgû kais khaoǃgâ. ǁÎbab ge ūhās khaoǃgâ, ǁkhamgu ǀkhab ge ǃgaehes khaoǃgâ Jerusalems tsî Judab tsîra di ǃkhōsan, Babilons ǃoa ǃkhōsase ge ǂgaeǂguibēhen hoan ǁaegu.

²ǂAmsab ǃûiǃgâ-aogu dib ge Jeremiaba ūhā kai tsî ǁîb ǃoa ge mî xui-ao: ǃKhūb ge nē ǂkhababa nē ǃās ǂama ge ǃhoa.

³Tsî ǃKhūb ge ǁîsa ge hā kai, tsîb ge ǁîsa ǃhoab ge xase ge dī: Sadu ge ǃKhūb ǃoagu ge ǁore tsî dommi âba du ge ǁnâuǀnam tama i amagas ge nē ǃkhaisa sado a hāba.

⁴Tsî nēsi mû, tita ge nētsē satsa go xore, ǁnā ǁkhamgu ǃommi âts tawa ge hâ iga xu, tsî ǃgâibahets kao, tita ǀkha Babilons ǃoa īsao, ǁnâi hā, o ta ge tita ti mûsa sa ai nî mâi. Xawe sa mûǁae i ga tsū io, tita ǀkha Babilons ǃoa sīsa, ǁnâi ǀû. Mû, ǃhūb hoab ge sa ais aiǃâ hâ, mûs âts ga ǃgâibahe tsî ǂhanubahe ǀkhāb hoabǀî, ǃgû.

⁵Tsî ganupeb ra are hîab ge ge mî: ǁNâi oa Gedaljab, Ahikammi ôab, Safanni ôab, Babilons gao-aob xa Judab di ǃādi ǂama ge mâiheb ǃoa, îts ǁîb tawa ǁaes ǃnâ sī ǁan, ǃgû ǂgaots ka ǀkhā-i hoa-e ǃoa ǃgû. Ob ge ǂamsab ǃûiǃgâ-aogu diba ǁîba daob ai ǂûna ge mā tsî ǀkhaexū-i tsîna tsî ge xū bi.

⁶Nētib ge Jeremiaba Gedaljab, Ahikammi ôab ǁga ge sī Mispas tawa, tsîb ge ǁîb tawa sī ge ǁan, ǁnā ǁaes ǃhūb ǃnâ ge ǃgaus ǁaegu.

⁷Tsî ǂamsagu ǂnubidi digu, ǃaub ǃnâ hâgu, ǁîgu tsî ǁîgu aogu ge ǁnâuo, Babilons gao-aob ge Gedaljab Ahikammi ôaba, ǃhūb di mûǂamaose mâi ǃkhaisa, tsî ǁîbab ge mîmāba ǃkhaisa, aogu tsî taradi tsî ǀgôaron tsî hoan xa ǀgâsan ǃhūb din Babilons ǃoa ǃkhōsase ǃgû-ūhe tama ge hâ in xa,

⁸o gu ge Gedaljab ǁga Mispas tawa ge hā, Ismaeli, Netanjab ôab, tsî Johananni tsî Jonatanni tsîkha, Kareaxi ôakha, tsî Serajab, Tanhumeti ôab, tsî ǀgôagu Efaib Netofaǁîb digu, tsî Jesanjab, Maaxatǁîb ôab tsî, ǁîgu tsî ǁîgu aogu tsîna.

⁹Ob ge Gedaljab, Ahikammi ôab, Safanni ôaba, ǁîgu tsî ǁîgu aoga nūba tsî ge mî: Xaldeaǁîna ǃoabasa tā ǃao, ǃhūb ǃnâ hâ, î du Babilons gao-aoba ǃoaba, o du ge nîra ǃgâibahe.

¹⁰Tsî mû, tita ge Mispas tawa ǁan hâ, Xaldeaǁîn sida ǃoa nî hān di ais aiǃâ ta nî mâse, î du ǁnâi sado ǀhaoǀhao ǂauxûib tsî ǁkhunaǂûn tsî olib tsîna, î du ǁîna sadu di soadi ǃnâ ǂgā, î du sadu ǃādi hîa du ge ūdi ǃnâ sī ǁan.

¹¹Tsî ǁnā Jodeǁîn, Moab ǃnâ tsî Amonni ôan ǃnâ tsî Edommi ǃnâ tsî ǁnā ǃhūgu hoagu ǃnâ ǁan hân hoan on ge ǁnâuo, Babilons gao-aob ge Judab ǃnâ ǃgau-e hâ kai ǃkhaisa tsî Gedaljab, Ahikammi ôab, Safanni ôabab ge ǁîn ǂama mâi ǃkhaisa,

¹²on ge Jodeǁîn hoana ge oa ǁnā ǃādi, ǁîdi ǃoan ge doeǁgasīhede xu, tsîn ge Judab ǃhūb ǃnâ Gedaljab ǁga ge hā Mispas tawa, tsîn ge kaise ǀoasa ǂauxûib tsî ǁkhunaǂûna ge ǀhaoǀhao.

¹³Tsî Johananni, Kareaxi ôab, tsî ǂnubidi di ǂamsagu hoagu ǃaub ǃnâ hâgu ge Gedaljab ǁga ge hā Mispas tawa.

¹⁴Tsî gu ge ǁîb ǃoa ge mî: ǂAnts a xare, Baalib, Amonni ôan di gao-aob ge Ismaeli, Netanjab ôaba sîǂui ǃkhaisa, ǃgam tsib nîse? Xawe Gedaljab, Ahikammi ôab, ge ǁîna ǂgom tama ge i.

¹⁵Ob ge Johananni Kareaxi ôaba Gedaljaba ǂganǃgâsib ǃnâ Mispas tawa ǃhoa-ū tsî ge mî: Tita ǃgû kai, î ta Ismaeli, Netanjab ôaba sī ǃkhamdā, khoe-i xare-i a ǀū hîa. Tarexab kha satsa nî ǃgam, tsî tarexan Judab din, sa tawa ǀhao hâna ǀgaruǀgaruhe tsî Judab di ǃgaurona nî hîkākāhe?

¹⁶Ob ge Gedaljab, Ahikammi ôaba, Johananni Kareaxi ôab ǃoa ge mî: Tā nē ǃkhaisa dī, ǂhanu tamasets ra Ismaeli xa ǃhoa xuige.