Read Khoekhoegowab Jeremiab 41 Bible Online

Jeremiab 41 - Khoekhoegowab bible

Jeremiab 41

¹Tsî i ge hûǁî ǁkhâb ǃnâ ge ī, Ismaeli, Netanjab ôab, Elisamab ôab, gao-aob surib dib tsî gao-aob di ǂamsagu, ge disi aogu ǁîb ǀkha, Gedaljab Ahikammi ôab ǁga ge hā Mispas tawa, tsî gu ge ǁnāpa pereba ge ǂûǁae.

²Ob ge Ismaeli Netanjab ôaba ge khâi, ǁnā disi aogu ǁîb tawa hâgu ǀkha, tsî gu ge Gedaljab Ahikammi ôab, Safanni ôaba gôab ǀkha ge ǃgam; nētib ge ǁîba ǁnāb, Babilons gao-aob ge ǃhūb ǂamab nî mûǂamse mâiba ge ǃgam.

³ǁKhātib ge Ismaela ǁnā Jodeǁîn, Gedaljab ǀkha Mispas tawa hâna ge ǂnau tsî Xaldeaǁîgu, toro-aogu ǁnāpa ge hōhegu tsîna.

⁴Tsî i ge ǀgamǁî tsēs ai ge ī, Gedaljabab ge ǃgams khaoǃgâ khoe-i a ǀū hîa,

⁵o gu ge khoegu Sexems diga Silos tsî Samarias tsîra xu ge hā, ǁkhaisadisi aogu, ǀhō-amdi âga ǂkhom, sarana doa tsî ǁî-aitsama ǃgaosen hâga, tsî gu ge ǂûǁguibadi tsî wiroki tsîna ǃomǁae ge ūhâ i, ǃKhūb ommi ǃoa gu nî ǁîna ūsīse.

⁶Ob ge Ismaeli Netanjab ôaba ǁîga ge ǃgûǃoa Mispasa xu, ā garu rase. Tsî i ge ge ī, ǁîgab ge ǃoa ǃnubaib ge: Sī go re Gedaljab, Ahikammi ôab tawa, ti ge mî.

⁷Xawe i ge ge ī, ǃās ǁaegu gu ge sī ǃnubaib ge Ismaeli Netanjab ôaba ǁîga ǃgaoxadom tsî tsaus ǃnâ aoǂgā ǃkhaisa, ǁîb tsî ǁnā aogu, ǁîb ǀkha ge hâ i gu tsîna.

⁸Xawe disi aogu ge ǁîgu ǃnâ ge hōhe, Ismaeli ǃoa ge mîga: Tā sige ǃgam, sige ge ǂganǃgâsa ǁuiga ūhâ ǃaub ǃnâ, ǃhorob tsî gerst tsî olib tsî danib tsîna. Nētib ge ge ǀû tsî ǃgam gu tama ge i ǁîgu di ǃgâsagu ǀkha.

⁹Tsî tsaus, ǁîs ǃnâb ge Ismaela ǁō hâ sorodi ǁnā aogu, Gedaljab xōǀkhāb ge ǂnaugu didi hoade aoǂgās ge ǁnā tsau ge i, gao-aob Asab ge dīsa, Basab Israeli gao-aob ǂama, ǁîsab ge Ismaeli, Netanjab ôaba ǃgamhe hâgu ǀkha ge ǀoaǀoa.

¹⁰Tsî Ismaeli ge ǃgau gen ǁaes din, Mispas tawa hâna, ǃkhōsase ge ūǃgû, gao-aob ôadi tsî ǁnā ǁaes, Mispas tawa ge ǃgaus Nebusaradanni, ǃûiǃgâ-aogu di ǂamsab, ge Gedaljab, Ahikammi ôaba māna; ǁînab ge Ismaeli, Netanjab ôaba ǃkhōsase ūǃgûbē tsî ge doe, Amonni ôana ǃoa.

¹¹Tsî Johananni, Kareaxi ôab, tsî ǂnubidi, ǁîb ǀkha hâdi di ǂamsagu hoagu ge ǁnā ǂkhabab, Ismaeli Netanjab ôab ge dība ǁnâuo,

¹²o gu ge aogu hoaga ū tsî ge ǃgû, Ismaeli Netanjab ôaba gu nî ǃkhamūse, tsî gu ge ǁîba ǁnā kai ǁgammi, Gibeons ǀgūse hâb tawa ge hō.

¹³Tsî i ge ge ī, ǁnā ǁaes, Ismaeli ǀkha hâs hoas ge Johananni, Kareaxi ôab di ǂnubidi, ǁîb ǀkha hâdi tsî ǂamsagu hoagu tsîga mûo, on ge ge ǃgâiaǂgao.

¹⁴Os ge ǁnā ǁaes, Ismaeli ge Mispasa xu ǃkhōsase ūǃgûbēs hoasa dawasen tsî ge oa, Johananni Kareaxi ôab ǃoa.

¹⁵Xawe Ismaeli Netanjab ôab ge Johananni di aisa xu ge ûi ǁkhaisa aogu ǀkha, tsîb ge Amonni ôan ǃoa ge doesī.

¹⁶ǃNubaib ge Johananni, Kareaxi ôab, tsî ǂnubidi, ǁîb ǀkha hâdi di ǂamsagu hoagu tsîna ǃgau ge gu ǁaes digu Ismaeli Netanjab ôaba xub ge Mispasa xu Gedaljab, Ahikammi ôabab, ge ǃgams khaoǃgâ, a ūhāgu hoaga ge ū ǁnā aogu, hîa toro-ao ge igu, tsî taradi tsî ǀgôaron tsî ǃnā-oms ǃoabasaben Gibeonsa xub ge ūhā hâ in tsîna.

¹⁷Tsîn ge doe tsî Gerut-Kimhams, Betlehems ǀgūse hâs, tawa ge sī ǁgoe, aiǃâb ǃoa doe tsîn nî Egipteb tawa sīga,

¹⁸Xaldeaǁîn di ais aiǃâba xu, ǁîn di aisan ge ǃao xui-ao, Ismaeli Netanjab ôab ge Gedaljab Ahikammi ôab Babilons gao-aob ge ǃhūb di mûǂamaose mâiba ǂnau amaga.